ភ្នំពេញ៖ ទីបំផុតពេលវេលាដែលកីឡាករ ពេជ្រ ម្ទេសខ្មាំង មកពីក្លិបអរុណរះកីឡា និងកីឡាករ ឡូញ វ៉ាន់ឌីមកពីក្លិបពន្លឺវិបុលពោធិ៍សែនជ័យឈានដល់ថ្ងៃរំភើបរីករាយហើយៗក៏ជាថ្ងៃមួយសម្រេចជោគជីតារាសី ក្នុងដំណើរឆ្ពោះទៅគ្រប់គ្រងតំណែងម្ចាស់ជើងឯកពានរង្វាន់ TIFFY SUPER FIGHT ទម្ងន់៥៧គីឡូក្រាម នាល្ងាចថ្ងៃទី១០ ខែមេសា ឆ្នាំ២០១៦ខាងមុខនេះគឺប្រកួតវគ្គផ្ដាច់ព្រ័ត្រ។
កីឡាករ ពេជ្រ ម្ទេសខ្មាំង ត្រូវបានទស្សនិកជនសង្ឃឹមស្ទើរ១០០ភាគរយថា អាចគ្រងតំណែងពានរង្វាន់ TIFFY SUPER FIGHT ទម្ងន់៥៧គីឡូក្រាមបានដោយងាយស្រួល ដោយសារតែការប្រកួតក្នុងតាំងពីជុំទី១ រហូតដល់វគ្គពាក់កណ្តាលផ្តាច់ព្រ័ត្រ ម្ទេសខ្មាំងសុទ្ធតែវាយឲ្យដៃគូ សន្លប់និងចាញ់ដោយពិន្ទុ។ ក្នុងវគ្គជម្រុះកន្លងទៅចំនួន៤ដំណាក់កាលនោះ ម្ទេសខ្មាំងបានវាយឈ្នះទាំង៤ប្រកួតគឺទី១-វាយឈ្នះ កីឡាករ គឿន សុខហេង ក្លិបមកុដរាជសីហ៍ក្នុងទឹកទី២ ទី២-វាយឈ្នះ កីឡាករ គុណ សំណង ក្លិបគីសែមានប្ញទ្ធិក្នុងទឹកទី២ ទី៣-វាយឈ្នះ កីឡាករ បឺត សង្ឃឹម ក្លិបរ៉ាហាប់ស្វាយប៉ាក់ដោយពិន្ទុ និងលើក ទី៤-ប្រកួtវគ្គពាក់កណ្ដាលផ្តាច់ព្រ័ត្រម្ទេសខ្មាំងវាយឈ្នះកីឡាករយិន បូរិន ក្លិបអាស៊ីកីឡាដោយពិន្ទុ។
ចំណែកឯកីឡាករ ឡូញ វ៉ាន់ឌី ធ្លាប់វាយឈ្នះចំនួន៤ដំណាក់កាលដូចពេជ្រ ម្ទេសខ្មាំងដែរក្នុងនោះប្រកួតលើកទី១-វ៉ាន់ឌី វាយឈ្នះ នួន ភីរក្ស ក្លិបតាព្រហ្មមានជ័យដោយពិន្ទុ ទី២-វាយឈ្នះរស់ វិបុល ក្លិប សាលវ័ន្តកីឡាដោយពិន្ទុ ទី៣-វាយឈ្នះ ផាន ផាត់យុទ្ធ ក្លិបសាលវ័ន្តកីឡាដោយពិន្ទុ និងទី៤-ប្រកួតវគ្គពាក់កណ្ដាលផ្តាច់ព្រ័ត្រវាយឈ្នះ កីឡាករចាន់ គង់រាជក្លិបតាព្រហ្មមានជ័យដោយពិន្ទុ។
ចំពោះ កីឡាករយិន បូរិន មកពីក្លិបអាស៊ីកីឡាវិញត្រូវប្រកួតដណ្ដើមចំណាត់ថ្នាក់លេខ៣ជាមួយកីឡាករ ចាន់ គង់រាជមកពីក្លិបតាព្រហ្មមានជ័យ។
គួររំលឹកថា សម្រាប់ប្រាក់រង្វាន់សម្រាប់អ្នកដែលទទួលបានជាម្ចាស់ជើងឯកពានរង្វាន់ TIFFY SUPER FIGHT ទម្ងន់៥៧គីឡូក្រាម ទទួលបានពានចំនួន១អមជាមួយថវិកាចំនួន ៤,០០០ដុល្លារ ចំណាត់ថ្នាក់លេខ២ មានពាន១និងប្រាក់រង្វាន់ចំនួន២,០០០ដុល្លារ លេខ៣បានពាន១និងបា្រក់រង្វាន់ចំនួន ៧៥០ដុល្លារ និងលេខ៤ ទទួលបានថវិកាលើកទឹកចិត្តចំនួន ៥០០ដុល្លារ៕
ដោយ៖ សារីម
