ខេត្តកំពង់ស្ពឺ៖ ហេតុការណ៍គ្រោះអគ្គីភ័យមួយ បានឆាបឆេះរោងជាងកែច្នៃឈើមួយកន្លែង ត្រង់ចំណុចភូមិរកាធំ សង្កាត់រកាធំ ក្រុងច្បារមន ខេត្តកំពង់ស្ពឺ បង្កការភ្ញាក់ផ្អេីលឡេីងនៅវេលារំលង អធ្រាត្រឈានចូលថ្ងៃទី១៥ ខែកក្កដា ឆ្នាំ២០២១នេះ។
បើតាមប្រភពព័ត៍មានពីមន្ត្រីនគរបាលក្រុងច្បារមន បានឱ្យដឹងថា៖ អគ្គិភ័យឆេះរោងកែច្នៃឈើនេះ មានទំហំ៨ម៉ែត្រ គុណនឹង ៣០ ម៉ែត្រ ធ្វើអំពីដែកប្រក់ស័ង្កសី ស្ថិតនៅក្នុងភូមិរការធំ សង្កាត់រការធំ ក្រុងច្បារមន ដែលមានម្ចាស់ ឈ្មោះ យូ ស្រូយ ភេទស្រី អាយុ៥៣ឆ្នាំ ឆេះសម្ភារៈ ម៉ាស៊ីនតាប ៣ គ្រឿង និងឆេះសម្ភារ ឈើកែច្នៃរួចមួយចំនួនធំ។
មន្រ្តីដដែលបន្តថា ករណីគ្រោះអគ្គិភ័យនេះ មិនបណ្តាលឱ្យមានគ្រោះថ្នាក់ដល់មនុស្ស និងមិន មានឆេះរាលដាល ដល់ផ្ទះអ្នកជិតខាងទេ។ នៅពេលនេះយើងមិនទាន់ដឹង ពីមូលហេតុ នៃការឆេះរោងជាងកែច្នៃឈើ ខាងលើនេះ នៅឡើយទេ។
គួរបញ្ជាក់ថា ក្រោយកិច្ចប្រតិបត្តិការកម្លាំងអធិការដ្ឋាននគរបាល ក្រុងច្បារមន ចំនួន១២នាក់ និងកម្លាំងការិយាល័យអគ្គិភ័យ ខេត្តកំពង់ស្ពឺ ចំនួន១៤នាក់ សរុប២៦នាក់ ប្រើប្រាស់រថយន្ត ពន្លត់អគ្គិភ័យ របស់ស្នងការដ្ឋាននគរបាលខេត្តកំពង់ស្ពឺ ចំនួន ៣គ្រឿង ប្រើប្រាស់ទឹកអស់ចំនួន ៩ឡាន នឹងបានរលត់ទៅវិញនៅវេលាម៉ោង៣ ទៀបភ្លឺថ្ងៃខែឆ្នាំដដែល៕ដោយ៖សហការី
