ខេត្តបន្ទាយមានជ័យ៖ បើតាមការបញ្ជាក់ពីប្រធានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប. ឬ CCF) សាខាខេត្តបន្ទាយមានជ័យ លោក សាន វិជ្ជាសារ៉ាវុធ បានថ្លែងឱ្យដឹងនៅថ្ងៃទី១៣ ខែវិច្ឆិកា ឆ្នាំ២០២១នេះថា៖ មន្ត្រីចម្រុះ បានសហការគ្នាចុះត្រួតពិនិត្យ និងដកហូតអាល់កុលក្លែងក្លាយ (មេតាណុល) មួយចំនួន ស្ថិតនៅភូមិកូបធំ និងភូមិកូនដំរី សង្កាត់និមិត្ត ខេត្តបន្ទាយមានជ័យ បន្ទាប់ពីមន្ទីរពិសោធន៍តូច របស់ ក.ប.ប. នៅក្រុងប៉ោយប៉ែត បានចេញលទ្ធផលថា អាល់កុលដែលបង្កពុលដល់ពលករ ២៥នាក់ នៅមណ្ឌលចត្តាឡីស័កកូបធំ កាលពីម្សិលមិញនេះ បណ្ដាលឱ្យ ៧នាក់ស្លាប់ ព្រោះវាគឺមេតាណុល ឬអាល់កុលក្លែងក្លាយ។
ប្រភពដដែលបន្តថា មន្ត្រីសាខា ក.ប.ប. ខេត្តបន្ទាយមានជ័យ សហការជាមួយមន្ត្រីមន្ទីរពាណិជ្ជកម្មខេត្ត លោក ប៊ុក ឡាយជី ប្រធានមន្ទីររដ្ឋបាលក្រុងប៉ោយប៉ែត និងលោក ហឿន វីរ: អភិបាលរងក្រុង ដឹកនាំកម្លាំងនគរបាលក្រុង និងកម្លាំងប៉ុស្តិ៍ រដ្ឋបាលសង្កាត់និមិត្ត បានចុះត្រួតពិនិត្យ និងដកហូតអាល់កុលក្លែងក្លាយ (មេតាណុល) នៅ ចំណុចភូមិកូនដំរី ភូមិកូបធំ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។
មន្រ្តីជំនាញ បានបន្តថា ដើម្បីឆ្លើយតបនឹងករណីស្លាប់មនុស្ស ចំនួន ៧នាក់ (ស្រី១នាក់) បណ្តាលមកពីការយកអាល់កុលក្លែងក្លាយ (មេតាណុល) ទៅលាយផ្សំជាមួយភេសជ្ជៈស្ទីង និងតែបៃតង អូអិឈិ ជំនួសសុរា លក់ឱ្យពលករនៅមណ្ឌលចត្តាឡីស័ក្ត កូបធំផឹក។
ជាមួយគ្នានេះ អាជ្ញាធរមានសមត្ថកិច្ច បានពន្យល់ណែនាំដល់អាជីវករ លក់អាល់កុល និងដកហូតផលិតផល ខូចគុណភាព និងហួសកាលបរិច្ឆេទប្រើប្រាស់មានដូចជា៖
-អាល់កុលក្លែងក្លាយ ១៨៦ ដប និង ១ ពីដុង ស្មើនឹង ១២៣ លីត្រ។
-មីម៉ាម៉ា ៩៣ កំប៉ុង ស្មើនឹង ០,៥៦ គ.ក្រ។
-នំសូកូឡា ១២ កញ្ចប់ ស្មើនឹង ០,១៣ គ.ក្រ។
-ទឹកក្រូចចម្រុះ ៣៦ ដប ស្មើនឹង ៥៧,៦០ គ.ក្រ។
-ទឹកដោះគោខាប់ ១០ កំប៉ុង ស្មើនឹង ៣,៨០ គ.ក្រ។
-ទឹកម្ទេស តូច-ធំ ២៥ ដប ស្មើនឹង ១១,១៥ គ,ក្រ។
-ស្ករគ្រាប់ចម្រុះ ១,២ គ.ក្រ ។ សរុបចំនួន ១៧៧ រាយ ស្មើនឹង ៧៤,៤៤ គីឡូក្រាម។
បន្ថែមពីនេះ ក្រុមការងារ បានពន្យល់ណែនាំដល់ អាជីវករទាំងអស់ ឱ្យចេះមើលអាយុកាលផុតកំណត់ ការតាំងលក់ ផលិតផលទំនិញគ្រប់ ប្រភេទ និងខ្លឹមសារ នៃប្រកាសរបស់ ក្រសួងពាណិជ្ជកម្ម លេខ១៨៥ ស្តីពីបទដ្ឋានពត៌មាន សម្រាប់អ្នកប្រើប្រាស់ ពោលគឺ ដើម្បីឱ្យអាជីវករទាំងនោះ ធ្វើការកែប្រែ ស្របតាមពេល វេលាមួយ ដែលអាចទទួលយកបានដោយអនុលោមតាមច្បាប់ ស្តីពីកិច្ចការពារអ្នកប្រើប្រាស់។ មិនតែប៉ុណ្ណោះ មន្រ្តីជំនាញ បានធ្វើការពិន័យអន្តរការណ៍លើម្ចាស់ទំនិញល្មើសមួយទីតាំង ឱ្យបង់ប្រាក់ ពិន័យអន្តរការណ៍ ដោយសរសេរប័ណ្ណបង់ប្រាក់ផាកពិន័យចំនួន មួយច្បាប់នៅនឹងកន្លែងផងដែរ៕ដោយ៖សហការី
