ខេត្តព្រះសីហនុ៖ ស្ត្រីជនបរទេសម្នាក់បានបាត់បង់ជិវិតនៅក្នុងមន្ទីរពេទ្យបង្អែកចំការ បន្ទាប់ពីក្រុមគ្រូពេទ្យខិតខំជួយសង្គ្រោះជាងកន្លះម៉ោង ក្រោយពីស្ត្រីរងគ្រោះម្នាក់ជិះបុកខឿនផ្លូវ កាលពីវេលាម៉ោង២២ និង២០នាទីយប់ ថ្ងៃ២៨ ខែមីនាឆ្នាំ២០១៦ នៅចំណុចមុខអនុវិទ្យាល័យសម្តេចឪ ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ។
យោងតាមប្រភពពីសមត្ថកិច្ចចរាចរណ៍បានឲ្យដឹងថា នៅវេលាកើតហេតុខាងលើ មានករណីគ្រោះថ្នាក់ចរាចរណ៍មួយកើតឡើងបង្កឡើងដោយខ្លួន បណ្តាលឲ្យស្ត្រីម្នាក់បាត់បង់ជីវិតនៅក្នុងមន្ទីរពេទ្យបង្អែកចំការចេក ក្រុងព្រះសីហនុ។
ប្រភពដដែលបានបន្តថា នៅយប់កើតហេតុ ស្ត្រីរងគ្រោះឈ្មោះចែននី សុកូឡា អាយុ២៣ឆ្នាំ ជនជាតិហូឡង់ ជាបុគ្គលិក នៅផ្ទះសំណាក់ យីហោប៉ាប៉ា កាយូ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ បានបើកម៉ូតូម៉ាកហាយយ៉ាតេ ពណ៌ខ្មៅ ពាក់ស្លាកលេខភ្នំពេញ 1Y- 4181 ក្នុងទិសដៅពីលិចទៅកើត ក្នុងគោលបំណងទៅកាន់កន្លែងធ្វើការសង្កាត់លេខ៤ ក្នុងល្បឿនលឿន រហូតមកដល់ចំណុចកើតហេតុ ដោយទីតាំងនោះមានភាពងងឹត ក៏បានជ្រុលចង្កូតទៅបុកខឿនពុះទ្រូងចែកផ្លូវ បណ្តាលដួលសន្លប់ស្តូកស្តឹងនៅនឹងកន្លែង ហើយត្រូវបានរថយន្តសង្គ្រោះឯកជនដឹកទៅសង្គ្រោះ ប៉ុន្តែដោយស្ថានភាពធ្ងន់ធ្ងរ គ្លីនិចឯកជនក៏បានដឹកបញ្ជូនបន្តនៅមន្ទីរពេទ្យបង្អែកចំការចេក ហើយបានបាត់បង់ជិវិតក្រោយបញ្ជូនទៅដល់ប្រមាណ៣០នាទី។
បច្ចុប្បន្នសាកសព ត្រូវបានរក្សាទុកនៅក្នុងមន្ទីរពេទ្យបង្អែកចេកក្រុង រងចាំតំណាងស្ថានទូតមកទទួលយកទៅចាត់ចែងបន្ត៕
ដោយ៖ ឆ្លាមសមុទ្រ
