ខេត្តកំពង់ចាម ៖ បុរសម្នាក់បានស្លាប់នៅនឹងកន្លែងភ្លាម ក្នុងឧប្បត្តិហេតុគ្រោះថ្នាក់ចរាចរណ៍រវាងម៉ូតូនិងរថយន្ត ហេតុការណ៍នេះកើតឡើងនៅវេលាម៉ោង ១៤:៤២នាទី ថ្ងៃទី ១៨ខែតុលា ឆ្នាំ២០២១នៅចំណុច លើ ផ្លូវខាងកើតសាលាកសិកម្ម ស្ថិតក្នុងភូមិទី ៦ សង្កាត់ វាលវង់ ក្រុងកំពង់ចាម ខេត្តកំពង់ចាម ។

តាមប្រភពពីសមត្ថកិច្ចនគរបាលបានឱ្យដឹងថា ជនរងគ្រោះស្លាប់មានឈ្មោះ ជុំ ចាន់ថន ភេទប្រុសអាយុ ៣១ឆ្នាំ ជាតិខ្មែរ នៅភូមិកំពង់ រលីង សង្កាត់សំបូរមាស ក្រុង កំពង់ចាម ខេត្តកំពង់ចាម បើកបរម៉ូតូ ម៉ាកហុងដាសេ125 ពណ៌ខ្មៅ ពាក់ផ្លាកលេខ កំពង់ចាម1T 2980 ទិសដៅពីត្បូងទៅជើង (ពាក់មួកសុវត្ថិភាព) បានទៅបុកប៉ះ ជាមួយនឹងរថយន្ត១គ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ត្បូងឃ្មុំ3A-2228 បើកបរ ដោយឈ្មោះ រិន ឆៃ ភេទប្រុស អាយុ ២៨ឆ្នាំ ជាតិខ្មែរ នៅភូមិថ្មី ឃុំក្រឡា ស្រុក កំពង់សៀម ខេតកំពង់ចាម ទិសដៅពីជើងទៅត្បូង។ ករណីនេះបណ្តាល ស្លាប់ មនុស្ស ប្រុសម្នាក់ (អ្នកបើកបរម៉ូតូ) នៅកន្លែងកើតហេតុ ខូចខាត ម៉ូតូ ០១គ្រឿង កម្រិតធ្ងន់ និង រថយន្ត០១គ្រឿងកម្រិតស្រាល ។

សមត្ថកិច្ចនគរបាលបានឱ្យដឹងបន្តថា ក្រោយពេលកើតហេតុ ផ្នែកជំនាញបានយក វត្ថុតាង ទាំង០២គ្រឿង មករក្សាទុក បណ្តោះអាសន្ន នៅអធិការដ្ឋាន នគរបាលក្រុងកំពង់ចាមនិង ឃាត់ខ្លួន អ្នកបើកបរ រថយន្តឈ្មោះ រិន ឆៃ ទៅអធិការដ្ឋាននគរបាលក្រុង កំពង់ចាម ហើយបាន យក សំណាក កូវីដ ១៩ ធ្វើតេស្ត គ្រឿង ស្រវឹង និងសារធាតុ ញៀន លទ្ធផល អវិជ្ជមានទាំងពីរ៕ ដោយ វណ្ណៈ