អន្តរជាតិ៖ បើយោងតាមសារព័ត៌មាន Eurasia review នៅថ្ងៃទី២៩ ខែកញ្ញា ឆ្នាំ២០២១នេះ បានចុះផ្សាយថា៖ តុលាការឥណ្ឌូនេស៊ី កាត់ទោសឱ្យប្រធានក្រុមនាវា MT Strovols ជនជាតិបង់ក្លាដេស ដែលបានដឹកប្រេងប្រមាណ៣០ម៉ឺនប៉ារ៉ែលពីកម្ពុជា ជាប់ពន្ធនាគារចំនួន១៥ថ្ងៃ និងពិន័យជាប្រាក់ ១០០លានរ៉ូពី ឬប្រមាណ៧ពាន់ដុល្លារ។
សារព័ត៌មាន Eurasia review បាននិយាយបន្ថែមថា ជនជាប់ចោទ ជាប្រធានក្រុមនាវា MT Strovols ជនជាតិបង់ក្លាដេស ត្រូវបានឃុំខ្លួនកាលពីសប្តាហ៍មុន ពីបទចូលចតនៅក្នុងដែនសមុទ្រឥណ្ឌូនេស៊ី ដោយគ្មានការអនុញ្ញាត។ ប្រសិនលោក មិនបង់ប្រាកផាកពិន័យនេះទេ លោកនឹងត្រូវជាប់ទោសបន្ថែម១ខែទៀត។
ក្រោយការឃុំខ្លួនប្រធានក្រុមនាវារូបនេះ ប៉ុន្មានថ្ងៃក្រោយមកអាជ្ញាធរទីក្រុងហ្សាកាតា បានឃុំខ្លួននាវិក១៩នាក់ទៀត ដើម្បីសាកសួរ ដែលជាការឆ្លើយតបនឹងសំណើររបស់កម្ពុជា ដែលបានចោទថា នាវា MT Strovols ដែលគ្រប់គ្រងដោយក្រុមហ៊ុន World Tankers Management ថាបានលួចប្រេង ទើបបូមបានពីកម្ពុជាប្រមាណជិត៣០ម៉ឺនប៉ារ៉ែល។
ដោយឡែកបេីតាមអ្នកនាំពាក្យប៉ូលីសនៃខេត្ត Riau Islands ប្រទេសឥណ្ឌូនេស៊ី លោក Harry Goldenhardt បានបញ្ជាក់ថា ក្រុមនាវិកទាំងនោះ ត្រូវបានសាកសួរដោយមន្រ្តីប៉ូលិសអន្តរជាតិ តាំងពីថ្ងៃសៅរ៍។ អ្នកនាំពាក្យរូបនេះ បានបញ្ជាក់ទៀតថា «ការសាកសួរ គឺផ្អែកតាមសំណើរបស់រដ្ឋាភិបាលកម្ពុជា និងលិខិតរបស់សាលាដំបូងរាជធានីភ្នំពេញ ដែលចង់ឱ្យចាប់ខ្លួនក្រុមនាវិក និងបញ្ជូននាវា និងនាវិកមកកម្ពុជាវិញ»។
គួររម្លឹកថា អាជ្ញាធរឥណ្ឌូនេស៊ី កាលពីចុងខែសីហាកន្លងមក បានឃាត់កប៉ាល់ដឹកប្រេងពីកម្ពុជា MT Strovols និងឃាត់ខ្លួនក្រុមនាវិកជាច្រើននាក់ បន្ទាប់ពីពួកគេបានលួចដឹកប្រេងឆៅ ដែលទើបបូមបានពីកម្ពុជាប្រមាណជិត៣០ម៉ឺនប៉ារ៉ែល។
នាវា MT Strovolos ត្រូវបានបញ្ជាដោយក្រុមហ៊ុន World Tankers Management Pte Ltd នៅល្ងាចថ្ងៃទី១៨ ខែមិថុនា ឆ្នាំ២០២១ ឲ្យចាកចេញពីកម្ពុជានៅម៉ោង៨៖០០ល្ងាច ទៅកាន់ដែនទឹកប្រទេសថៃឡង់ដ៏ ដោយយកប្រេងឆៅរបស់កម្ពុជា ទៅជាមួយផងដែរ។ ចំពោះការចាកចេញរបស់នាវា MT Strovolos ធ្វើឡើងដោយមិនបានឆ្លងកាត់នីតិវិធីប្រតិវេទន៍គយ និងដោយគ្មានការអនុញ្ញាតណាមួយ ពីសំណាក់អាជ្ញាធរកម្ពុជាឡើយ ដែលផ្ទុយនឹងច្បាប់កម្ពុជា។
ក្រសួងរ៉ែ និងថាមពល កាលពេលកន្លងទៅបានសុំជំនួយពីរដ្ឋាភិបាលឥណ្ឌូនេស៊ី ដើម្បីនាំខ្លួនជនល្មើសមកផ្តន្ទាទោស និង យកប្រេងឆៅដែលជាទ្រព្យសម្បត្តិរបស់កម្ពុជាមកវិញ ស្របតាមច្បាប់ជាតិរបស់ប្រទេសទាំងពីរ និងច្បាប់អន្តរជាតិ ដោយសារតែក្រោយពីនាវានេះ បានចាកចេញពីកម្ពុជា មិនដែលបានបង្ហាញឆន្ទៈក្នុងការវិលត្រឡប់ ឬដឹកប្រេងមកកម្ពុជាវិញឡើយ។
គួរបញ្ជាក់ថា KrisEnergy ដែលជាក្រុមហ៊ុនទទួលបានសិទ្ធិរុករក និងបូមប្រេងនៅប្លុក A ក្នុងដែនសមុទ្រកម្ពុជា បានចាប់ផ្តើមបូមប្រេងជាលើកដំបូងកាលពីថ្ងៃទី២៩ ខែធ្នូ ឆ្នាំ២០២០។ នៅខែមិថុនា ឆ្នាំ២០២១នេះ ក្រុមហ៊ុននេះប្រកាសថា ខ្លួនមានបំណុលជាច្រើន ដែលមិនអាចមានលទ្ធភាពសងនោះឡេីយ៕ដោយ៖ស តារា
រូបភាព៖ឯកសារ
