ភ្នំពេញ : ជនសង្ស័យម្នាក់ ជាមុខសញ្ញាចាស់ ត្រូវបានបងប្អូនប្រជាពលរដ្ឋ ចាប់បានឃាត់ខ្លួនបាន ក្រោយពីធ្វើសកម្មភាពគាស់សោរបន្ទប់ជួល របស់កម្មករ រួចប្រគល់ឱ្យសមត្ថកិច្ច ចាត់ការទៅតាម ច្បាប់ ។
ហេតុការណ៍នេះបានកើតឡើងកាលពីវេលាម៉ោង៣ រសៀល ថ្ងៃទី១៧ ខែមិនា ឆ្នាំ២០១៦ ស្ថិតនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យឈ្មោះ វ៉ែន ឡុក ភេទប្រុស អាយុ២៣ឆ្នាំ មុខរបរ មិនពិតប្រាកដ ស្នាក់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅ ភូមិតូច ស្រុកឈូកខេត្តកំពត ។
ចំណែកជនរងគ្រោះ ជាម្ចាស់បន្ទប់ជួល មានឈ្មោះ អីុ ថេត ភេទប្រុស អាយុ២២ឆ្នាំ មុខរបរ កម្មករសំណង់ ស្នាក់នៅ បន្ទប់ជួលលេខ១៤ ជាន់ទី២ កន្លែងកើតហេតុ ខាងលើ មានស្រុកកំណើត នៅភូមិថ្មី ឃុំចោមម៉ោង ស្រុកទឹកផុស ខេត្តកំពង់ឆ្នាំង ។
បើតាមសំដីជនរងគ្រោះ បានឱ្យដឹងថា មុនកើតហេតុ ខណ:ដែល វិលត្រឡប់មកពីធ្វើការសំណង់វិញ ឡើងទៅលើផ្ទះ ស្រាប់តែ ឃើញទ្វារបន្ទប់ របើក ចំហរ មើលក្នុងបន្ទប់ សម្ភារ: រើរប៉ាត់រប៉ាយ ដឹងថាមានមនុស្សគាស់បន្ទប់ចូល លួចឥវ៉ាន់ សួរអ្នកក្បែរខាង សង្ស័យ ឃើញជនសង្ស័យ កំពុងជញ្ជូនឥវ៉ាន់ ទើបធ្វើការឃាត់ខ្លួន ប្រគល់ឱ្យសមត្ថកិច្ច តែម្តង ។ តាមការពិនិត្យជាក់ស្តែង ផ្ទះជួលខាងលើ ត្រូវបានជនសង្ស័យ ធ្វើសកម្មភាពគាស់ ចាប់ពីជាន់ទី១ដល់ជាន់ទី៣ សរុបចំនួន៧បន្ទប់ ។
ជនសង្ស័យ ត្រូវបានឃាត់ខ្លួនធ្វើការសាកសួរនៅប៉ុស្តិ៍ចោមចៅ កសាងសំណុំរឿងបញ្ជូនទៅអធិការដ្ឋាននគរបាលខណ្ឌពោធិ៍សែនជ័យដើម្បីចាត់ការទៅតាមនីតិវិធី ៕សុខាសែនជ័យ
