ភ្នំពេញ៖ បើយោងតាមរបាយការណ៍របស់ក្រសួងសិកម្ម រុក្ខាប្រមាញ់ និងនេសាទ បានបញ្ជាក់ថា បច្ចុប្បន្ននេះដំណាប់ស្វាយរបស់ប្រទេសកម្ពុជា បានដណ្តើមចំណែកទីផ្សារនាំចេញទៅកាន់បរទេសបានសរុបចំនួនប្រមាណជា ៨ ប្រទេសរួមមាន៖ចិន, ជប៉ុន, កូរ៉េ, ហ្វីលីពិន, ថៃ, អាមេរិក, វៀតណាម, និងចក្រភព។
របាយការណ៍ដដែល បន្តថា កម្ពុជា នៅក្នុងរយៈពេល ៦ខែ ត្រឹមឆមាសទីមួយ នៃឆ្នាំ២០២១នេះ នាំចេញដំណាប់ស្វាយមានចំនួន ១២.៧៦៨,៦១ តោន កើនឡើងចំនួន ១៩៨,៦០%។
បន្ថែមពីនេះ ក្រសួងកសិកម្ម បានគូសបញ្ជាក់ថា ដំណាប់ស្វាយកម្ពុជា នាំចេញទៅប្រទេសចិនចំនួន ១០.៤៧៦,០៩ តោន, ប្រទេសជប៉ុនចំនួន ៥១២,៥០ តោន, ប្រទេសកូរ៉េចំនួន ១៣,៧៩ តោន, ប្រទេសហ្វីលីពីន ចំនួន ៦៤៧,២៩ តោន, ប្រទេសថៃចំនួន ១ ០២០,៦១ តោន, សហរដ្ឋអាមេរិកចំនួន ៥,៣៩ តោន, ប្រទេសវៀតណាម ចំនួន ៧៦,៨០ តោន, និងចក្រភពអង់គ្លេស ១៦,១៤ តោន។
ជាមួយគ្នានេះ របាយការណ៍របស់ក្រសួងសិកម្ម រុក្ខាប្រមាញ់ និងនេសាទ បានបញ្ជាក់បន្ថែមទៀតថា បច្ចុប្បន្នពលរដ្ឋអារ៉ាប់នៅមជ្ឈឹមបូព៌ាចាប់ផ្តើមទទួលទានស្វាយពីកម្ពុជា ខណៈទីផ្សារស្វាយកម្ពុជា មាននៅប្រទេសចំនួន ៥។
ក្រសួងកសិកម្ម បានអះអាងបន្ថែមថា នៅក្នុងចំណោមគោលដៅនាំចេញស្វាយស្រស់កម្ពុជាថ្វីត្បិតតែបរិមាណនាំចេញពីមជ្ឈឹមបូព៌ានៅ ក្នុងចំនួន តិចតួច ប៉ុន្តែយ៉ាងណាក៏ពលរដ្ឋអារ៉ាប់អាចដឹងរស់ជាតិស្វាយស្រស់នាំចេញពីកម្ពុជា ។
ជាក់ស្ដែងប្រទេសនៅមជ្ឈឹមបូព៌ាដែលទទួលនាំចូលស្វាយស្រស់ពីកម្ពុជា គឺប្រទេសគុយវ៉ែត ដោយនាំចូលនៅក្នុងបរិមាណ ០.០១ តោន។ មិនតែប៉ុណ្ណោះកម្ពុជា នៅក្នុងឆមាសទីមួយ នៃឆ្នាំ២០២១នេះ នាំចេញផ្លែស្វាយស្រស់មានចំនួន ១៥៩.៧៧៨,៥៥ តោន កើនឡើងចំនួន ២៤៥,៨៤%។
គួរបញ្ជាក់ថា កម្ពុជា បាននាំចេញទៅទីក្រុងហុងកុងចំនួន ៥០,៧៨ តោន ប្រទេសកូរ៉េចំនួន ១២៤,៣៨ តោន ប្រទេសគុយវ៉ែតចំនួន ០,០១ តោន ប្រទេសសិង្ហបុរីចំនួន ១៦,២០ តោន ប្រទេសថៃចំនួន ២០.៩៦៩,២៨ តោន ប្រទេសវៀតណាមចំនួន ១៣៨.៤០៦,៦៨ តោន និងប្រទេសចិនចំនួន ២១១,២២ តោន៕ដោយ៖សហការី
រូបភាព៖ឯកសារ
