ភ្នំពេញ៖ អំពើហិង្សាក្នុងគ្រួសារមួយបង្កចលាចលទាំងយប់បន្ទាប់ពីបុរសម្នាក់នាំប្រពន្ធចូលច្រៀងកម្សាន្តនៅហាងខារ៉ាអូខេរួចបានហៅស្រីមកអោបរឹតមុខប្រពន្ធហើយពេលនាងៗខារ៉ាអូខេសួរថានាងនេះ(ប្រពន្ធ)ត្រូវជាអ្វីនឹងបងឯង? បុរសនោះឆ្លើយថា ជាស្រីស្នេហ៍។ចម្លើយនេះបានធ្វើឲ្យប្រពន្ធខឹងចិត្តក៏សម្រេចដើរចេញទៅក្រៅបាត់ជាហេតុធ្វើឲ្យបុរសជាប្តីរត់ទៅតាមនិងចាប់វាយប្រពន្ធយ៉ាងចាស់ដៃរួចដឹកយកទៅផ្ទះម្តាយក្មេករួចបានយកសាំងប្រមាណជិត២លីត្របានចាក់ស្រោចពេញមុខផ្ទះបម្រុងដុតព្រោះតែប្រពន្ធបិទទ្វារមិនឲ្យចូលតែសំណាងល្អគ្រួសារខាងប្រពន្ធនិងសមត្ថកិច្ចមូលដ្ឋានរត់ចេញមកក្រៅជួយឃាត់ទាន់។
ហេតុការណ៍គួរឲ្យភ្ញាក់ផ្អើលនេះកើតឡើងនៅវេលាម៉ោង១រំលងអធ្រាត្រឈានចូលថ្ងៃទី២២ខែកក្កដាឆ្នាំ២០១៥ នៅចំណុច ផ្លូវបេតុងតាមបណ្តោយផ្លូវជាតិលេខ២ ស្ថិតក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
មន្រី្តនគរបាលប៉ុស្តិ៍ចាក់អង្រែក្រោម បានឲ្យដឹងថា បុរសដែលជាប្តីមានឈ្មោះ គឹម លី អាយុ៤៨ឆ្នាំ មានមុខរបរជាអ្នកបើករថយន្តមានប្រពន្ធឈ្មោះ ជា វួចលាង អាយុ៣០ឆ្នាំ មុខរបរមេផ្ទះ និងមានកូនប្រុសម្នាក់មានឈ្មោះ លឹម ម៉ា អាយុ៤ឆ្នាំ ហើយទាំង២នាក់នេះបានគ្នាជាប្តីប្រពន្ធដោយមិនបានរៀបការស្របច្បាប់ទេ ហើយបានស្នាក់នៅផ្ទះជួលម្តុំកន្លែងកើតហេតុយូរឆ្នាំមកហើយ។
សាក្សីបានឲ្យដឹងថានៅមុនពេលកើតហេតុបុរសជាប្តីបាននាំប្រពន្ធរបស់ខ្លួនចូលច្រៀងខារ៉ាអូខេឲ្យសប្បាយចិត្តម្តង ប៉ុន្តែអ្វីដែលស្មានមិនដល់គឺនៅពេលចូលដល់បន្ទប់ខារ៉ាអូខេបុរសជាប្តីបានហៅស្រីខារ៉ាអូខេមកអោបនែបនិតនិងទុកឲ្យប្រពន្ធនៅអង្គុយម្ខាង។ពេលឃើញដូច្នោះនាងៗខារ៉ាអូខេសួរថា តើបងស្រី(ប្រពន្ធ)ត្រូវជាអ្វីនឹងបងអែង? បុរស ជាប្តីប្រាប់ទាំងលេងសើចថា គឺជាស្រីស្នហ៍។ករណីនេះធ្វើឲ្យប្រពន្ធខឹងយ៉ាងខ្លាំងតែធ្វើអ្វីប្តីមិនកើតក៏សុខចិត្តដើរចេញទៅក្រៅបាត់ទៅ។បន្ទាប់មកបុរសជាប្តីបានរត់តាមប្រពន្ធនិងបានយកម៉ូតូដឹកប្រពន្ធទៅផ្ទះម្តាយក្មេកហើយឈប់ពាក់កណ្តាលផ្លូវទះកំផ្លៀងប្រពន្ធជាច្រើនដៃទើបដឹកបន្តទៅផ្ទះម្តាយក្មេកនៅសង្កាត់ចាក់អង្រែក្រោមបង្កជម្លោះផ្អើលអ្នកភូមិម្តងទៀត បន្ទាប់ពីប្តីទាមទារយកកូនតែក្រុមគ្រួសារមិនឲ្យរួចទាញទ្វារផ្ទះបិទមិនឲ្យចូលគ្រាដែលប្រពន្ធចូលផ្ទះម្តាយបង្កើតរួចទៅហើយនោះ។
សាក្សីឲ្យដឹងទៀតថា ដោយឃើញក្រុមគ្រួសារខាងប្រពន្ធមិនឲ្យចូលផ្ទះ បុរសជាប្តីកាន់តែខឹងខ្លាំងបានទៅទិញសាំងពីរដបយកមកចាក់ស្រោចពេញមុខផ្ទះម្តាយក្មេកបម្រុងដុតសម្លាប់មួយពូជតែសំណាងល្អត្រូវបានគ្រួសារខាងប្រពន្ធរត់ចេញមកចាប់ជាប់ជាហេតុធ្វើឲ្យភ្ញាក់ផ្អើលដល់ប្រជាពលរដ្ឋរស់នៅជិតខាងនិង សមត្ថកិច្ចមូលដ្ឋានបានចុះមកនាំបុរសនេះទៅនគរបាលប៉ុស្តិ៍ដើម្បីធ្វើការណែនាំ។
តាមការរៀបរាប់ពីស្ត្រីជាប្រពន្ធបានឲ្យដឹងថា ប្តីរបស់គាត់តាំងពីបានគ្នាជាប្តីប្រពន្ធតែងធ្វើបាបផ្លូវចិត្តនិងផ្លូវកាយគាត់ខ្លាំងណាស់ ដោយពេលខ្លះដើរស៊ីចាយ លេងល្បែងចាញ់យកម៉ូតូទៅលក់អស់ពីរបីគ្រឿងមកហើយគឺគ្មានគិតប្រពន្ធកូនទេ។ លើសពីនេះទៀតឲ្យតែស្រវឹងម្តងៗតែងរករឿងវាយដំប្រពន្ធកូនគ្មានអ្នកណានិយាយស្តាប់ឡើយ តែដោយសារអាណិតកូនគាត់ចេះតែទ្រាំៗទៅ ៕ ប្រាថ្នា
