អារ៉ាប៊ីសាអ៊ូឌីតបានប្រែក្លាយទៅជាប្រទេសទិញសព្វាវុធច្រើនជាងគេបំផុត នៅលើពិភពលោកដោយសារតែស្ថានភាពនៅតំបន់នោះកំពុងតែតានតឹងតម្រូវឱ្យមានសព្វាវុធច្រើនសម្រាប់ទប់ទល់ ហេតុការណ៍អាក្រក់។ ចំណែកឥណ្ឌាដែលជាប្រទេសជាប់ចំណាត់ថ្នាក់ទី១កន្លងមកពីការទិញសព្វាវុធបរទេសពេលនេះធ្លាក់មកលំដាប់ទី២វិញ ។
សារព័ត៌មានចិនបានផ្សព្វផ្សាយថា ដោយសារតែការព្រួយបារម្ភនិងមហិច្ឆតារបស់អ៊ីរ៉ង់ពីកម្មវិធីសព្វាវុធបានធ្វើឱ្យស្ថានភាពក្នុងតំបន់មជ្ឈិមបូព៌ាកាន់ តែតានតឹងកើតឡើង។ មួយវិញទៀតក្រុមអ៊ិស្លាមបង្កើតរដ្ឋក៏បានរីកធំធាតុធ្វើឱ្យអារ៉ាប៊ីសាអ៊ូឌីតត្រូវតែបង្កើតការការពារខ្លួន។ទាំងនោះហើយជាចំណុចជំរុញឱ្យអារ៉ាប៊ីសាអ៊ូឌីតឈានមុខឥណ្ឌាក្លាយជាប្រទេសទិញសព្វាវុធច្រើនជាង គេបំផុតនៅលើពិភពលោក ។
ក្រុមហ៊ុនប្រឹក្សា IHS Jane´s ជាក្រុមហ៊ុនផ្ដល់ប្រឹក្សាពាណិជ្ជកម្មសព្វាវុធនៅ លើពិភពលោកបានបញ្ជាក់ថា ឆ្នាំ២០១៤ ប្រាក់ចំណាយប្រទេសអារ៉ាប៊ីសាអ៊ូឌីតទៅលើការទិញសព្វាវុធកើនឡើងរហូតដល់៥៤ភាគរយស្មើ ៦.៥ពាន់លានដុល្លារអាមេរិក ចំណែកឥណ្ឌាប្រាក់ចំណាយសម្រាប់ទិញសព្វាវុធមានតម្លៃតែ ៥.៨ពាន់លានដុល្លារប៉ុណ្ណោះ។ ក្រុមហ៊ុនប្រឹក្សានេះ ព្យាករថា ពឹងផ្អែកទៅលើសព្វាវុធប្រគល់ជូនតាមគម្រោងការទិញសព្វាវុធរបស់អារ៉ាប៊ីសាអ៊ូឌីតនៅឆ្នាំ២០១៥ នឹងកើន ៥២ភាគរយ ស្មើ៩.៨ពាន់លានដុល្លារ ។
សកម្មភាពខាងលើមិនធ្លាប់កើតមានឡើយសម្រាប់ប្រទេសអារ៉ាប៊ីសាអ៊ូឌីត។ សកម្មភាពខាងលើបានបង្ហាញយ៉ាងច្បាស់ពីវិវាទកើតឡើងនៅតំបន់មជ្ឈិមបូព៌ា។ អារ៉ាប៊ីសាអ៊ូឌីតជាប្រទេសសម្បូរប្រេងកាតបំផុតមានលទ្ធភាពគ្រប់គ្រាន់សម្រាប់បំពាក់សព្វាវុធទំនើបៗការពារដែនអធិបតេយ្យរបស់ខ្លួនគេចផុតរាល់ការគំរាមកំហែង ។
