ខេត្តពោធិ៍សាត់៖ តាមសេចក្តីរាយការណ៍ពីប្រជាពលរដ្ឋនៅឃុំរកាត និងឃុំសន្រ្ទែ ស្រុកភ្នំក្រវាញបានឲ្យដឹងថា ឈើអារជ្រុងប្រភេទប្រណិតធ្នង់កំពុងសម្រុកដឹកតាមរទេះ គោយន្តនិងរថយន្តកែច្នៃ ដោយសារថៅកែជំនួញឈើចេះសហការជាមួយអ្នកមានឥទ្ធិពលបានល្អ។
ប្រភពខាងលើបន្តថាប៉ុន្មានថ្ងៃចុងក្រោយនេះ គេសង្កេតឃើញការដឹកជញ្ជូនឈើអារជ្រុងប្រភេទប្រណិតធ្នង់តាមរយៈរទេះគោ ឬក្របី គោយន្តនិងរថយន្តកែច្នៃ ចេញពីចំណុចព្រៃភ្នំគ្រនម ដោយគេទិញក្នុងតម្លៃក្នុងចន្លោះពី 450$ ទៅ 500$ ឆ្លងកាត់ចំណុចពាមប្រកយ៉ាងគគ្រឹកគគ្រេងទាំងថ្ងៃ ទាំងយប់យ៉ាងអនាធិបតេយ្យ ដោយគ្មានការបង្រ្កាប ខណៈថៅកែជាឈ្មួញជំនួញរកស៊ីឈើកំពុងមានឥទ្ធិពល និងសហការជាមួយអ្នកមានអំណាច ធ្វើឲ្យមន្រ្តីជំនាញរឺស្ថាប័នពាក់ព័ន្ធសម្ងំយកលាភ។
ប្រភពដដែលអះអាងបន្តទៀតថាៈ ផលអនុផលព្រៃឈើដែលគេអារជ្រុងប្រភេទប្រណិតធ្នង់ដឹកចេញពីចំណុចខាងលើនោះ គេយកមកស្តុកទុកតាមផ្ទះក្នុងភូមិនានានៃឃុំខាងលើ រួចទើបឈ្មួញកណ្ដាលប៉ុន្មាននាក់នៅក្នុងស្រុកភ្នំក្រវាញ ដែលសុទ្ធសឹងជាមន្រ្តីកងកម្លាំងប្រដាប់អាវុធទិញស័ក្តិយសពាក់ដើម្បីរបរខាងលើនេះ បានប្រមូលទិញក្នុងចន្លោះតំលៃ ១ម៉ែត្រគូប 650$ ទៅ 700$ យកទៅលក់បន្ត ដោយដឹកតាមរថយន្តកែច្នៃ ឬ រថយន្តយីឌុបបង្កប់អុសពីលើ។
ប្រភពបញ្ជាក់ទៀតថាៈ ឈើដែលគេដឹកចេញពីស្រុកភ្នំក្រវាញ តាមរយៈរថយន្តធំៗ ដោយគ្មានការទប់ស្កាត់ខាងលើគឺដឹកនៅពេលយប់ៗកាត់តាមផ្លូវការដ្ឋានចិនឆ្លងកាត់តាមភូមិសាយ ឆ្ពោះទៅស្រុកក្រគរហើយបន្តទៅរាជធានីភ្នំពេញ យ៉ាងរលូនដោយគ្មានសមត្តកិច្ចប៉ះពាល់សូម្បីតែបន្តិច។
ករណីខាងលើនេះគេឮគេឃើញមន្រ្តីជំនាញ ឬ ស្ថាប័នពាក់ព័ន្ធបានត្រឹមដកដង្ហើមធំ គ្មាននរណាម្នាក់ហ៊ានក្អកឡើយ ប៉ុន្តែគេនៅឃើញមានសមត្តកិច្ចទើបផ្លាស់ផ្តូរមកថ្មីៗធ្លាប់ធ្វើការបង្រ្កាបដែរ តែជួបការអន្តរាគមន៍ពីអ្នកមានឥទ្ធិពលដូចគ្នា ក្រោយមកបានស្ងាត់ជ្រងំទៅវិញដូចៗគ្នា ដូច្នេះសូមខាងសមត្ថកិច្ចអធិការកិច្ចសាកល្បងចុះស្រាវជ្រាវបន្តិចមើលយ៉ាងម៉ិចដែរ៕
ដោយ៖ ប៉ឹម ពិន
