ភ្នំពេញ៖ យុវជនម្នាក់បានស្លាប់ភ្លាមៗយ៉ាងអាណោចអាធម៌ ដោយសារតែជិះម៉ូតូវ៉ាជាមួយនិងរថយន្តដែលបើកស្របគ្នា ហើយជ្រុលទៅបុកជាមួយនឹងរ៉ឺម៉កកង់បី ក្នុងទិសដៅបញ្ច្រាស់គ្នាពេញទំហឹង កាលពីវេលាម៉ោង៣នឹង៣០នាទីរំលងអាធ្រាត្រឈានចូលថ្ងៃទី២៧ ខែមេសា ឆ្នាំ២០១៦ នៅចំណុចមុខហាងមយូរ៉ាម៉ាស្សា តាមបណ្តោយផ្លូវលេខ៤៧ ស្ថិតក្នុងសង្កាត់ស្រះចក ខណ្ឌដូនពេញ ។
បុរសជនរងគ្រោះមានឈ្មោះ លី សុខជឿន អាយុ៣៧ឆ្នាំ មានស្រុកកំណើតឃុំពងជ័យ ស្រុកជើងព្រៃ ខេត្តកំពង់ចាម បច្ចុប្បន្នស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរ៉ឺម៉កម៉ូតូកង់បីមួយគ្រឿង បើកបរតាមបណ្តោយផ្លូវលេខ៤៧ ទិសដៅពីជើងទៅត្បូង ពេលនោះមានបុរសម្នាក់ជិះម៉ូតូមួយគ្រឿងម៉ាក ស្តុបពី ពណ៍ស ពាក់ស្លាកលេខ ភ្នំពេញ 1FH-1593 ជិះក្នុងទិសដៅបញ្រ្ចាសគ្នាហើយបានវ៉ាជាមួយនិងរថយន្តមួយគ្រឿងដែលមិនចាំម៉ាក ពេលដែលវ៉ាជិតផុតហើយនោះ ក៏ជ្រុលទៅបុកគ្នាមួយនិងរ៉ឺម៉កម៉ូតូកង់បីដែលបើកបញ្ច្រាស់គ្នាចំពីមុខពេញទំហឹង បណ្តាលឱ្យម្ចាស់ម៉ូតូបែកក្បាលហូរឈាមស្លាប់យ៉ាងអាណោចអាធម៌នៅលើម៉ូតូ ចំណែកអ្នកបើរ៉ឺម៉កម៉ូតូកង់បីបានបើកគេចខ្លួនបាត់តែម្តង ។
ក្រោយមកសមត្ថកិច្ចមូលដ្ឋានបានចុះមកដល់កន្លែងកើតហេតុធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌដូនពេញ ហើយក៏ទំនាក់ទំនងទៅក្រុមគ្រួសារសាច់ញាតិជនរងគ្រោះ ឱ្យមកទទួលយកសពទៅធ្វើបុណ្យតាមប្រពៃណី ៕
ដោយ៖ ជីម ភារ៉ាដង្កោ
