មន្ត្រីបានថ្លែងកាលពីថ្ងៃទី១៥ ខែមេសា ឆ្នាំ២០១៦ថា មនុស្ស៩នាក់បានបាត់បង់ជីវិត បន្ទាប់ពីហេតុការណ៍រញ្ជួយដីដែលមានកម្លាំងខ្លាំងមួយវាយប្រហារនៅភាគខាងត្បូងជប៉ុន ។ ករណីនេះបណ្តាលឲ្យលំនៅឋានច្រើនខ្នងបាក់រលំ បង្កជាអគ្គិភ័យ និងបណ្តាលឲ្យមនុស្សរងរបួសរាប់រយនាក់ ។ ក្រុមជួយសង្គ្រោះបានធ្វើការទាំងយប់ស្វែងរកអ្នកស្រុក ដោយសង្ស័យជាប់នៅក្រោមគំនរបាក់បែក ។
មនុស្សរាប់ពាន់នាក់បានរត់ភៀសខ្លួនចេញពីលំនៅឋានរបស់ពួកគេ ខណៈដែលបណ្តាញទូរទស្សន៍បានផ្សព្វផ្សាយឲ្យឃើញអគាររងការបំផ្លិចបំផ្លាញ ផ្លូវថ្នល់មានការប្រេះស្រាំ បន្ទាប់ពីការរញ្ជួយដីកម្រិត៦.៥រ៉ិចទ័រវាយប្រហារនៅភាគនិរតីដែនកោះKyushu ។
បណ្តាញទូរទស្សន៍ NHK បានផ្សព្វផ្សាយហេតុការណ៍ភ្លើងកំពុងឆាបឆេះផ្ទះ១ខ្នង ហើយក្រុមពន្លត់អគ្គិភ័យបាននិងកំពុងមមាញឹកក្នុងការបាញ់ទឹកពន្លត់ ។ សេចក្តីរាយការណ៍បានឲ្យដឹងថា នេះជាអគ្គិភ័យមួយក្នុងចំណោមអគ្គិភ័យច្រើនទៀតដែលបង្កឡើងដោយសារការរញ្ជួយដីនេះ ។ ប្រព័ន្ធផ្សព្វផ្សាយសាធារណៈបញ្ជាក់ថា មនុស្សយ៉ាងតិច៧៨០នាក់បានរងរបួស ។
មន្ត្រីក្នុងតំបន់ទីប្រជុំជន Kumamoto បានបញ្ជាក់ថា គេមានអារម្មណ៍ថា ការរំញ័រមានកម្លាំងខ្លាំងណាស់ ដែលមិនធ្លាប់ជួបប្រទះនាពេលកន្លងមក ។ មនុស្សច្រើននាក់មានការរន្ធត់ ប៉ុន្តែមិនបានធ្វើឲ្យកើតចលាច័លណាស់ណានៅក្នុងទីប្រជុំជននោះឡើយ ។
នៅមិនឆ្ងាយប៉ុន្មានពីតំបន់ Mashiki មនុស្សច្រើននាក់បានប្រមូលផ្តុំគ្នានៅមុខអគារក្រុង បន្ទាប់ពីការរញ្ជួយដីនេះ ។ អ្នកខ្លះភ័យខ្លាចរហូតដល់ស្រក់ទឹកភ្នែក និងគ្មានសម្លៀកបំពាក់ ខណៈដែលអ្នកផ្សេងទៀតទទូលភួយទាំងការភ័យខ្លាច។
មន្ត្រីគ្រប់គ្រងគ្រោះមហន្តរាយ Kumamoto បានបញ្ជាក់ថា មនុស្សយ៉ាងតិច៩នាក់បានបាត់បង់ជីវិត ។ ជាមួយគ្នានៅមានព័ត៌មានលេចឮថា មនុស្សពីរបីនាក់ផ្សេងទៀតបាននិងកំពុងជាប់នៅក្រោមគំនរបែកបាក់ ។
ទីភ្នាក់ងារ NHK រាយការណ៍ថា ជនរងគ្រោះបាត់បង់ជីវិតកើនឡើងនៅពេលយប់ ។ មុនដំបូងសេចក្តីរាយការណ៍បញ្ជាក់ថា មានមនុស្ស២នាក់ប៉ុណ្ណោះបាត់បង់ជីវិត ហើយក្មេងស្រីអាយុ៨ខែម្នាក់ត្រូវគេរើកកាយយកចេញពីគំនរបែកបាក់ ប៉ុន្តែមិនបានប៉ះពាល់ដល់អាយុជីវិត ឬរងរបួសនោះឡើយ ។
កម្លាំងយោធាប្រមាណ៣៥០នាក់ត្រូវទៅកាន់កន្លែងកើតហេតុដើម្បីធ្វើសកម្មភាពជួយសង្គ្រោះ ។ អ្នកនាំពាក្យ Yoshihide Suga បានថ្លែងអំពាវនាវឲ្យរក្សាការស្ងាត់ស្ងៀម «ខ្ញុំស្នើពលរដ្ឋដែលរស់នៅក្នុងតំបន់រងគ្រោះរក្សាភាពស្ងាត់ស្ងៀម និងជួយគ្នាទៅវិញទៅមក» ។
មន្ត្រីនៅក្នុងតំបន់រងគ្រោះបានបញ្ជាក់ថា ការរញ្ជួយដីនេះបានធ្វើឲ្យបាក់បែកមន្ទីរពេទ្យយ៉ាងធ្ងន់ ហើយដែលចាំបាច់ត្រូវតែធ្វើសកម្មភាពជម្លៀសអ្នកជំងឺ ។ អគារពាណិជ្ជកម្មសំខាន់ៗផ្សេងទៀត ដូចជាក្រុមហ៊ុនដា ប្រ៉ាយស្ទន មីស៊ូប៊ីស៊ី និងអគារក្រុមហ៊ុនស៊ូនី ជាដើមត្រូវផ្អាក់ដំណើរការ ដោយសារតែការរញ្ជួយដីខូចខាតរោងចក្ររបស់ពួកគេ ។
