ភ្នំពេញ ៖ បុរសម្នាក់ម្នាក់បើកម៉ូតូបត់ស្តាំខ្វះការប្រុងប្រយ័ត្នបណ្តាលឲ្យរថយន្តស៊េរីទំនើបដែលបើកពីក្រោយជ្រុលល្បឿនទៅបុកអូសគាបម៉ូតូជាប់ខាងក្រោមរថយន្ត រងការខូចខាតទាំងរថយន្ត និងម៉ូតូ។
ហេតុការណ៍នេះបានកើតឡើងកាលពីវេលាម៉ោង៥ និង០០នាទីល្ងាច ថ្ងៃទី៩ ខែកញ្ញា ឆ្នាំ២០២១ ស្ថិតនៅតាមបណ្តោយផ្លូវលេខ៦០៨ ត្រង់ចំណុចស្ថានីយប្រេងឥន្ទនៈ សូគីមិុច ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានប្រាប់ឱ្យដឹងថា មុនពេលកើតហេតុគេបានឃើញម៉ូតូមួយគ្រឿងម៉ាក SUZUKI nex ពណ៌ស លាយខៀវ ពាក់ស្លាកលេខ ក្រចេះ 1F-7164 បើកបរដោយបុរសម្នាក់ តាមបណ្តោយផ្លូវលេខ៦០៨ ក្នុងទិសដៅពីកើតទៅលិច ខណៈមកដល់ចំណុចកើតហេតុស្រាប់តែម៉ូតូបានបត់ស្តាំដើម្បីបត់ចូលស្ថានីយប្រេងឥន្ទនៈសូគីមិុច ដោយខ្វះការប្រុងប្រយ័ត្ន ពេលនោះស្រាប់តែមានរថយន្តស៊េរីទំនើបម៉ាកឡង់គ្រីស័រ ពណ៌ខ្មៅ ពាក់ស្លាកលេខភ្នំពេញ 2BI-8687 ដែលធ្វើដំណើស្របទិសដៅពីក្រោយម៉ូតូ បានជ្រុលល្បឿនទៅបុកម៉ូតូពេញទំហឹង អូសគាបនៅខាងក្រោមរថយន្តបណ្តាលឲ្យរងការខូចខាតទាំងម៉ូតូទាំងរថយន្ត តែមិនបណ្តាលឲ្យនរណាម្នាក់រងរបួសនោះទេ។
ក្រោយពេលកើតហេតុ កម្លាំងសមត្ថកិច្ចមូលដ្ឋានបានចុះមកដល់ចំណុចកើតហេតុ រួចធ្វើការសម្របសម្រួល ដោយភាគីខាងរថយន្តចេញថ្លៃការជុសជុលម៉ូតូដើម្បីបញ្ចប់រឿងនៅកន្លែងកើតហេតុតែម្តង៕ ដោយ រ៉ារ៉ា
