ខេត្តកំពង់ឆ្នាំង៖ រហូតមកដល់ព្រឹកថ្ងៃទី១៨ ខែមេសា ឆ្នាំ២០១៦នេះ មានរយៈពេលជាង៤ថ្ងៃហើយដែលភ្លើងនៅតែបន្តឆេះរាលព្រៃលិចទឹកអស់រាប់រយហិកតា នៅក្នុងភូមិសាស្ត្រ ភូមិសេះស្លាប់ និងភូមិកំពង់ព្រះ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ហើយភ្លើងនៅតែរាលដាលជាបន្តទៅក្បែផ្ទះអ្នកស្រុក ដែលមកទល់និងពេលនេះ ប្រជាពលរដ្ឋមួយចំនួនបានរើអីវ៉ាន់ចេញខ្លះហើយដើម្បីរកទីដែលមានសុវត្ថិភាព ។
អាជ្ញាធរស្រុកបរិបូរណ៍បានឲ្យដឹងថា ភ្លើងបានចាប់ផ្តើមឆេះជាច្រើនកន្លែង កាលពីថ្ងៃទី១៥ ខែមេសា នៅក្នុងភូមិសាស្ត្រ ភូមិសេះស្លាប់ ភូមិកំពង់ព្រះ ភូមិគន្ធរ ឆ្នុកទ្រូ របស់ឃុំឆ្នុកទ្រូ ដែលរហូតមកដល់នឹងថ្ងៃទី១៨ មេសានេះ ភ្លើងនៅមិនទាន់រលត់អស់នោះទេ ហើយនិងអាចបន្តឆេះថែមទៀត ។ ក្នុងនោះដែរ រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តកំពង់ឆ្នាំង ក៏បានចេញជួយអន្តរាគមន៍ផងដែរ ដើម្បីការពារមិនឲ្យរាលដាលឆេះដល់ផ្ទះប្រជាពលរដ្ឋ ។
តាមការសន្និដា្ឋនដំបូង ផ្ទៃដីព្រៃលិចទឹកដែលត្រូវភ្លើងឆេះនេះ មានទំហំប្រមាណជិត៣០០ហិកតា ដែលពេលនេះនៅតែបន្តឆេះដដែល ។ មូលហេតុនៃការឆេះ ក៏មិនទាន់ដឹងច្បាស់នៅឡើយដែរ ប៉ុន្តែមជ្ឈដ្ឋានខ្លះបាននិយាយថា ការឆេះនេះ បណ្តាលមកពីការលួចដុតយកដី ពីសំណាក់ជនខិលខួចមួយចំនួន ។
ប្រភពពីស្រុកបរិបូរណ៍បានឲ្យដឹងថា ភ្លើងបានឆេះដដែលនិងកំពុងរាលដាលទៅកៀកនិងផ្ទះប្រជាពលរដ្ឋ ហើយប្រជាពលរដ្ឋមួយចំនួនក៏បានជញ្ជូនអីវ៉ាន់ចាកចេញពីលំនៅដ្ឋានរបស់ខ្លួន ទៅកាន់ទីកន្លែងមានសុវត្ថិភាពហើយ ៕
ដោយ៖ ចន្ថា
