ខេត្តកណ្តាល ៖ រថយន្តរបស់ពេទ្យធ្មេញនៅក្រុងតាខ្មៅត្រូវបានចោរលួចយកទៅបាត់ដោយសុវត្ថិភាព គ្រាដែលម្ចាស់ចតចោលនៅក្បែរចិញ្ចើមផ្លូវខាងមុខទីតាំងពេទ្យធ្មេញយីហោ “ហេង ហេង” ស្ថិតក្បែរផ្សារតាខ្មៅចាស់ ក្នុងភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល ។ រថយន្តដែលត្រូវបានចោរលួចយកទៅកាលពីវេលាទៀបភ្លឺថ្ងៃទី២០ ខែកក្កដា ឆ្នាំ២០១៥ នោះម៉ាកតូយូតាហាយឡែនឌ័រ ពណ៌ទឹកមាស ពាក់ស្លាកលេខភ្នំពេញ2AC-2120 ជាកម្មសិទ្ធរបស់ឈ្មោះ លឹម ប៊ុនហេង ភេទប្រុស អាយុ៤៣ឆ្នាំ មុខរបរជាគ្រូពេទ្យធ្មេញ បច្ចុប្បន្នស្នាក់នៅទីតាំងកើតហេតុខាងលើនេះ ។ ប្រភពពីមន្ត្រីនគរបាលក្រុងតាខ្មៅបានឲ្យដឹងថា ជារៀងរាល់យប់ឈ្មោះ លឹម ប៊ុនហេង តែងតែយករថយន្តរបស់ខ្លួនម៉ាកហាយឡែនឌ័រចតទូកចោលខាងមុខផ្ទះជាប្រចាំ ។ លុះមកដល់វេលាយប់ថ្ងៃទី១៩ ខែកក្កដា ឆ្នាំ២០១៥ ឈ្មោះ លឹម ប៊ុនហេង បានបើករថយន្តមកចតនៅក្បែរចិញ្ចើមផ្លូវខាងមុខជាធម្មតាដូចសព្វមួយដង ហើយក៏បានឡើងទៅសម្រាកនៅលើផ្ទះបាត់ទៅ រហូតដល់វេលាម៉ោងប្រមាណ៤ និង៣០នាទីព្រឹកក្រោកឡើងរត់ហាត់ប្រាណស្រាប់តែបាត់រថយន្តមិនឃើញនៅកន្លែងទុក ទើបមានការភ្ញាក់ផ្អើលឆោឡោឡើងតែម្តង ។ ក្រោយពីបាត់រថយន្តមិនឃើញនៅកន្លែងទុក រួចមកជនរងគ្រោះបានទៅដាក់ពាក្យបណ្តឹងនៅសមត្ថកិច្ចនគរបាលមូលដ្ឋានក្រុងតាខ្មៅផងដែរ ៕ស្អាងជ័យ
