ភ្នំពេញ ៖ បុរសម្នាក់បានរងរបួសធ្ងន់បន្ទាប់ពីបានជួបហេតុការគ្រោះថ្នាក់ចរាចរណ៍មួយ រវាងរថយន្ដនិងម៉ូតូរឺម៉កម៉ូតូ កាលពីវេលាម៉ោង ១២និង៣០នាទី ថ្ងៃទី០១ ខែកក្កដា ឆ្នាំ២០១៥ លើកំណាត់ផ្លូវជាតិលេខ៥ ខាងលិចអធិការដ្ឋាននគរបាលខណ្ឌឫស្សីកែវប្រហែល៥០មែត្រ ស្ថតិក្នុងភូមិក សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ ។
ជនរងគ្រោះឈ្មោះគង់ ម៉ៅ ភេទប្រុស អាយុ៥៣ឆ្នាំ មុខរបរត់ម៉ូតូរ៉ឺម៉ក ស្នាក់នៅក្រុម៣ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ មានស្រុកកំណើតនៅភូមិក្រសាំង ឃុំក្រសាំង ស្រុកស្វាយទាបខេត្តស្វាយរៀង។ ចំណែកតៃកុងរថយន្ដមានឈ្មោះផាន្នី អាយុ៣៤ឆ្នាំ ស្នាក់នៅផ្ទះលេខ១០០Bក្រុម ៣ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញរថយន្ដម៉ាកទីតាន់ជិះគ្នា៣នាក់ដឹកឈើមួយគ្រឿងពណ៌ស ពាក់ស្លាកលេខព,០៥៧១ ភព២ ទិសដៅពីលិចទៅកើតក្នុងល្បឿនមធ្យម។ លុះមកដល់ចំណុចកើតហេតុ ក៏មានម៉ូតូ១គ្រឿងទៀតបានឆ្លងកាត់ទទឹងផ្លូវ ភ្លាមនោះរថយន្ដក៏បានជាន់ហ្វ្រាំងដោយបង្ខំដោយខ្លាចបុកម៉ូតូដែលឆ្លងកាត់ទទឹងផ្លូវភ្លាមនោះ ស្រាប់តែមានម៉ូតូរឺម៉ករ៉ឺម៉ក១គ្រឿងទៀត ពណ៌ផ្ទៃមេឃពាក់ស្លាកលេខភ្នំពេញ១AM៦១៥០បើកបរដោយបុរសរងគ្រោះខាងលើ ដោយជាន់ហ្វ្រាំងមិនទាន់បានបុកចំពីក្រោយរថយន្ដពេញទំហឹងបណ្ដាលឲ្យអ្នកបើកបរម៉ូតូរឺម៉កកង់បីខ្ទាតចេញពីម៉ូតូរងរបួសចំក្បាលពោះនិងឆ្អឹងខ្នងយ៉ាងធ្ងន់ធ្ងរ។ ភ្លាមនោះរថយន្ដខាងលើបានព្យាយាមបើករត់ប៉ុន្តែត្រូវបានសមត្ថកិច្ចនគរបាលខណ្ឌឫស្សីកែវដេញស្ទាក់ចាប់បានទាំងអ្នកបើកប រនិងរថយន្ដយកមករក្សាទុកនៅប៉ុស្ដិ៍ច្រាំងចំរេះ២ ដើម្បីរង់ចាំការដោះស្រាយនៅពេលក្រោយ រួមទាំងម៉ូតូរឺម៉កកង់បីរបស់ជនរងគ្រោះផងដែរ ៕
