ភ្នំពេញ៖ បុរសកម្មករសំណង់ម្នាក់ត្រូវបានជនសង្ស័យលួចម៉ូតូបាត់ខណៈដែលលង់លក់ក្នុងដំណេកជ្រុល ហើយបានទុកម៉ូតូនៅចុងជើងក្នុងការដ្ឋានដែលខ្លួនសម្រាកដោយមិនដឹងថាជនសង្ស័យ លួចអូសយកម៉ូតូតាំងពីពេលណា រហូតដល់ដឹងខ្លួនងើបបត់ជើង ទើបដឹងថាបាត់ បង្កការភ្ញាក់ផ្អើលកាលពីវេលាម៉ោង២រំលងអាធ្រាត្រ ចូលថ្ងៃទី២៩ ខែមីនា ឆ្នាំ២០១៦ នៅក្នុងការដ្ឋានសំណង់ក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ទោះជាតាមស្វែងរកក៏មិនឃើញរហូតដល់ ព្រឹកឡើង ទើបទៅប្តឹងប៉ូលីសប៉ុស្តិ៍ចោមចៅ ។

ជនរងគ្រោះ មានឈ្មោះ ថាន់ សុខអេង ភេទប្រុស អាយុ៣១ឆ្នាំ មុខរបរ កម្មករសំណង់ ស្នាក់នៅក្នុងការដ្ឋានសំណង់ខាងលើ  មានស្រុកកំណើតភូមិ កណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល ។ ម៉ូតូដែលជនសង្ស័យលួចយកទៅម៉ាក សង់កូរ៉េ ពណ៌ក្រហម ពាក់ស្លាកលេខ 1BX-1399 ។

តាមសម្តីជនរងគ្រោះបានឲ្យដឹងថា មុនកើតហេតុរូបគេបានទុកម៉ូតូនៅចុងជើងជាប់កន្លែងដេករបស់ខ្លួនដោយចាក់សោត្រឹមត្រូវ ហើយក៏ដេកលក់បាត់ទៅ រហូតដល់វេលម៉ោង២រំលង​អាធ្រាត្រ ចូលថ្ងៃទី២៩ ខែមីនា ភ្ញាក់ក្រោកបត់ជើងតូច ស្រាប់តែបាត់ម៉ូតូពីចុងជើងមិនដឹងបាត់តាំងពីពេលណា ទើបផ្អើលឆោឡោតាមស្វែងរកទាំងយប់ តែមិនឃើញតម្រុយ មិនឃើញដាន រហូតដល់វេលាម៉ោង៨ព្រឹក ទើបរត់ទៅប្តឹងនគរបាលប៉ុស្តិ៍ចោមចៅឲ្យជួយស្រាវជ្រាវតាមរយៈស្លាកលេខ ៕

ដោយ៖ សុខាសែនជ័យ