ខេត្តសៀមរាប៖ កម្លាំងសមត្ថកិច្ចនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្ត បានដាក់ពង្រាយកម្លាំង និងបង្ក្រាបបានរថយន្តស៊េរីទំនើបដឹកឈើផ្ទុកគ្រញូងមួយគ្រឿងប្រគល់ទៅឲ្យជំនាញរដ្ឋបាលព្រៃឈើចាត់ការបន្ត រីឯម្ចាស់ឈើដោះស្បែកជើងរត់គេចខ្លួនបាត់ស្រមោលឈឹង។
ហេតុការណ៍នេះធ្វើឡើងនៅរសៀលថ្ងៃទី៣០ ខែមីនា ឆ្នាំ២០១៦ នៅភូមិយាង ឃុំយាង ស្រុកពួក ខេត្តសៀមរាប ខណៈឈ្មួញដឹកជញ្ជូនចេញទៅកាន់ខេត្ដផ្សេង។
លោកឧត្តមសេនីយ៍ត្រីអ៊ុំអមារ៉ា ស្នងការរងនគរបាលខេត្តសៀមរាបបានឲ្យដឹងថា បន្ទាប់ពីទទួលបានដំណឹងពីបណ្ដាញនៅខេត្ដឧត្ដរមានជ័យ កម្លាំងរបស់លោកបានសុំគោលការណ៍ពីលោកស្នងការដើម្បីចុះបង្ក្រាបបានជាក់ស្តែងតែម្តង។ លោកបន្តថារថយន្តល្មើសនោះបានប្រឹងបើករត់ដែរតែរត់មិនរួចដោយសារកម្លាំងសមត្ថកិច្ចចាំស្ទាក់តាមប៉ុស្តិ៍និីមួយៗច្រើនហើយពេលជនល្មើសបើកដល់កន្លែងស្ងាត់ក៏រត់បាត់តែម្តង។ លោកបន្ថែមថា បច្ចុប្បន្ននេះលោកបានប្រគល់វត្ថុតាងទាំងនោះឲ្យទៅជំនាញរដ្ឋបាលព្រៃឈើចាត់ការបន្ត។
មន្ត្រីរដ្ឋបាលព្រៃឈើបានឲ្យដឹងថា សមត្ថកិច្ចបានឃាត់រថយន្ត០១គ្រឿងម៉ាកឡិចស៊ីស(Lexus) ពណ៌ខ្មៅ គ្មានស្លាកលេខដឹកជញ្ជូនឈើអារប្រណីត(គ្រញូង)នៅថ្ងៃទី៣០ខែមីនាឆ្នាំ២០១៦។ មន្ត្រីដដែលបន្តថា ឈើទាំងនោះមានចំនួន១៣១ដុំ ស្មើរនឹង៤១៥គូឡូក្រាម ស្មើនឹង០,៣៤៥ម៉ែត្រគូប។
មន្ត្រីដដែលបន្តថា ឈើគ្រញូងទាំងនោះកំពុងដឹកយកមករក្សាទុកនៅផ្នែករដ្ឋបាលព្រៃឈើក្រឡាញ់ដែលមានស្នាក់ការនៅស្រុកពួក រីឯរថយន្តឮថាខាងសមត្ថកិច្ចសុំទៅលោកព្រះរាជអាជ្ញាដើម្បីយកមកជិះក្នុងអង្គភាព។
សូមរំលឹកថា ឈើគ្រញូងកំពុងមានហាងឆេងទៀតហើយនៅខេត្តសៀមរាបខណៈដែលគេឃើញមានការបិទបានមួយដង្ហើមចង្រិតនោះ៕
ដោយ៖ ជានិរន្ដរ៍
