អភិបាលរងរាជធានីភ្នំពេញ ចុះត្រួតពិនិត្យ និងធ្វើកិច្ចសន្យានៅតាមដេប៉ូស្តុក និងលក់ខ្សាច់ ក្នុងភូមិសាស្រ្តខណ្ឌមានជ័យ

ចែករំលែក៖

ភ្នំពេញ៖ បន្ទាប់ពីក្រុមអ្នកប្រកបរបរដេប៉ូស្តុក និងលក់ខ្សាច់ ក្នុងភូមិសាស្រ្តខណ្ឌមានជ័យ បានប្រេីរថយន្តដឹកជញ្ជូនខ្សាច់មិនទទួលខុសត្រូវក្នុងការបោសសម្អាត ឬលាងសម្អាតផ្លូវឱ្យបានស្អាតជារៀងរាល់ថ្ងៃ ទេីបនៅរសៀលថ្ងៃសុក្រទី០៣ ខែកញ្ញា ឆ្នាំ២០២១ លោក ស៊ុយ សេរិទ្ធ អភិបាលរងរាជធានីភ្នំពេញ និង លោក ឌី រ័ត្នខេមរុណ អភិបាលរងខណ្ឌមានជ័យ បានដឹកនាំក្រុមការងារចុះត្រួតពិនិត្យ និងធ្វើកិច្ចសន្យា នៅតាមដេប៉ូស្តុក និង លក់ខ្សាច់ ក្នុងភូមិសាស្រ្តខណ្ឌមានជ័យ ។

លោក ឌី រ័ត្នខេមរុណ អភិបាលរងខណ្ឌមានជ័យ បានឱ្យដឹងថា ក្នុងការចុះត្រួតពិនិត្យខាងលេីនេះ មានសមាសភាពចូលរួម៖ លោក ឡាយ ជ ប្រធានការិ-សាធារណៈការ ខណ្ឌមានជ័យ, លោក ឡេង ច័ន្ទភក្រ្តា ប្រធានសណ្តាប់ធ្នាប់ ខណ្ឌមានជ័យ,លោក អ៊ូ សុផាន អនុប្រធាន សណ្តាប់ធ្នាប់ខណ្ឌមានជ័យ ,លោក កែវ សាវឿន ចៅសង្កាត់ចាក់អង្រែលើ និងលោក ជា សុខៃ ចៅសង្កាត់ចាក់អង្រែក្រោម ។

ជាក់ស្ដែងការចុះត្រួតពិនិត្យ និងធ្វើកិច្ចសន្យានេះដែរ លោក ស៊ុយ សេរិទ្ធ អភិបាលរងរាជធានីភ្នំពេញ បានណែនាំដេប៉ូខ្សាច់ទាំងអស់ ក្នុងមូលដ្ឋានខណ្ឌមានជ័យ អោយអនុវត្តដូចខាងក្រោម ៖
*១. មិនត្រូវដឹកជញ្ជូនខ្សាច់ក្នុងចន្លោះម៉ោង ៦ និង០០នាទីព្រឹក រហូតដល់ ម៉ោង ១៩ និង០០នាទីយប់ ។

*២. ត្រូវទទួលខុសត្រូវក្នុងការបោសសម្អាតផ្លូវ លាងសម្អាតផ្លូវអោយបានស្អាតជារៀងរាល់ថ្ងៃ ជាពិសេសចាប់ពីម៉ោង ៧ និង០០ នាទីព្រឹកទៅត្រូវធានាអោយបានស្អាត ។

*៣. ត្រូវទទួលខុសត្រូវស្តារលូតាមតម្រាយផ្លូវដែលរថយន្តដឹកជញ្ជូនខ្សាច់របស់ខ្លួន រត់ឆ្លងកាត់អោយបានជាប្រចាំ ដោយធានាមិនអោយមានការកកស្ទះអាចម៌ដីនៅក្នុងប្រពន្ធលូឡើយ ។

*៤. ត្រូវទទួលខុសត្រូវជួសជុលជាបន្ទាន់ពីការដឹកជញ្ជូនដែលបណ្តាលអោយខូចខាតផ្លូវ និងប្រព័ន្ធលូ។

*៥. ត្រូវអនុវត្តអោយបានត្រឹមត្រូវតាមលក្ខខណ្ឌនានាដែលកំណត់ក្នុងលិខិតអនុញ្ញាតដឹកជញ្ជូនរបស់រដ្ឋបាលរាជធានីភ្នំពេញ សមត្ថកិច្ច ក្រសួង និងស្ថាប័នពាក់ព័ន្ធ ។

បន្ទាប់ពីក្រុមការងារ បានធ្វើការណែនាំរួចមក ម្ចាស់ដេប៉ូខ្សាច់ ទាំងអស់ បានធ្វើកិច្ចសន្យា ចំពោះមុខក្រុមការងារ ដូចតទៅ ៖
*១. មិនធ្វើការដឹកជញ្ជូនខ្សាច់ក្នុងចន្លោះម៉ោង ៦និង០០ នាទីព្រឹក រហូតដល់ ម៉ោង ១៩និង០០ នាទីយប់ ។

*២. ទទួលខុសត្រូវក្នុងការបោសសម្អាតផ្លូវ លាងសម្អាតផ្លូវអោយបានស្អាតជារៀងរាល់ថ្ងៃ ជាពិសេសចាប់ពីម៉ោង ៧និង០០ នាទីព្រឹកតទៅ ធានាក្នុងការលាងអោយបានស្អាត ។