ភ្នំពេញ ៖ ហេតុការណ៍គ្រោះថ្នាក់ចរាចរណ៍មួយបង្កឡើងដោយសារតែបុរសជនជាតិចិនម្នាក់ ស្រវឹងស្រា បើករថយន្តឡិចស៊ីស RX300 មួយគ្រឿងក្នុងល្បឿនលឿន ហើយបានគេចពីម៉ូតូដែលធ្វើដំណើរបញ្ជ្រាស់គ្នា ក៏ជ្រុលទៅធ្លាក់ចុះទឹកប្រឡាយទឹកស្អុយតែម្តង។ ហេតុការណ៍នោះបានកើតឡើងកាលពីវេលាម៉ោង០០និង៥នាទី រំលងអធ្រាត្រ ឈានចូលថ្ងៃទី២១ ខែកក្កដា ឆ្នាំ២០១៥ នៅចំណុចមុខរោងចក្រហាយតា តាមបណ្តោយផ្លូវជាតិលេខ៤ ស្ថិតក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ ។ តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តឡិចស៊ីស RX300 មួយគ្រឿង ពណ៌ទឹកប្រាក់ បើកបរដោយបុរសជនជាតិចិនម្នាក់ ធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីកើតទៅលិចក្នុងល្បឿនលឿនទាំងស្ថានភាពស្រវឹងស្រា ខណៈមកដល់ចំណុចកើតហេតុ ក៏បានបើកគេចម៉ូតូមួយគ្រឿងទៀត ដែលធ្វើដំណើរបញ្ជ្រាស់ទិសគ្នា ហើយជ្រុលទៅធ្លាក់ចូលផឹកទឹកប្រឡាយ និងបុកស្ពានឈើបណ្តាលឲ្យរងការខូចខាត តែសំណាងល្អមិនបណ្តាលឲ្យរងរបួសនោះទេ។ សាក្សីដដែលបានបន្តថា បន្ទាប់ពីកើតហេតុម្ចាស់រថយន្តត្រូវបានប្រជាពលរដ្ឋគាស់ទ្វារថយន្តយកចេញមកក្រៅ ដោយមិនមានរងរបួសនោះទេគ្រាន់តែរងការខូចខាតរថយន្តបន្តិចបន្ទួចតែប៉ុណ្ណោះ ។ ក្រោយពេលកើតហេតុ ភាគីខាងម្ចាស់រថយន្ត បង្កបានចេញថ្លៃជួសជុលស្ពាន របស់ប្រជាពលរដ្ឋ ហើយសមត្ថកិច្ចបានប្រគល់រថយនត្តទៅឲ្យម្ចាស់ ស្ទូចយកទៅជួសជុលដោយខ្លួនឯង ៕ សុខា សែនជ័យ
