ខេត្តព្រះសីហនុ៖ ភ្ញៀវទេសចរណ៍ជាង១១៩,៧៧៥ នាក់នៅតែបន្តសំរុកមកកំសាន្តនៅខេត្តព្រះសីហនុ បើទោះបីជាតម្លៃផ្ទះសំណាក់ សណ្ឋាគារនៅតែបន្តការឡើងថ្លៃយ៉ាងណាក្តី នេះបើយោងតាមទូរលេខពីមន្ទីទេសចរណ៍ ប្រាប់បណ្តាញព័ត៌មាននារសៀលថ្ងៃទី១៦ ខែមេសា ឆ្នាំ២០១៦ ។
លោក នូ សុផល ប្រធានមន្ទីទេសចរណ៍ខេត្តព្រះសីហនុ បានគូសបញ្ជាក់ថា នៅក្នុងឱកាសបុណ្យចូលឆ្នាំថ្មីប្រពៃណីខ្មែរឆ្នាំ២០១៦ នាឆ្នាំនេះ ចំនួនភ្ញៀវទេសចរណ៍នៅតែបន្តសំរុកមកកំសាន្តយ៉ាងច្រើនកុះករ បើទោះបីជាកម្តៅព្រះអាទិត្យក្តៅខ្លាំងយ៉ាងណាក្តី ស្របពេល ដែលភ្ញៀវមួយចំនួនបានធ្វើដំណើរទៅកំសាន្តតាមបណ្តាខេត្ត ដូចជាខេត្តសៀមរាប កំពតកែបព្រះវិហារជាដើមល។ល។
បើយោងតាមទូរលេខដែលមន្ទីទេសចរណ៍បានស្រង់ក្នុងក្នុងឱកាសចូលឆ្នាំប្រពៃណីជាតិខ្មែរថ្ងៃទី១៦ ខែមេសា ឆ្នាំ២០១៦ មានចំនួនសរុប: ៣១,១២៨ នាក់ ។
សរុបទាំងបួនថ្ងៃបុណ្យចូលឆ្នាំថ្មីមានចំនួនសរុប ១១៩,៧៧៥ នាក់ កើន ៦៨.៨២ភាគរយ (ភ្ញៀវជាតិចំនួន ១០៩,៨៩៤ នាក់ កើន ៧៤ភាគរយ និងអន្តរជាតិចំនួន ៩,៨៨១ នាក់ កើនឡើង ២៦.៥៧ភាគរយ) ក្នុងនោះភ្ញៀវទៅកោះមានចំនួន ៨,៤០១នាក់។
សណ្ឋាគារមាន ៧១ ស្មើ៣,២៨៩ បន្ទប់ និងផ្ទះសំណាក់មានចំនួន ២៦៩ មាន ៣,៦៧៣ បន្ទប់ ។
ទាក់ទិនទៅនឹងតម្លៃម្ហូបអាហារគ្រឿងសមុទ្រឆ្នាំនេះ ហាក់ពុំមានការឡើងថ្លៃខ្ពស់ ដូចជា ក្តាមសេះ១គីឡូក្រាមតម្លៃពី៤០០០០រៀលឡើងរហូត៩០០០០រៀល ត្រីកាម៉ុង១គីឡូក្រាមតម្លៃ៤០០០រៀល ឡើងដល់១៣០០០រៀល ឯ មឹក បង្គា ឡើងថ្លៃ១គីឡូក្រាមចន្លោះ២០០០០រៀល ទៅ៣០០០០រៀល គ្រាដែលតម្លៃផ្ទះសំណាក់ មានការឡើងថ្លៃមធ្យម ពី១៥ដុល្លារ ឡើងរហូត៣០ដុល្លារក្នុងមួយបន្ទប់ ឯ តម្លៃតុអង្គុយក្នុង០១តុ មានតម្លៃរហូត១៥ដុល្លារ ទៅ២០ដុល្លារ នេះ បើយោងតាមការអះអាងពីភ្ញៀវទេសចណ៍ ជាច្រើនដែលបានមកកំសាន្តនៅខេត្តព្រះសីហនុ ។
ពាក់ព័ន្ឋទៅនឹងសន្តិសុខសុវត្ថិភាពលើផ្ទៃសមុទ្រ រយៈពេល៤ថ្ងៃក្នុងឱកាសបុណ្យចូលឆ្នាំថ្មី ប្រពៃណីខ្មែរ ឆ្នាំ២០១៦ នេះផងដែរ លោកវរៈសេនីយ៍ទោ ឌឹម សំបូ អនុប្រធានអង្គភាពបង្ក្រាបលើផ្ទៃសមុទ្រ បានបញ្ញាក់ថា ក្នុងឱកាសបុណ្យចូលឆ្នាំថ្មីប្រពៃណីខ្មែរឆ្នាំ២០១៦ នេះ រយៈពេល៤ថ្ងៃនេះសំរាប់ខេត្តព្រះសីហនុពុំមានបញ្ហាអ្វីនោះទេ ព្រោះទាំងនោះលើផ្ទៃទឹក និង ដែនគោក សមត្ថកិច្ចចម្រុះចុះល្បាតយ៉ាងយកចិត្តទុកដាក់បំផុត ។
ដោយឡែក លោក វរៈសេនីយ៍ឯក អ៊ី សុខា ស្នងការរងទទួលបន្ទុកផែនសណ្តាប់ធ្នាប់ បានគូសបញ្ចាក់ថា នៅ ក្នុងឱកាសបុណ្យចូលឆ្នាំថ្មីប្រពៃណីខ្មែរ ឆ្នាំ២០១៦ ពាក់ព័ន្ឋសន្តិសុខចរាចរណ៍ផ្លូវគោកមានស្ថានភាពល្អប្រសើរជាងឆ្នាំ២០១៥ គឺមានការកើតឡើងតែ២ករណីលើ០៤ករណី បើធៀបទៅនឹងឆ្នាំ២០១៥ មានការថយចុះ០២ករណី បណ្តាលអោយមនុស្សរងរបួសចំនួន០៤នាក់ ។ នេះជាការគូសបញ្ជាក់ថា នៅក្នុងឱកាសបុណ្យចូលឆ្នាំថ្មីប្រពៃណីខ្មែរឆ្នាំ២០១៦ នាឆ្នាំនេះ ចំនួនភ្ញៀវទេសចរណ៍នៅតែបន្តសំរុកមកកំសាន្តយ៉ាងច្រើនកុះករ បើទោះបីជាកម្តៅព្រះអាទិត្យក្តៅខ្លាំងយ៉ាងណាក្តី ស្របពេល ដែលភ្ញៀវមួយចំនួនបានធ្វើដំណើរទៅកំសាន្តតាមបណ្តាខេត្ត ដូចជាខេត្តសៀមរាប កំពត កែប ព្រះវិហារ ជាដើមល។ល។ ៕
ដោយ៖ ឆ្លាម សមុទ្រ