លោក ដាវីដ ខទ្រីដ មកពីមជ្ឈមណ្ឌលស្រាវជ្រាវនយោបាយសន្ដិភាពពិភព លោកបានបញ្ជាក់ថា ដោយព្រួយបារម្ភពីការផ្លាស់ប្ដូរទម្រង់នយោបាយ ភូមិសាស្ដ្រនៅតំបន់មជ្ឈិមបូព៌ាអារ៉ាប៊ីសាអ៊ូឌីតបានសម្រេចពង្រីកឃ្លាំងអាវុធរបស់ខ្លួន។ ក្នុងពេលជាមួយគ្នានេះអាមេរិកក៏បានស្នើដល់អារ៉ាប៊ីសាអ៊ូឌីតចូលរួមក្នុងការវាយប្រហារទៅលើក្រុមអ៊ិស្លាមបង្កើតរដ្ឋផងដែរ។ កន្លងមកប្រទេសនេះក៏បានបញ្ជូនយន្ដហោះចម្បាំង F-16 ទៅវាយប្រហារលើគោលដៅសំខាន់ៗរបស់ក្រុម IS នៅក្នុងប្រទេសអ៊ីរ៉ាក់ជាការបើកផ្លូវឱ្យកម្លាំងទាហានអ៊ីរ៉ាក់វាយលុកដណ្ដើមទីតាំងទាំងឡាយមកគ្រប់គ្រងវិញ ។
តាមការប្រកាសរបស់លោក ខទ្រីដ បញ្ជាក់ថា អាមេរិកជាអ្នកទទួលផលប្រយោជន៍ច្រើនជាងគេបំផុតនៅក្នុងទីផ្សារសព្វាវុធតំបន់មជ្ឈិមបូព៌ាដោយសារតំបន់មានវិវាទ។ អាមេរិកបានលក់សព្វាវុធដែលមានតម្លៃរហូតដល់ ៨.៤ពាន់លានដុល្លារដល់តំបន់មជ្ឈិមបូព៌ាក្នុងឆ្នាំ២០១៤ ខ្ពស់ជាងកាលពីឆ្នាំ២០១៣ ដែលមានតែ ៦ពាន់លានដុល្លារប៉ុណ្ណោះ។ អារ៉ាប៊ីសាអ៊ូឌីត និងប្រទេសអារ៉ាប់រួមកាលពីឆ្នាំ២០១៤ បានទិញសព្វាវុធសរុប ៨.៧ពាន់លានដុល្លារលើសការលក់ទៅឱ្យប្រទេសនៅអឺរ៉ុបខាងលិចទៅទៀត ។
លោក ខទ្រីដ បញ្ជាក់ទៀតថា ការទិញសព្វាវុធជាយុទ្ធសាស្ដ្រមួយដើម្បីឱ្យបុគ្គលមួយចំនួនក្នុងជួររដ្ឋាភិបាលរបស់អារ៉ាប៊ីសាអ៊ូឌីតរំលឹកអាមេរិកថា ប្រទេសនេះជាសម្ពន្ធមិត្ដដ៏សំខាន់របស់អាមេរិក និងជាប្រទេសដែលមានសារប្រយោជន៍បំផុតក្នុងតំបន់ជម្លោះ។ តាមរបាយការណ៍របស់ក្រុមប្រឹក្សាដដែលក្រុមហ៊ុនប៊ូអ៊ីងក្រុមហ៊ុនឡុកខេតម៉ាទីន ក្រុមហ៊ុន Raytheon ជាក្រុមហ៊ុននាំចេញសព្វាវុធខ្លាំងជាងគេបំផុតក្នុងឆ្នាំ២០១៤ ។ អារ៉ាប៊ីសាអ៊ូឌីតក៏បានបង្ហាញការព្រួយបារម្ភនៃការក្រោកឈរឡើងពង្រីកទឹកដីរបស់ក្រុមអ៊ិស្លាមបង្កើតរដ្ឋទាំងនោះ ហើយបានជំរុញឱ្យប្រទេសនេះបង្កើនកិច្ចសហប្រតិបត្ដិការជាមួយអាមេរិក។ កិច្ចព្រមព្រៀងជាមួយអ៊ីរ៉ង់ក៏ជាមូលហេតុដែលអារ៉ាប៊ីសាអ៊ូឌីតត្រូវតែពង្រឹងការការពារខ្លួនឱ្យបានខ្លាំងក្លាបំផុត ។