ទីភ្នាក់ងារ ភូគម្ភសាស្ត្រជប៉ុន បានផ្សព្វផ្សាយថា ការរញ្ជួយដីចាប់ផ្តើមនៅវេលាម៉ោង៩និង២៦នាទីយប់ ម៉ោងនៅក្នុងតំបន់ ថ្ងៃទី១៤ ខែមេសា ហើយនៅវេលា២ម៉ោងកន្លះក្រោយមកទៀត ការរញ្ជួយដីកម្រិតខ្លាំង៦.៤រ៉ិចទ័របានកើតឡើងនៅក្នុងតំបន់ជាមួយគ្នា ។ ក្រោយការកម្រើកញ័រញ័រលើកទី១នោះមក ការកម្រើកញាប់ញ័របានកើតឡើងជាបនបន្ទាប់មកទៀតរហូតដល់ជាង៣០លើក ។ នាយករដ្ឋមន្ត្រីជប៉ុន លោក ស៊ីនហ្សូ អាបេ បានកោះប្រជុំជាបន្ទាន់ជាមួយមន្ត្រីគ្រប់គ្រងគ្រោះមហន្តរាយ ។ នេះបើតាមប្រភពព័ត៌មាន Suga ។
រោងចក្រនុយក្លេងអ៊ែរដ៏សំខាន់២ស្ថិតនៅក្នុងតំបន់ Kyushu គឺពុំទទួលរងផលប៉ះពាល់នោះឡើយ ។ នេះបើតាមមន្ត្រីមួយរូបស្ថិតនៅក្នុងរោងចក្រ Sendai ប្រាប់ប្រភព AFP ។
ជប៉ុនជាប្រទេសមួយក្នុងចំណោមប្រទេសដែលរងការរញ្ជួយដីច្រើនជាងគេបំផុតក្នុងពិភពលោក ។ ការរញ្ជួយដីកម្រិតខ្លាំងនៅបាតសមុទ្រកាលពីថ្ងៃទី១១ ខែមីនា ឆ្នាំ២០១១ បណ្តាលឲ្យកើតមានរលកយក្សស៊ូណាមិបក់បោកនៅឈូងសមុទ្រភាគឦសាននៃប្រទេសនេះ ។ មនុស្សរហូតដល់១៨.៥០០នាក់បានបាត់បង់ជីវិត និងបាត់ខ្លួន ព្រមទាំងធ្វើឲ្យមានបែកធ្លាយរោងចក្រនុយក្លេអែរ បង្កគ្រោះថ្នាក់មិនធ្លាប់មាននៅក្នុងយុគសម័យនោះ ។
ការរញ្ជួយដីស្ថិតនៅតំបន់ Kyushu កាលពីថ្ងៃទី១៤ ខែមេសា បណ្តាលឲ្យផ្អាកដំណើរការសេវាកម្មដឹកជញ្ជូនតាមរថភ្លើង បណ្តោះអាសន្ន ខណៈដែលរថភ្លើងល្បឿនបានធ្លាក់ចេញពីផ្លូវដែក ប៉ុន្តែមិនបណ្តាលឲ្យគ្រោះថ្នាក់នោះទេ ដោយសារតែពុំមានដឹកអ្នកដំណើរក្នុងអំឡុងពេលនោះ ។ អ្នកនាំពាក្យក្រុមហ៊ុន JR Kyushu អះអាងថា គេនៅមិនទាន់ប្រាកដទេ ថា មូលហេតុបណ្តាលមកពីការរញ្ជួយដី ។
ការរញ្ជួយដីលើកដំបូងស្ថិតក្នុងជម្រៅ១០គីឡូម៉ែត្រ ហើយមិនបណ្តាលឲ្យមានរលកយក្សស៊ូណាមិឡើយ ។ ទីភ្នាក់ងារភូគម្ភសាស្ត្រអាមេរិក (USGS) វាស់ស្ទង់ឃើញថា ការរញ្ជួយដីមានកម្រិត៦.២រ៉ិចទ័រ ។ ការរញ្ជួយដីទំនងបន្តកើតឡើងទៀតនៅសប្តាហ៍ខាងមុខ ។
ប្រទេសជប៉ុនមានទីតាំងស្ថិតចំណុចផ្ចិតនៃភពផែនដីដែលងាយរងការរញ្ជយយដី ។ ប្រទេសនេះមានការរញ្ជួយដីស្មើរ២០ភាគរយស្ថិតនៅក្នុងចំណោមប្រទេសដែលរងការរញ្ជួយដីច្រើនបំផុតក្នុងលោក ។ ប៉ុន្តែទោះបីយ៉ាងណា ជប៉ុនមិនសូវទទួលរងការខូចខាតដោយសារតែការរញ្ជួយដីឡើយ ក៏ព្រោះតែមានការបង្កា និងអនុវត្តបានត្រឹមត្រូវរបស់អាជ្ញាធរនៅក្នុងការទប់ស្កាត់ ៕
The strong 6.4-magnitude earthquake struck at 9:26 pm (1226 GMT) in Kumamoto, central Kyushu at a relatively shallow depth of 10 kilometres (6.2 miles), the Japan Meteorological Agency said. ==JAPAN OUT== / AFP PHOTO / JIJI PRESS / JIJI PRESS
ប្រែសម្រួល៖ ថាច់ យ៉ាត
