ភ្នំពេញៈបុរសស្រវឹងស្រាម្នាក់ជិះម៉ូតូក្នុងល្បឿនលឿនជ្រុលទៅបុកម៉ូតូមួយគ្រឿងទៀតដែលជិះកាត់ពីមុខបណ្ដាលឲ្យដួលផ្ទប់ទៅនិងថ្នល់រងរបួសធ្ងន់ដោយខ្លួនឯង ហើយភាគីខាងម៉ូតូត្រូវគេបុកជិះគេចខ្លួនបាត់ស្រមោល។​ ហេតុការណ៍នេះបានកើតឡើងកាលពីវេលាម៉ោង២និង៣០នាទីរំលងអាធ្រាតឈានចូល ថ្ងៃទី១៨ ខែមីនា ឆ្នាំ២០១៦ នៅតាមបណ្ដោយផ្លូវព្រះសុរាម្រឹត កែងនិងផ្លូវសុធារស ស្ថិតក្នុងសង្កាត់ចតុមុខ ខណ្ឌដូនពេញ។
បើតាមសាក្សីដែលនៅក្បែរកន្លែងកើតហេតុនិងឃើញហេតុការណ៍ខាងលើនេះបានប្រាប់ឲ្យដឹងថា មុនពេលកើតហេតុ គឺបុរសរងគ្រោះម្នាក់ជិះម៉ូតូម៉ាកវីវ៉ាសួរហ្គួន ពណ៌ខ្មៅ ពាក់ស្លាកលេខ បាត់ដំបង 1J.3553 ដែលស្ថិតក្នុងស្ថានភាពស្រវឹងស្រា ធ្វើដំណើរទិសដៅពីត្បួងទៅជើង តាមបណ្ដោយផ្លូវសុធារស ក្នុងល្បឿនលឿន ខណះមកដល់ចំណុចកើតហេតុដែលជាកន្លែងផ្លូវកែង និងមិនបន្ថយល្បឿននោះ ក៏ជ្រុលទៅបុកម៉ូតូមួយគ្រឿងទៀតមិនចាំម៉ាក ដែលជិះឌុបគ្នាពីរនាក់ធ្វើដំណើរតាមបណ្ដោយផ្លូវព្រះសុរាម្រឹត ទិសដៅពីកើតទៅលិចក្នុងល្បឿនល្មមនោះ ក៏បុកចំពីចំហៀងពេញទំហឹងបណ្ដាលឲ្យភាគីខាងម៉ូតូបង្ករងរបួសធ្ងន់ដោយខ្លួនឯង។ ចំណែកឯភាគីខាងម៉ូតូរងគ្រោះបានបន្តជិះទៅបាត់តែម្ដង ដោយទំនងមិនចង់មានរឿងវែងឆ្ងាយ ព្រោះថាខ្លួនមិនមានរបួសនិងមិនខូចខាតម៉ូតូផងដែរ។
ក្រោយពេលកើតហេតុ បុរសដែលជិះម៉ូតូបង្កនិងរងរបួសធ្ងន់ដោយខ្លួនឯងនោះ ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យឯកជនភ្លាមៗ ចំណែកឯម៉ូតូបង្ក ត្រូវបានសមត្ថកិច្ច យកទៅរក្សាទុកនៅប៉ុស្តិ៍នគរបាលចតុមុខ រងចាំម្ចាស់មកទទួលយកទៅវិញ៕ព្រែកជ័យ