ប៉ោយប៉ែត ៖ បុរសជាជាងភ្លើងម្នាក់ត្រូវបានចរន្តអគ្គិសនីឆក់ បណ្ដាលឲ្យរងរបួសរលាកខ្លោចទ្រូង និងខ្លួនប្រាណស្ទើរតែបាត់បង់ជីវិត ខណៈដាក់ជណ្ដើរឡើងតខ្សែភ្លើងប៉ះខ្សែភ្លើងស្រាត។
ហេតុការណ៍នេះបង្កការភ្ញាក់ផ្អើលនៅវេលាម៉ោង២រសៀល ថ្ងៃទី២១ ខែកក្កដា ឆ្នាំ២០១៥ ស្ថិតក្នុងភូមិបាលិលេយ្យ សង្កាត់-ក្រុងប៉ោយប៉ែត ខេត្តបន្ទាយមានជ័យ។
បច្ចុប្បន្នជនរងគ្រោះពុំទាន់ត្រូវបានគេស្គាល់ឈ្មោះនៅឡើយទេ ព្រោះប្រជាពលរដ្ឋកំពុងសង្រ្គោះបឋម។ ប៉ុន្តែប្រភពពីកន្លែងកើតហេតុបានឲ្យដឹងថា មុនពេលកើតហេតុបុរសជាជាងភ្លើងបានទៅតចរន្តអគ្គិសនីនៅផ្ទះមួយ ក្នុងភូមិកើតហេតុខាងលើ ហើយនៅពេលដាក់ជណ្ដើរតខ្សែភ្លើង ជណ្ដើរនោះក៏ប៉ះនឹងខ្សែភ្លើងដែលរលួយស្រោមនៅតែសាច់ទង់ដែង ដែលចរន្តភ្លើងកំពុងឆ្លងកាត់ទើបបណ្ដាលឲ្យឆ្លងចរន្តឆក់រលាកពេញខ្លួនជនរងគ្រោះតែម្ដង។
ក្រោយពីឃើញសភាពបែបនេះ ប្រជាពលរដ្ឋដែលរស់នៅក្បែរនោះក៏យកជនរងគ្រោះទៅកប់ដីខ្សាច់ ដែលមានចម្ងាយប្រមាណ៥០ម៉ែត្រពីផ្ទះកើតហេតុ និងធ្វើចលនាឃើញថា នៅមានដង្ហើមតឹកៗនៅឡើយ ប៉ុន្តែហាក់សង្ឃឹមរស់តិចណាស់ ដោយសារតែត្រូវរបួសរលាកពេញរាងកាយទៅហើយ៕ វណ្ណា
