លោករដ្ឋមន្ត្រីបន្តទៀតថា នៅខេត្តកណ្តាល ក្រសួងបានធ្វើការសិក្សាវាយតម្លៃបឋមលើព្រែក ចំនួន ៣០៣ ព្រែក និងបានកំណត់យកព្រែកចំនួន ៧៧ ដែលមានសក្តានុពលខ្ពស់ជាងគេ ជាអាទិភាព សម្រាប់ការស្តារឡើងវិញ ដោយបែងចែកជាពីរដំណាក់កាល ។ ក្នុងដំណាក់កាលទី ១ ដែលយើងកំពុងអនុវត្តក្រោមហិរញ្ញប្បទានពីទីភ្នាក់ងារបារាំងសម្រាប់ការអភិវឌ្ឍន៍ ( AFD) នាពេលនេះ មានចំនួន ៣០ ព្រែក និងត្រូវអនុវត្តក្នុងរយៈពេល ០២ ឆ្នាំ ។ ពាក់ព័ន្ធនឹងលក្ខណៈបច្ចេកទេស លោករដ្ឋមន្ត្រីបានប្រាប់ឲ្យដឹងថា ជាធម្មជាតិ ព្រែកមានតួនាទីនាំទឹកពីស្ទឹង ទន្លេ ទៅកាន់បឹងបួ ឬតំបន់ទំនាប នៅរដូវទឹកឡើង ហើយនៅរដូវសម្រក ព្រែកនឹងនាំទឹកពីបឹងបួ តំបន់ទំនាប មកកាន់ស្ទឹង ទន្លេវិញ ។ ប៉ុន្តែ នៅក្នុងការស្តារឡើងវិញនាពេលនេះ យើងបានធ្វើការកែប្រែខ្លះនូវចរន្តធម្មជាតិនេះ ដោយយើងសាងសង់សំណង់ទ្វារទឹកនៅនឹងមាត់ព្រែក និងសាងសង់សំណង់សិល្បការមួយចំនួននៅលើតួព្រែក ដើម្បីស្ទាក់ទឹកទុក មិនឲ្យហូរចេញមកវិញដូចពីមុនទេ ។

ចំពោះការគ្រប់គ្រង លោករដ្ឋមន្ត្រីបានបញ្ជាក់ថា ពីបុរាណមក ព្រែកនីមួយៗសុទ្ធតែមានមេព្រែក ដែលមេព្រែកទាំងនោះជាអ្នកគ្រប់គ្រង ចាត់ចែង លើការប្រើប្រាស់ព្រែក ដូចនេះហើយបានជាយើងបានឮឈ្មោះមេព្រែកទាំងនោះរហូតដល់បច្ចុប្បន្ន ដូចជាព្រែកតាអ៑ុក ព្រែកតាឡៃ ព្រែកកុងវ៉ាន់ ព្រែកយាយហៃ ។ល។ ប៉ុន្តែសម្រាប់ស្ថានភាពបច្ចុប្បន្ន ក្រោយពេលដែលយើងស្តាររួច ក្រសួងនឹងរៀបចំជាសហគមន៍ ដើម្បីគ្រប់គ្រងព្រែកនីមួយៗ ។

លោករដ្ឋមន្ត្រី បានផ្តល់អនុសាសន៍ដល់ក្រុមហ៊ុនដែលកំពុងសាងសង់ យកចិត្តទុកដាក់អនុវត្តការងាររបស់ខ្លួនឲ្យបានត្រឹមត្រូវទៅតាមស្តង់ដារ៍ និងបទដ្ឋានបច្ចេកទេស ដើម្បីធានាបាននូវគុណភាព និងការប្រើប្រាស់បានយូរអង្វែង ៕

ដោយ៖ សុវណ្ណារ៉ា