កាលពីព្រឹកថ្ងៃទី២១ ខែកក្កដា ក្រសួងការពារជាតិអាហ្វហ្គានីស្ថានបានប្រកាសថា កាលពីថ្ងៃទី២០ ខែកក្កដា ក្រុមឧទ្ទាមលីបង់៨នាក់ត្រូវបានសម្លាប់ និងទាហានម្នាក់បានបាត់បង់ជីវិត នៅក្នុងសកម្មភាពវាយឆ្មក់ស្ថិតនៅភាគខាងជើង តំបន់ Kunduz និងតំបន់ភាគខាងកើតតំបន់ប៉ាទីកា និងខេត្ត Nangarhar ក្នុងរយៈពេល២៤ម៉ោង។ សេចក្តីប្រកាសព័ត៌មានក្រសួងការពារជាតិបានបន្តថា ក្រុមឧទ្ទាម១២នាក់ រួមមានមេដឹកនាំក្រុមឧទ្ទាមប្រចាំតំបន់ ឈ្មោះ Safi Ullah ផងដែរបានរងរបួសធ្ងន់ និង៣នាក់ផ្សេងទៀតត្រូវបានចាប់ខ្លួនផ្តន្ទាទោសឲ្យជាប់ឃុំនៅក្នុងពន្ធនាគារ។ ប្រភពបញ្ជាក់ថា ក្នុងអំឡុងពេលជាមួយគ្នានេះដែរ ទាហានរដ្ឋាភិបាលម្នាក់បានទទួលរងគ្រោះថ្នាក់ដល់អាយុជីវិត។ ប្រភពបន្តថា ក្រុមជំនាញរបស់កម្លាំងទាហានអាហ្វហ្គានីស្ថានបានបំផ្លាញ និងរកឃើញទីតាំងបង្កប់គ្រាប់បែកនៅតាមដងផ្លូវ១៧កន្លែងរបស់ក្រុមឧទ្ទាម ហើយបានកម្ទេច និងបំផ្លាញវាចោលទាំងអស់។ អំពើហិង្សាបង្កឡើងដោយក្រុមឧទ្ទាមលីបង់នៅក្នុងទឹកដីអាហ្វហ្គានីស្ថានគឺនៅតែបន្តកើតមានឡើងជារៀងដរាបមក ។ កងកម្លាំងសន្តិសុខរបស់រដ្ឋាភិបាលអាហ្វហ្គានីស្ថានបានផ្តោតប្រតិបត្តិការយ៉ាងសំខាន់ក្នុងការបោសសម្អាតក្រុមឧទ្ទាមទាំងនេះឲ្យផុតរលត់អស់ពីទឹកដីអាហ្វហ្គានីស្ថាន និងដាក់ជំនួសដោយកងកម្លាំងសន្តិសុខយាមកាមការពារសុវត្ថិភាពជូនពលរដ្ឋ បន្ទាប់ពីប្រទេសនេះត្រូវកងទ័ពអង្គការណាបញ្ចប់បេសកកម្ម និងដកចេញទៅកាន់ប្រទេសរៀងខ្លួន ហើយទុកឲ្យកងសន្តិសុខរដ្ឋាភិបាលជាអ្នករ៉ាប់រងសន្តិសុខប្រឈមជាមួយក្រុមឧទ្ទាមលីបង់នោះ។ ក្រុមឧទ្ទាមលីបង់ ជានិច្ចកាលតែងតែធ្វើការឆ្លើយតបជាមួយកម្លាំងទាហានដោយការបំផ្ទុះគ្រាប់បែក និងការបាញ់ប្រហារ បង្កអសន្តិសុខជាខ្លាំង។ កាលពីដើមសប្តាហ៍នេះ សមាជិកគណៈកម្មការដើម្បីសន្តិភាពប្រចាំភាគខាងកើតខេត្ត Wardak បានទទួលរងគ្រោះដោយការបាញ់ប្រហារពីខ្មាន់កាំភ្លើង ខណៈដែលកំពុងមានវត្តមាននៅភាគខាងលិចទីក្រុងកាប៊ូល អាហ្វហ្គានីស្ថាន។ នេះបើតាមការបញ្ជាក់ប្រាប់ពីប៉ូលិសក្នុងទីក្រុងកាប៊ូលកាលពីថ្ងៃទី២១ ខែកក្កដា ៕
