ភ្នំពេញ៖ ដោយសារតែនៅជុំទី១កីឡាករ ធី តុងហ៊ី សិស្សលោក ឡុង សាលវ័ន្តត្រូវបានអ្នកប្រដាល់ថៃឈ្មោះTaharn Ekឆក់យក៣ពិន្ទុពីដៃក្នុងជុំទី១ទាំងមិនអស់ចិត្ត ដូច្នេះលើកនេះតុងហ៊ីចាំបាច់ដណ្តើម៣ពិន្ទុពីអ្នកប្រដាល់ឆេកឲ្យខាងតែបាន នាល្ងាចថ្ងៃសៅរិ៍ទី២ខែមេសាឆ្នាំ២០១៦ វគ្គជម្រុះដណ្ដើមពានរង្វាន់ជើងឯក «អធិរាជស៊ីម៉ងត៍អូដ្ឋ» វគ្គ៣ទម្ងន់៦៧គីឡូក្រាមជុំទី២ពូលAនៅសង្វៀនTV5។
គួររំលឹកថា សម្រាប់ការប្រកួតជុំទី២ពូល Aវគ្គវាយសន្សំពិន្ទុមានកីឡាករធី តុងហ៊ី មកពីក្លិបសាលវ័ន្តកីឡាប្រកួតជាមួយ កីឡាករ ឈ្មោះKevinnមកពីប្រទេសឆេកខណៈដែលកីឡាករ លួន សុខ ខេង មកពីក្លិបអាស៊ីកីឡា ប្រកួតជាមួយកីឡាករ Taharn Ek មកពីប្រទេសថៃ។
អ្នកប្រដាល់ជំនាញប្រើស្នៀតជង្គង់កែង ធី តុងហ៊ី មានប្រវត្តិប្រកួតចំនួន១០៥ដង ឈ្នះ៧៨លើក ចាញ់២៥លើក ស្មើ២លើក ហើយក៏ធ្លាប់វាយដៃគូឲ្យសន្លប់ចំនួន៥២ដងបានបង្ហាញពីក្តីសង្ឃឹមតាមរយៈការប្រើស្នៀតខាងនិងវាយយកឈ្នះKevinnឲ្យខាងតែបានសម្រាប់ជំនួបប្រកួតជុំទី២នេះ។ ដោយឡែកកីឡាករ Kevinn មានអាយុ២៣ឆ្នាំ កម្ពស់១,៧០ម៉ែត្រ មានប្រវត្តិប្រកួតចំនួន៧០ដង ឈ្នះ៤៥ដងចាញ់១២ដង ស្មើ៣ដងក្នុងនោះKevinn វាយផ្ដួលគូប្រកួតឲ្យសន្លប់បានចំនួន១៣ដង។
កីឡាករTaharn Ek ធ្លាប់វាយឈ្នះអ្នកប្រដាល់កម្ពុជា ច្រើននាក់ រួចមកហើយ ពិសេសប្រកួតចុងក្រោយ Taharn Ek យកឈ្នះធី តុងហ៊ីដោយពិន្ទុ។ Tahan Ekធ្លាប់ប្រកួតបានចំនួន៧៩ដងឈ្នះ៦៣ដង ចាញ់១៣ដងស្មើ៣ដងហើយក៏ធ្លាប់ផ្ដួលដៃគូឲ្យសន្លប់បានចំនួន១៧ដងផងដែរ។
រីឯកីឡាករ លួន សុខខេង មានវ័យ២៧ឆ្នាំកម្ពស់១,៧០ម៉ែត្រដែរធ្លាប់ប្រកួតចំនួន១១០ដង ឈ្នះ៨០ដងចាញ់២០ដងស្មើ១០ដងនិង វាយដៃគូឲ្យសន្លប់ចំនួន៤០ដង។ ដូច្នេះជំនួបប្រកួតរវាងលួន សុខ ខេង និងTaharn Ek អាចធ្វើឲ្យទស្សនិកជនជក់ចិត្តបានខណៈជុំទី១សុខខេង វាយផ្តួលឲ្យកីឡាករ Masel ឲ្យបោះបង់ក្នុងទឹកទី៤៕
ដោយ៖ សារីម
