ភ្នំពេញ៖ របៀបពុករលួយ និងជាទម្លាប់ដ៏អាក្រក់របស់មន្ត្រីគយ កំពុងជះឥទ្ធិពលដ៏អាក្រក់ទៅលើអ្នកវិនិយោគទុន ជាពិសេសខាងក្រុមហ៊ុនដឹកជញ្ជូនរោងចក្រវាយនភ័ណ្ឌនោះជាដើម(តាមរោងចក្រ) បង្កើតឲ្យមានការបង់ប្រាក់ក្រោមតុ ផ្ទុយពីអ្វីដែលក្រសួងសេដ្ឋកិច្ច និងហិរញ្ញវត្ថុ ក៏ដូចជាអគ្គនាយកដ្ឋាន គយ និងរដ្ឋាករកម្ពុជាកំណែទម្រង់ លុបបំបាត់ អំពើពុករលួយ ជាពិសេសគោលនយោបាយរបស់រដ្ឋាភិបាល តែងតែបានផ្តល់កម្លាំងចិត្តដល់អ្នកវិនិយោគទុន ដើម្បីជាអត្ថប្រយោជន៍សម្រាប់សេដ្ឋកិច្ចជាតិ និងជាទុនដ៏មានសារសំខាន់ ស្រូបកម្លាំងពលកម្មក្នុងស្រុកឲ្យពលរដ្ឋមានការងារធ្វើ ទទួលបានប្រាក់កម្រៃសម្រាប់លើកស្ទួយ ដោះស្រាយជីវភាពរស់នៅប្រចាំថ្ងៃ ។
ក្រុមអ្នករត់ការទំនិញវិនិយោគបានលើកឡើងថា ការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញ និងគយការិយាល័យកំពង់ផែស្វយ័តភ្នំពេញ ការគ្រប់គ្រងប្រកបដោយអំពើពុករលួយជាលក្ខណៈប្រព័ន្ធ តាមរូបភាពតម្រូវឲ្យមានការបង់ប្រាក់សម្រាប់ឯកសារប្រតិវេទន៍គយក្នុងមួយឯកសារៗ ចាប់ពី៣៥ដុល្លារទៅ៧៥ដុល្លារ នេះគិតសម្រាប់តែឯកសារដែលគ្មានកំហុស ។
ក្រុមអ្នករត់ការបានលើកឡើងពីការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញ ដែលមានលោក ហ៊ីវ សុធារិទ្ធ ជាប្រធាន និងជាទម្លាប់ ដែលគាត់ឆ្លងកាត់នូវអំពើពុករលួយយ៉ាងឆ្អឹនឆ្អៅនៅកំពង់ផៃស្វយ័តភ្នំពេញ ក៏បន្តប្រព្រឹត្តកំហុសបែបនេះដដែល ។ យ៉ាងតិចក្នុង១ឯកសារសម្រាប់ទំនិញវិនិយោគនាំចូល ត្រូវបង់ប្រាក់ចំនួន៧៥ដុល្លារ ក្នុងនោះ អ្នករត់ការត្រូវបង្ខំចិត្តបង់ប្រាក់ឲ្យកូនចៅលោក ហ៊ីវ សុធារិទ្ធ ជាមន្ត្រីគយទទួលផ្នែកនីមួយៗដូចខាងក្រោម៖ ទី១ ត្រូវបង់ចំនួន៥ដុល្លារសម្រាប់មន្ត្រីគយទទួលផែនផ្នែកចុះលេខ (ឈ្មោះធឿន) ទី២ បង់ប្រាក់ចំនួន២០ដុល្លារសម្រាប់គណនេយ្យ (ឈ្នោះ សារាន់) ទី៣ បង់ប្រាក់ចំនួន១០ដុល្លារសម្រាប់ប្រធានផ្នែកត្រួតពិនិត្យ និងចំនួន១០ដុល្លារទៀតផ្នែកកូនចៅមន្ត្រីគយខាងពិនិត្យ ទី៤ បង់ប្រាក់ចំនួន២០ដុល្លារសម្រាប់មន្ត្រីគយផ្នែកកាត់ស្តុក បញ្ចុះ ឯកសារ និងទី៥ ត្រូវបង់ឲ្យអនុប្រធានការិយាល័យជាកិច្ចបង្ហើយឯកសារចំនួន៥ដុល្លារ ។ ដោយឡែកចំពោះទំនិញវិនិយោគនាំចេញ ក្នុងមួយឯកសារចំនួន៣៥ដុល្លារ ។
អំពើពុករលួយនេះ គាបសង្កត់ទាំងឯកសារស្របច្បាប់របស់ផ្នែកទំនិញវិនិយោគឧស្សាហកម្មវេយនភ័ណ្ឌ រោងច្រកកាត់ដេរ ដោយករណីខ្លះ លោក ហ៊ីវ សុធារិទ្ធ បានតម្រូវឲ្យមន្ត្រីរបស់ខ្លួនកេងប្រវ័ញ្ចក្នុងប្រយោជន៍ទៅលើឯកសារខុសបច្ចេកទេសតិចតួច ឬកិច្ចការងារប្រញាប់ ត្រូវទាញយកប្រយោជន៍លក្ខណៈក្រោមតុកាន់តែច្រើន និងចង់ទៅស៊ីញ៉េកន្លែងណាក៏បាន ។
ចំពោះការិយាល័យគយ និងរដ្ឋាករកំពង់ផៃស្វយ័តភ្នំពេញវិញ គឺមានរបៀបរបបរកលុយស្រដៀងគ្នា ប៉ុន្តែទង្វើទាំងអស់នេះកំពុងតែជះឥទ្ធិពលអាក្រក់ ប៉ះពាល់ដល់ថ្នាក់លើ ក៏ដូចជាសង្គមជាតិ ជាពិសេសប៉ះពាល់ទៅនឹងអារម្មណ៍យ៉ាងធ្ងន់ ចំពោះអ្នកវិនិយោគទុន ។
ពាក់ព័ន្ធករណីនេះ នគរវត្តមិនអាចទាក់ទងបានទេពីលោក ហ៊ីវ សុធារិទ្ធ ប្រធានការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញ ក៏ដូចជាមេគយកំពង់ផែស្វយ័តភ្នំពេញ នារសៀលថ្ងៃទី៨ ខែមេសា ឆ្នាំ២០១៦ ដោយគ្មានលេខទូរស័ព្ទ ។ ប៉ុន្តែមានអ្នករត់ការជាច្រើនបានរអ៊ូរទាំក្នុងរឿងនេះថា ថ្នាក់លើកំពុងតែទុកឱកាសឲ្យមន្ត្រីគយថ្នាក់ក្រោមអនុវត្តការងារតាមទំនើងចិត្តក្នុងប្រយោជន៍បុគ្គល និងបក្ខពួកជាដើម ៕
ដោយសុខ ខេមរា
