ខេត្តបន្ទាយមានជ័យ៖ បេីយោងតាមការបញ្ជាក់ពីលោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ នៅព្រឹកថ្ងៃព្រហស្បតិ៍ទី៣០ ខែកញ្ញា ឆ្នាំ២០២១នេះ បានឱ្យដឹងថា លោក បានចុះពិនិត្យមើលស្ថានភាពទឹកនៅផ្នែកខាងក្រោមនៃស្រុកមង្គលបូរី មានឃុំគយមែង ឃុំតាឡំ ជាប់ទៅនឹងផ្ទៃទឹកទន្លេសាបតាមស្ទឹងមង្គលបូរី។
លោកអភិបាលខេត្ត បានបញ្ជាក់បន្ថែមថា ជាក់ស្ដែងនៅក្នុងថ្ងៃទី៣០ ខែកញ្ញានេះ ឃើញថាស្ថានភាពទឹកផ្នែកខាងលើមានឃុំឬស្សីក្រោក ឃុំបត់ត្រង់ ស្ថានភាពទឹកមានការចាសឡើងហៀចេញពីមាត់ស្ទឹងធ្វើឲ្យលិចចូលក្រោមផ្ទះប្រជាពលរដ្ឋ លិចកំណាត់ផ្លូវមួយចំនួន ដោយឡែកនៅផ្នែកខាងក្រោមស្ថានភាព នៅមិនទាន់ពេញស្ទឹងនៅឡើយ នៅកម្ពស់ជិត ១ម៉ែត្រ ទៅ២ម៉ែត្រទៀត ។
ដូច្នេះក្នុងនាមអាជ្ញាធរខេត្ត បានពិនិត្យដោះស្រាយជាប់ ដើម្បីបើកកាយបង្ហូរមុខទឹកឲ្យទឹកស្រុងចុះទៅផ្នែកខាងក្រោមឱ្យបានឆាប់ កាត់បន្ថយការជន់លិចដល់ផ្ទះបងប្អូនប្រជាពលរដ្ឋ។
ដោយឡែករយៈពេល៤ថ្ងៃមកនេះ ក្នុងក្របខណ្ឌ័ទូទាំងខេត្ត អាកាសធាតុក៏មិនមានភ្លៀងធ្លាក់ ដូច្នេះស្ថានភាពទឹកផ្នែកខាងលើ មានស្រុកម៉ាឡៃ អូរជ្រៅ និងក្រុងប៉ោយប៉ែត ស្ថានភាពស្រកខ្លាំងតាមអូរព្រំដែនជាដើម៕
ដោយ៖សហការី
