ភ្នំពេញ ៖ បុរសម្នាក់បានបែកក្បាលធ្លាយខួរស្លាប់យ៉ាងអាណោចអាធ័មនៅនឹងកន្លែង បន្ទាប់ពីជិះម៉ូតូមួយគ្រឿងត្រូវរថយន្តក្រឡុកស៊ីម៉ងត៍ក្រុមហ៊ុន ជីបម៉ុង លែន បើកបត់ឆ្លងផ្លូវទៅបុករួចកិនអូសជាច្រើនម៉ែត្រ កាលពីវេលាម៉ោង ០៩ និង១០នាទីយប់ថ្ងៃទី២៧ ខែសីហា ឆ្នាំ២០២១ ស្ថិតនៅតាមបណ្តោយផ្លូវ៥៩៨ កែងផ្លូវ៣២៧ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា, មុនកើតហេតុគេឃើញរថយន្តក្រឡុកស៊ីម៉ងដ៍ក្រុមហ៊ុន ជីប ម៉ុង លែន មួយគ្រឿង ពណ៌ស ពាក់ស្លាកលេខភ្នំពេញ5A-0726ធ្វើដំណើរតាមបណ្ដោយផ្លូវ៥៩៨ ទិសដៅពីជើងទៅត្បូង លុះមកដល់ចំណុចកើតហេតុខាងលើកែងនិងផ្លូវ៣២៧បានបត់ឆ្វេងដៃទៅទិសខាងកើត ក៏ជ្រុលទៅបុកម៉ូតូមួយគ្រឿងម៉ាកហុងដាឌ្រីមសង់ស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ1CM-2121ជិះដោយបុរសម្នាក់ធ្វើដំណើរបញ្ច្រាសទិសដៅគ្នាពីត្បូងទៅជើង បានបុកនិងកិនបុរសម្នាក់ម្ចាស់ម៉ូតូបណ្ដាលឲ្យបែកក្បាលធ្លាយខួរស្លាប់មួយរំពេច តែម្តង។ បន្ទាប់មកតៃកុងរថយន្តក្រឡុកស៊ីម៉ង់ដ៏ឃើញសភាពមិនស្រួលក៏បានបើកទ្វាររថយន្តចុះរត់គេចខ្លួនបាត់ស្រមោលបន្សល់ទុករថយន្តនៅនឹងកន្លែងកើតហេតុ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ហេីយទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមច្បាប់។
ដោយឡែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
