ខេត្តរតនគិរី÷បុរសម្នាក់ស្រវឹងស្រាផងនិងខឹងសម្បានគរបាលចរាចរណ៍ខេត្តផាកពិន័យ ក៏បង្ហូរសាំងចាក់ដុតម៉ូតូខ្លួនឯងចោល បង្កការភ្ញាក់ផ្អើលប្រជាពលរដ្ឋធ្វើដំណើរតាមផ្លូវ កាលពីវេលាម៉ោង ៣ និង ៤០ នាទីរសៀល កាលពីថ្ងៃទី ១៧ ខែកុម្ភៈ ឆ្នាំ ២០២២ តាមផ្លូវនៅទល់មុខតារាងបាល់ចាស់ ស្ថិតនៅក្នុងភូមិភ្នំស្វាយ សង្កាត់បឹងកន្សែង ក្រុងបានលុង។
តាមសាក្សីនៅក្បែរកន្លែងកើតហេតុបានឲ្យដឹងថា បុរសម្នាក់នេះជិះម៉ូតូ ១ គ្រឿងម៉ាក វេវឆ្លាម ក្នុងទិសដៅពីត្បូងទៅជើងម។ លុះមកដល់កន្លែងកើតហេតុ ត្រូវបាននគរបាលចរាចរណ៍ឃាត់ ខណៈបុរសរូបនេះមិនមានពាក់មួកសុវត្ថិភាព និងម៉ូតូក៏អត់មានស្លាកលេខផងដែរ ហើយនគរបាលចរាចរណ៍ក៏បានផាកពិន័យមិនដឹងថា ចំនួនប៉ុន្មាននោះទេ ។
ក្រោយមកម្ចាស់ម៉ូតូក៏បានដើរទៅក្បែរម៉ូតូរបស់ខ្លួនហើយបានបង្ហូរសាំងដុតម៉ូតូតែម្តង។ មន្ត្រីនគរបាលចរាចរណ៍ខេត្ត បានឲ្យដឹងថា បន្ទាប់ពីបុរសម្នាក់នេះ បានដុតម៉ូតូរបស់ខ្លួនហើយនោះ ត្រូវបាននគរបាលចរាចរណ៍ឃាត់ខ្លួនបញ្ជូនទៅការិយាល័យនៃស្នងការនគរបាលខេត្ត ដើម្បីសាកសួរ ធ្វើតេស្តរកគ្រឿងស្រវឹង និងសារធាតុញៀន។ មន្ត្រីនគរបាលបានបញ្ជាក់ថាបុរសខាងលើមានជាតិស្រវឹងក្នុងខ្លួន។
មន្ត្រីនគរបាលចរាចរណ៍ខេត្តបានបញ្ជាក់ថា បុរសរូបនេះមានឈ្មោះ សុខ អាយុជាង ៥០ ឆ្នាំ ជនជាតិខ្មែរ មានទីលំនៅភូមិ ៧ មករា សង្កាត់ឡាបានសៀក ក្រុងបានលុង ខេត្តរតនគិរី មុខរបរកម្មករដើរដកដំឡូងមី។ រីឯម៉ូតូដែលដុតកម្ទេចចោលនោះ ត្រូវនគរបាលចរាចរណ៍យកមករក្សាទុកនៅការិយាល័យចរាចរណ៍ខេត្ត។
បច្ចុប្បន្ន ត្រូវបាននគរបាលចរាចរណ៍ឃាត់ខ្លួនបណ្តោះអាសន្ននៅស្នងការដ្ឋាននគរបាលខេត្ត ដើម្បីចាត់ការបន្តទៅតាមនីតិវិធី៕
ដោយ៖ សូរិយា
