ខេត្តកំពង់ធំ៖ នៅវេលាម៉ោង៤ និង៣៥នាទីទាបភ្លឺថ្ងៃទី២២ ខែមេសា ឆ្នាំ២០១៦ អគ្គិភ័យមួយបានលេបត្របាក់រោងសិប្បកម្មកែច្នៃឈើធ្វើគ្រឿងសង្ហារឹម១កន្លែងរបស់សណ្ឋាគារ៧ជាក់ដែលសាងសងរយៈពេលជាង៣ឆ្នាំមកហើយនៅមិនទាន់រួច ស្ថិតនៅក្នុងភូមិទី២ សង្កាត់កំពង់ធំ ក្រុងស្ទឹងសែន ខេត្តកំពង់ធំ ។
តាមប្រភពព័ត៌មានពីសមត្ថកិច្ចប្រាប់ថា ក្នុងហេតុការណ៍នេះយើងបានប្រើប្រាស់រថយន្ដពន្លតអគ្គិភ័យចំនួន២គ្រឿង អស់ទឹកចំនួន៤ឡាន និងកម្លាំងសមត្ថកិច្ចចម្រុះមាន នគរបាលកងរាជអាវុធហត្ថ និងយោធា សរុបចំនួនជាង៤០នាក់ ទើបអាចពន្លតអគ្គិភ័យនេះបានជាស្ថាពរ ចំណែកសម្ភារខូចខាតមាន ម៉ាស៊ីន២គ្រឿង ទ្វារចំនួនជាង១០០សន្លឹក ឈើប្រណឹតចំនួនជាង១០ម៉ែត្រគូប រោងសិប្បកម្ម២ខ្នង ត្រូវបានខូចខាតទាំងស្រុង រីឯម្ចាស់សណ្ឋាគារឈ្មោះ គុយ លាងគី ភេទប្រុស អាយុ៥៤ឆ្នាំ រស់នៅក្នុងភូមិកើតហេតុខាងលើ។
ក្រោយពីអគ្គិភ័យបានរលត់ជាស្ថាពរនោះសមត្ថកិច្ចនៅមិនដឹងពីមូលហេតុច្បាស់លាស់ទេ គ្រាន់តែដឹងថាភ្លើងបានចាប់ផ្ដើមឆេះពីគំនរការលាជ័រសម្រាប់ចាក់ពុម្ភដែលបានគរទុក ដោយមិនទាន់សន្និដ្ឋានថាមកពីអ្វីឲ្យពិតប្រាកដនោះទេ គ្រាន់តែខ្លះសន្ឋិដ្ឋានមិនប្រាកដថាប្រហែលមានគេលួចដុត ក្នុងនោះយើងក៏បានឃើញវត្តមានរបស់លោក អ៊ុត សំអន អភិបាលខេត្តកំពង់ធំ បានចុះទៅពិនិត្យដល់ទីកន្លែងកើតហេតុនេះផងដែរ៕
ដោយ៖ ប៊ុន រិទ្ធី
