ភ្នំពេញ៖ ស្ត្រីជាអ្នករើសអេតចាយម្នាក់ បានស្លាប់យ៉ាងអណោចអាធម៍ ខណៈដែលបុរសម្នាក់ផឹកស៊ីស្រវឹង រួចបើកបរទាំងបំពានច្បាប់ចរាចរណ៍ជើងគោក ទៅកិនស្ត្រីរងគ្រោះទាំងកំរោល ពេលគាត់កំពុងដេកលង់លក់នៅតាមចិញ្ចើមផ្លូវ ។
ហេតុការណ៍គ្រោះចរាចរកើតឡើងកាលពីវេលាម៉ោង២និង៤៥នាទីរំលងអាធ្រាត្រ ឈានចូលថ្ងៃទី២៨ ខែមីនា ឆ្នាំ២០១៦ នៅចំណុចមុខវត្តសារ៉ាវ័ន្ត ផ្លូវលេខ១៩ សង្កាត់ជ័យជំនះ ខណ្ឌដូនពេញ ។
ស្ត្រីរងគ្រោះមិនត្រូវស្គាល់អត្តសញ្ញាណនោះទេមានអាយុប្រហែល៥០ឆ្នាំ មុខរបររើសអេតចាយ ស្នាក់នៅមិនពិតប្រាកដ។ចំណែករថយន្តបង្កម៉ាក់ហាយឡែនឌ័រពណ៍ស្លែ ពាក់ស្លាកលេខភ្នំពេញ ២M -៧០៩៣ បើកបរដោយឈ្មោះ តាំង ហុង អាយុ២១ឆ្នាំ ស្នាក់នៅផ្ទះលេខ១០៥E២ ផ្លូវលេខ១៥៤ សង្កាត់ផ្សារកណ្តាល២ ខណ្ឌដូនពេញ ។
តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា នៅមុនពេលកើតហេតុ គឺស្ត្រីរងគ្រោះបានទុករទេះអេតចាយនៅចិញ្ចើមផ្លូវរួចដេកលង់លក់នៅក្បែរនោះស្រាប់តែដល់វេលាកើតហេតុក៏មានរថយន្តម៉ាកហាយឡែនឌ័រមួយគ្រឿងបើកបរដោយបុរសម្នាក់ប្រហែលទើបចេញពីផឹកបានបោះពួយយ៉ាងលឿនពីត្បូងមកជើងលុះមកដល់ចំណុចកើតហេតុបានជ្រុលមកចិញ្ចើមផ្លូវទៅបុកកិនជនរងគ្រោះទាំងកំរោលប៉ើងខ្ទាតរទេះអេតចាយ។ ចំណែកជនរងគ្រោះបានស្លាប់ភ្លាមៗនៅកន្លែងតែម្តង។ ចំណែករថយន្តបង្កហេតុក៏ត្រូវបានកម្លាំងសមត្ថកិច្ចឃាត់ភ្លាមៗរួចហើយហៅផ្នែកជំនាញចរាចរក្រុងចុះមកាស់វែងយករថយន្តបង្កហេតុទៅរក្សាទុក។ រីឯសពជនរងគ្រោះមិនត្រូវបានគេស្គាល់អត្តសញ្ញាណនោះទេបានបញ្ជូនទៅធ្វើបុណ្យនៅវត្តសម្បូរមាស៕ ស ដារ៉ា
