លោក អ៊ូ វីរៈ ប្រធានអង្គការវេទិកាអនាគត និងជាអ្នកវិភាគផងនោះ ម្តងជាពីរដង តែងបាននិយាយញុះញង់ និងលាបពណ៌មកលើគណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាលបច្ចុប្បន្ន។ ការញុះញង់ អុចអាល លាបពណ៌របស់អ្នកវិភាគរូបនេះ ត្រូវបានគេមើលឃើញថា លោក អ៊ូ វីរៈ បានចេញមុខការពារពេញទំហឹងនូវទង្វើអាក្រក់របស់ថ្នាក់ដឹកនាំគណបក្សសង្គ្រោះជាតិ មានប្រធានបក្សលោក សម រង្ស៊ី និងប្រធានស្តីទីលោក កឹម សុខា ជាដើម។
លោក អ៊ូ វីរៈ ដែលជាអ្នកវិភាគមានសញ្ជាតិអាមេរិកាំងផងនោះ បានបើកការវាយប្រហារចំៗមកលើគណបក្សប្រជាជនកម្ពុជា ក្នុងន័យការពារគណបក្សសង្គ្រោះជាតិ បន្ទាប់ពីគណបក្សសង្គ្រោះជាតិកំពុងធ្លាក់ចុះប្រជាប្រិយភាព ស្ទើរតែបាត់បង់អស់អ្នកគាំទ្រក្នុងរយៈពេលចុងក្រោយនេះ។
សំណួរសួថា តើមូលហេតុអ្វីលោក អ៊ូ វីរៈ ត្រូវការពារគណបក្សសង្គ្រោះជាតិ ដោយបានចោទប្រកាន់រឿងរ៉ាវបុគ្គលផ្ទាល់ខ្លួនរបស់ប្រធានស្តីទីបក្សសង្គ្រោះជាតិលោក កឹម សុខា ថា ជាការរៀបចំរបស់គណបក្សប្រជាជនកម្ពុជា?
ចម្លើយងាយយល់ទេ លោក អ៊ូ វីរៈ ជាមនុស្សជំនិតរបស់លោក កឹម សុខា តាំងពីលោក កឹម សុខា ជាប្រធានមជ្ឈមណ្ឌលសិទ្ធិមនុស្សកម្ពុជា។ លោក អ៊ូ វីរៈ បានឡើងធ្វើប្រធានមជ្ឈមណ្ឌល សិទ្ធិមនុស្សកម្ពុជាតាមការចាត់តាំងរបស់លោក កឹម សុខា ខណៈលោក កឹម សុខា លាឈប់ពីអង្គការ ទៅបង្កើតបក្សនយោបាយ គឺគណបក្សសិទ្ធិមនុស្ស។
លោក អ៊ូ វីរៈ ជាបងប្អូនបង្កើតជាមួយ អ៊ូ ច័ន្ទរ័ត្ន តំណាងរាស្ត្រគណបក្សសង្គ្រោះជាតិមណ្ឌលតាកែវ និង លោក អ៊ូ ច័ន្ទឬទ្ធិ តំណាងរាស្ត្រគណបក្សសង្គ្រោះជាតិមណ្ឌលកណ្តាល និងជាប្រធានគណៈកម្មាធិការវិន័យគណបក្សសង្គ្រោះជាតិ។
ទឡ្ហីករណ៍ខ្លះៗនេះ គេអាចសន្និដ្ឋានបានថា ចង់មិនចង់លោក អ៊ូ វីរៈ ចាំបាច់ត្រូវចេញមុខការពារគណបក្សសង្គ្រោះជាតិ និងបុគ្គល កឹម សុខា ក្នុងនាមជាអ្នកវិភាគឯករាជ្យ។ ការចេញមុខការពារគណបក្សសង្គ្រោះជាតិ និងបុគ្គល កឹម សុខា បានធ្វើឲ្យលោក អ៊ូ វីរៈ ប្រព្រឹត្តកំហុស គឺការបរិហាកេរ្តិ៍ និងបានបំពានមាត្រា ៣០៥ នៃក្រមព្រហ្មទណ្ឌនៃព្រះរាជាណាចក្រកម្ពុជា។
លោក អ៊ូ វីរៈ បានអះអាងថា រឿងដែលកើតមានឡើងចំពោះគណបក្សសង្គ្រោះជាតិ ជាពិសេសរឿងរ៉ាវស្នេហាលួចលាក់របស់លោក កឹម សុខា ជាមួយស្រីមុំ និងស្រីក្មេងៗជាច្រើនទៀត សុទ្ធតែជាការរៀបចំរបស់គណបក្សប្រជាជនកម្ពុជា។ ការចោទប្រកាន់ដោយគ្មានភ័ស្តុតាំង និងមូលដ្ឋានច្បាស់លាស់នេះ ត្រូវបានគណបក្សប្រជាជនកម្ពុជាចាត់ទុកថា ជាការលាបពណ៌ ធ្វើឲ្យប៉ះពាល់កិត្តិយស និងកិត្យានុភាពរបស់បក្ស។ ដូច្នេះគណបក្សប្រជាជនកម្ពុជា តាមរយៈអ្នកនាំពាក្យលោក សុខ ឥសាន្ត បានសម្រេចដាក់ពាក្យបណ្តឹងទៅកាន់សាលាដំបូងរាជធានីភ្នំពេញ ប្តឹងលោក អ៊ូ វីរៈ ថា បានបរិហាកេរ្តិ៍ និងទារសំណងចំនួន ៤០០លានរៀល ដើម្បីបញ្ជាក់ពីភាពស្អាតស្អំរបស់ខ្លួន៕
ដោយ នគរដ្រេហ្គន
