ខេត្តកណ្ដាល៖ យុវជនម្នាក់ ទំនងជាតូចចិត្ដនឹងម្ដាយមិនទិញទូរស័ព្ទអោយប្រើប្រាស់ដូចបំណងក៏ចងកធ្វើអត្ដឃាតសម្លាប់ខ្លួននៅលើផ្ទះនារីជាគូដណ្ដឹង បង្កឲ្យមានការភ្ញាក់ផ្អើលនៅវេលាម៉ោង១៥និង៤០នាទី ថ្ងៃទី២០ ខែមីនា ឆ្នាំ២០១៦ នៅភូមិអញ្ជែងក្រោម ឃុំពុកឬស្សី ស្រុកខ្សាច់កណ្ដាល ខេត្ដកណ្ដាល ។
យុវជនគិតខ្លីចងកបញ្ចប់ជីវិតនោះ មានឈ្មោះ សាន់ រ៉ែន ភេទប្រុស អាយុ២១ឆ្នាំ ជនជាតិខ្មែរ មុខរបរកសិករ មានឪពុកឈ្មោះ សាន់ រ៉ា អយុ៤៣ឆ្នាំ មុខរបរកសិករ ម្ដាយឈ្មោះ វ៉ាន់ ថេន អាយុ៣៨ឆ្នាំ មុខរបរកសិករ មានទីលំនៅភូមិព្រែកយាយហ៊ិនទី១ ឃុំឬស្សីជ្រោយ ស្រុកមុខកំពូល ខេត្ដកណ្ដាល បច្ចុប្បន្នស្នាក់នៅផ្ទះនារីជាគូរដណ្ដឹងក្នុងភូមិ-ឃុំកើតហេតុខាងលើ ។
ប្រភពពីមន្ត្រីនគរបាលស្រុកខ្សាច់កណ្ដាលបានឲ្យដឹងថា អស់រយៈពេលប្រមាណ៣ខែមកហើយជនរងគ្រោះឈ្មោះ សាន់ រ៉ែន បានមកស្នាក់នៅផ្ទះជាមួយគូរដណ្ដឹងឈ្មោះ ផៃ កាក់ អាយុ១៧ឆ្នាំ មុខរបរជាកម្មការីនីរោងចក្រកាត់ដេរ មានទីលំនៅភូមិព្រែកយាយហ៊ិនទី១ ឃុំឬស្សីជ្រោយ ស្រុកខ្សាច់កណ្ដាល ។
លុះមកដល់មុនពេលកើតហេតុប៉ុន្មានថ្ងៃ ជនរងគ្រោះចេះតែខ្ចីទូរស័ព្ទគេតេម្ដាយបង្កើតរបស់ខ្លួនសុំទិញទូរស័ព្ទស៊េរីថ្មីមួយគ្រឿង ដោយសារជីវភាពក្រលំបាកស្ដ្រីជាម្ដាយមិនបានអនុវត្ដតាមការស្នើសុំរបស់ជនរងគ្រោះឡើយ ជាហេតុធ្វើឲ្យជនរងគ្រោះមានការតូចចិត្ដយ៉ាងខ្លាំង រហូតបញ្ចេញទឹកមុខខុសប្លែកពីធម្មតា តែមិនមាននរណាម្នាក់ចាប់អារម្មណ៏នោះទេ ។ ស្រាប់តែដល់ថ្ងៃកើតហេតុជនរងគ្រោះបានឡើងទៅចងកនៅលើផ្ទះដោយយកខ្សែអង្រឹងចងភ្ជាប់ជាមួយផ្ទោងដំបូលមានកំពស់២,៥០ម៉ែត្រពីរនាបផ្ទះស្លាប់បាត់បង់ជីវិតតែម្ដង ។
សមត្ថកិច្ចនគរបាលបច្ចេកទេសនិងវិទ្យាសាស្ដ្រស្រុកខ្សាច់កណ្ដាលបានបញ្ជាក់ថា ជនរងគ្រោះពិតជាស្លាប់ដោយសារចងកធ្វើអត្ដឃាតដោយខ្លួនឯងប្រាកដមែន មិនមានជាប់ពាក់ព័ន្ធនិងករណីអ្វីផ្សេងឡើយ ។ ក្រោយពីពិនិត្យរួចសមត្ថកិច្ចបានប្រគល់សាកសពជនរងគ្រោះទៅឲ្យក្រុមគ្រួសារចាត់ចែងទៅធ្វើបុណ្យតាមប្រពៃណី ៕
ដោយ៖ ស្អាងជ័យ
