រៀបការគឺជាថ្ងៃសប្បាយបំផុតនៅក្នុងឆាកជីវិតមនុស្សម្នាក់ៗ ប៉ុន្តែនៅក្នុងប្រទេសឥណ្ឌាវិញពីធីរៀបការអាចបញ្ចប់ទៅដោយមានបុណ្យសពមួយបន្តទៀត តើហេតុអ្វី?
កាលពីចុងសប្តាហ៍កន្លងមកពីធីរៀបការនៅក្នុងភូមិRaipur Bhoodរដ្ឋUttar Pradesh បានក្លាយជាសោកនាដកម្ម ពេលដែលអ្នកថតរូបភាពត្រូវបាញ់សម្លាប់។ មូលហេតុគឺអ្នកផ្ទះកូនកំឡោះបានផ្ទុះកាំភ្លើងដើម្បីអបអរសាទរ ជាអកុសលគ្រាប់ផ្លាតត្រូវចំអ្នកថតរូប។
ជនរងគ្រោះ Raju ត្រូវបាញ់ចំពោះហើយស្លាប់ពេលបញ្ជូនដល់មន្ទីរពេទ្យ។ ចំណែកស្ត្រីម្នាក់ទៀតរងរបួសនៅក្នុងហេតុការនោះដែរ។ ស្នូរកាំភ្លើងនេះមិនមានគោលដៅធ្វើឲ្យអ្នកណាម្នាក់រងរបួសនោះឡើយ ។ ប៉ុន្តែគ្រាប់គ្មានភ្នែក អាចទៅចំសម្លាប់មនុស្សដែលមិនដឹងអី។
នៅក្នុងពិធីរៀបការមួយផ្សេងទៀតនៅភាគខាងជើងប្រទេសឥណ្ឌា ឪពុកកូនកម្លោះក៏បានផ្ទុះកាំភ្លើងធ្វើឲ្យកុមារអាយុ១២ឆ្នាំម្នាក់រងរបួស។ នៅក្នុងភូមិមួយទៀតស្ត្រីម្នាក់បានរងរបួសដោយសារតែចូលរួមពិធីរៀបការដូចគ្នានោះដែរ។
នៅមុននេះមួយសប្តាហ៍ នៅតំបន់Ail Pur ជាយក្រុងញ៉ូវដេលីពិធីរៀបការមួយក៏បានបញ្ចប់ទៅដោយសោកសៅក្រោយពេលដែលផ្ញៀវមកចូលរួមបានស្លាប់ដោយត្រូវគ្រាប់កាំភ្លើង នៅពេលដែលផ្ញៀវឈ្មោះVikasKumar បាញ់កាំភ្លើងអបអរសាទរ។ លោកបានបាញ់អស់ជិតមួយបង់ឡើងលើមេឃ ហើយបាញ់ចុះដីធ្វើឲ្យមិត្តភក្តិកូនកម្លោះពីរនាក់រងរបួសជើងនិងសមាជិកក្រុមតន្ត្រីផងដែរ។
គ្រាន់នៅតែក្នុងខែកុម្ភៈឆ្នាំ២០១៦ មានមនុស្ស៤នាក់ស្លាប់ដោយសារតែចូលរួមក្នុងពិធីមង្គល ការនៅរដ្ឋUttar Pradeh។ ក្នុងចំណោមជនរងគ្រោះ មានទាំងកូនកម្លោះផងដែរ។ នោះគឺកូនកម្លោះឈ្មោះAmit Rastogi បានជិះសេះទៅទទួលកូនក្រមុំតាមទំនៀបទំលាប់។ ភ្ញៀវដែលចូលរួមបានបាញ់កាំភ្លើងអបអរសាទរ ចៃដន្យត្រូវចំក្បាល។
ពិធីអបអរសាទរដោយប្រើកាំភ្លើងកំពុងតែពេញនិយមនៅក្នុងប្រទេសឥណ្ឌា អាហ្វហ្គានិស្ថាន ក៏ដូចជាប្រទេសនៅតំបន់មជ្ឈឹមបូព៌ា សុទ្ធសឹងតែបានបាញ់កាំភ្លើងនៅក្នុងពិធីសប្បាយ អបអរសាទរផ្សេងៗ ជំនួសកាំជ្រួច ផាវ។
ជាទូទៅអ្នកប្រើប្រាស់កាំភ្លើងតែងតែគិតថា បាញ់ទៅលើមេឃមានសុវត្ថិភាពជាង ។ ប៉ុន្តែនោះជាការគិតខុសស្រឡះនៅពេលដែលគ្រាប់ធ្លាក់មកវិញវាមានគ្រោះថ្នាក់ជាងពេលបាញ់ទៅលើទៀតដោយពេលធ្លាក់ចុះពីលើគឺចំក្បាលស្លាប់គ្រាប់ពេល៕ សុខ ខេមរា