សម្រាប់ទីផ្សារសព្វាវុធនៅលើពិភពលោកទាំងមូលក្នុងឆ្នាំ២០១៤ កើនឡើងពីឆ្នាំទី៦បន្ដបន្ទាប់។ ការនាំចេញសព្វាវុធលើពិភពលោកកើនឡើងពី ៥៦ពាន់លានដុល្លារដល់ ៦៤.៤ពាន់លានដុល្លារ។ ក្នុង ពេលនេះអាមេរិកនៅតែជាប្រទេសលក់សព្វាវុធច្រើនជាងគេបំផុតដោយ ការលក់ចេញកើនឡើងដល់ទៅ ១៩ភាគរយ ចំណែករុស្ស៊ីឈរលំដាប់ទី២ មាន ៩ ភាគរយ។ ក្រៅពីនេះប្រទេសបារាំងអង់ គ្លេស អ៊ីតាលី អ៊ីស្រាអែល អេស្ប៉ាញ ចិន កាណាដាក៏ជាប្រទេសទទួលបានផលចំណេញយ៉ាងច្រើនក្នុងការលក់សព្វាវុធរបស់ខ្លួន ។
ក្រុមហ៊ុនផលិតសព្វាវុធនៅលើពិភពលោកកំពុងត្រូវប៉ាន់យ៉ាងខ្លាំងដោយសារតែស្ថានភាពនយោបាយនៅលើពិភពលោកជួបនូវបញ្ហាស្មុគស្មាញ និងអំពើ ហិង្សាវិវាទដែនអធិបតេយ្យកាន់តែកើនឡើងខ្ពស់ពីមួយថ្ងៃទៅមួយថ្ងៃ ។
វិវាទនៅតំបន់អាស៊ីប៉ាស៊ីហ្វិកក៏ជាកត្ដាជំរុញឱ្យប្រទេសក្នុងតំបន់ត្រូវចំណាយ ប្រាក់យ៉ាងច្រើនទិញសព្វាវុធសម្រាប់ ការពារដែនអធិបតេយ្យរបស់ខ្លួន ក្នុងនោះមានប្រទេសវៀតណាមជាដើម។ ចំណែកប្រទេសឥណ្ឌាដែលជាប់ចំណាត់ថ្នាក់ប្រទេសទិញសព្វាវុធច្រើនជាងគេក្នុងឆ្នាំ២០១២ និងឆ្នាំ២០១៣ ដោយសារតែប្រទេសសត្រូវឥណ្ឌាដូចជាប៉ាគីស្ថាននិងចិនបានបង្កើនសកម្មភាពទិញអាវុធទំនើបៗដែលអាចបំពាក់ក្បាលគ្រាប់បរមាណូ។ មួយវិញទៀតឥណ្ឌា និងប៉ាគី ស្ថាន ចិនសុទ្ធសឹងតែមានជម្លោះតាម បណ្ដោយព្រំដែនមិនទាន់ដោះស្រាយកំណត់ព្រំដែនជាក់លាក់នៅឡើយ។ វិវាទទាំងនោះបានបង្កឱ្យទាហានព្រំដែនប្រទេសទាំងពីរប៉ះទង្គិចគ្នាជាច្រើនលើកក្នុងមួយឆ្នាំ ។
អ្នកវិភាគមួយចំនួនក៏បានលើកឡើង ដោយថ្កោលទោសទៅលើអាមេរិកនិងប្រទេសមហាអំណាចមួយចំនួនទៀតជាអ្នកបង្កឱ្យមានអសន្ដិសុខនៅតំបន់មួយចំនួនដើម្បីសម្រេចគោលដៅក្នុងការលក់ សព្វាវុធរបស់ខ្លួន។ នៅពេលនេះគោល នយោបាយលក់សព្វាវុធរបស់អាមេរិកទទួលបានជោគជ័យពេលដែលប្រទេសតំបន់មជ្ឈិមបូព៌ាទិញសព្វាវុធច្រើនជាងគេបំផុត។ ទាំងនោះដោយសារតែមានក្រុមអ៊ិំស្លាមបង្កើតរដ្ឋអុកឡុកគំរាមកំហែងប្រទេសជាច្រើន។ ចំណុចទាំងនោះទើបប្រទេសជាច្រើនចាត់ទុកថា ក្រុមអ៊ិស្លាមបង្កើតរដ្ឋជាកម្លាំងសម្ងាត់របស់អាមេរិកសម្រាប់អុកឡុកធ្វើឱ្យទីផ្សារសព្វាវុធអាមេរិកដែលជាប្រភពចំណូលសំខាន់កាន់តែមានការរីកចម្រើន៕
ប្រែសម្រួល៖ ម៉ែវ សាធី
