រដ្ឋាភិបាលចិន បានសម្រេចសាងសង់បង្គន់អនាម័យសាធារណៈមានលក្ខណៈអន្តរជាតិ ដើម្បីទាក់ទាញភ្ញៀវទេសចរណ៍ដែលត្រូវចំណាយប្រាក់រហូតដល់ទៅ​1,92ពាន់លានដុល្លារ ។

បង្គន់អនាម័យសាធារណៈ មានបំពាក់អិនធឺណែត និងម៉ាស៊ីនដកប្រាក់ ATM ងាយស្រួលដល់ភ្ញៀវទេស​ចរណ៍អាចដកប្រាក់បានគ្រប់ទីកន្លែង។

សារព័ត៌មាន Straits Times បានផ្សាយថា គម្រោងខាងលើ គឺត្រូវសាងសង់បង្គន់រហូតដល់ទៅ ២៥០០០ កន្លែងនៅទីសាធារណៈទូទាំងប្រទេសចិន ហើយការសាងសង់ឲ្យរួចរាល់នៅក្នុងឆ្នាំ​២០១៦នេះ។

គម្រោងវិនិយោគខាងលើ ស្ថិតនៅក្នុងយុទ្ធនាការ«​បដិវត្តន៍បង្គន់អនាម័យ» ដើម្បីបង្កើនប្រព័ន្ធបង្គ​ន់អនា​ម័យសាធារណៈ តាមស្តង់ដារអន្តរជាតិ ស្របទៅតាមប្រទេសដែលមានពលរដ្ឋច្រើនបំផុតនៅលើពិភពលោក។

តាមក្រសួងទេសចរណ៍ចិនបានប្រកាសថា​ការដែលរដ្ឋាភិបាលទីក្រុងប៉េកាំងសម្រេចចំណាយប្រាក់យ៉ាងច្រើនទៅលើវិស័យខាងលើមានន័យថា ចិនបានផ្តោតសំខាន់លើ​វិស័យទេសចរណ៍ ដែលជាឧស្សាហកម្មគ្មានផ្សេង អាចជួយបង្កើនកំណើនសេដ្ឋកិច្ចប្រទេសជាតិបានយ៉ាងល្អ។

បង្គន់អនាម័យដែលមានលក្ខណៈស្តង់ដារអន្តរជាតិនោះគឺមានប្រព័ន្ធសន្សំសំចៃភ្លើង ទឹក និងប្រព័ន្ធទប់ស្កាត់ក្លិនចេញមកក្រៅទៀតផង។ ប៉ុន្តែ គម្រោងខាងលើក៏ប្រឈមមុខនៅបញ្ហាជាច្រើន​ដូចជា ការចំណាយប្រាក់មិនទាន់គ្រាប់គ្រាន់និង ក្រុមហ៊ុនសេវាកម្មសាធារណៈ ខ្វះការសហការជាមួយមន្ត្រីក្នុង​តំបន់។ មួយវិញទៀតគឺត្រូវកំណត់ច្បាប់តឹងតែងដើម្បីកុំឲ្យប្រជាពលរដ្ឋទៅបន្ទោរបង់នៅកន្លែងសាធារណផ្សេង ធ្វើឲ្យប៉ះពាល់ដល់បរិយាកាសរស់នៅ។

ចិនគឺជាប្រទេសមហាអំណាចសេដ្ឋកិច្ចទី១នៅលើពិភពលោក ដូច្នេះការបង្កើនសាងសង់បង្គន់អនាម័យសាធារណៈគឺជារឿងដ៏សំខាន់បំផុត សម្រាប់ទាក់ទាញភ្ញៀវទេសចរណ៍ និងទប់ស្កាត់ការទៅបន្ទោរបង់​នៅតាមតំបន់ស្ងាត់ៗខូចបរិស្ថាន និងប៉ះពល់ដល់ភ្ញៀវទេសចរណ៍៕​

ប្រែសម្រួល៖​ ម៉ែវ​ សាធី