អន្តរជាតិ៖ អតីតប្រធានក្រុមហ៊ុនដឹកជញ្ជូនម៉ាឡេស៊ីម្នាក់ ត្រូវបានពិន័យជាប្រាក់ចំនួន ១,៥០០ រីងហ្គីត (៣៦៤ ដុល្លារអាមេរិក) ព្រោះតែគាត់មិនបានពាក់ម៉ាស់ក្នុងអំឡុងពេលគាត់ថ្លែងសុន្ទរកថានៅក្នុងវេទិការសាធារណៈមួយ។ ខណៈប្រទេសម៉ាឡេស៊ី គឺជាប្រទេសមួយដែលមានការអនុវត្តច្បាប់យ៉ាងតឹងរឹងបំផុតចំពោះពលរដ្ឋណាដែលបានធ្វើសកម្មភាពផ្ទុយពីការណែនាំរបស់អាជ្ញាធរសុខាភិបាល បើទោះជាកំហុសនោះបានកើតឡើងដោយចេតនាឬអចេតនាក្តី។ នេះបើយោងតាមការចុះផ្សាយនៅក្នុងសារព័ត៌មាន World of Buzz ។
អតីតប្រធានក្រុមហ៊ុនដឹកជញ្ជូនម៉ាឡេស៊ីរូបនេះ មានឈ្មោះ Datuk Seri Tajuddin Abdul Rahman ហើយនាពេលកន្លងមករូបគាត់ធ្លាប់មានតួនាទីជាប្រធានក្រុមហ៊ុន Prasarana Malaysia Berhad ដែលជាក្រុមហ៊ុនដឹកជញ្ជូនសាធារណៈដ៏ធំមួយនៅក្នុងប្រទេសម៉ាឡេស៊ីផងដែរ។
គួរបញ្ជាក់ថា ក្រោយទទួលបានការផាកពិន័យ លោក Datuk Seri Tajuddin Abdul Rahman បានថ្លែងទទួលស្គាល់កំហុសរបស់គាត់ និងបានរម្លឹកទៅកាន់ពលរដ្ឋម៉ាឡេស៊ីជាច្រើននាក់ផ្សេងទៀតឱ្យអនុវត្តពាក់ម៉ាស់ឱ្យបានត្រឹមត្រូវគ្រប់ពេលវេលាដើម្បីចូលរួមទប់ស្កាត់ការរាតត្បាតជំងឹកូវីដ-១៩ ទាំងអស់គ្នា៕ដោយ៖សហការី
រូបភាព៖ Shahrin Yahya
