ខេត្តកណ្តាល៖ លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ មានប្រសាសន៍ថ្លែងអំណរអបអរសាទរគោរពស្រឡាញ់ដ៏ជ្រាលជ្រៅបំផុតចំពោះសម្តេចអគ្គមហាសេនាបតីតេជោ ហ៊ុន សែន កាលពីមហាសន្និបាតវិសាមញ្ញរបស់គណបក្សប្រជាជនកម្ពុជា បានបោះឈ្នោតជូនសម្តេចជាឯកច្ឆ័ន្ទជូនសម្តេចតេជោ ជាប្រធានគណបក្សប្រជាជនកម្ពុជា ក្នុងពិធីជួបសំណេះសំណាលកងកម្លាំងប្រដាប់អាវុធក្រោមអធិបតីភាពសម្តេចតេជោ នាយករដ្ឋមន្ត្រី ។
លោករដ្ឋមន្ត្រីក្រសួងការពារជាតិមានប្រសាសន៍បន្តថា សភាពការណ៍ពិភពលោកបច្ចុប្បន្នមានការវិវឌ្ឍន៍លឿន និងស្មុគស្មាញក្រៃលែង ឯការវិវឌ្ឍន៍នោះក៏មានការបត់បែនខ្លាំងណាស់ដែរ ។ កងកម្លាំងប្រដាប់អាវុធយើងមិនមែនសុទ្ធតែតាមទាន់សភាពការណ៍ទាំងគ្រប់ៗគ្នាទៅតាមពេលវេលានោះផងទេ ហេតុនេះការជួបជុំគ្នានាពេលនេះ ដើម្បីនឹងស្តាប់ការស្វែងយល់ដំបូន្មាន ការចង្អុលទិសរបស់សម្តេច សម្រាប់កងកម្លាំងប្រដាប់អាវុធ ។ យើងសុទ្ធតែមានសេចក្តីសង្ឃឹមថា ក្រោយពីមានការស្តាប់នូវសេចក្តីណែនាំហើយ យើងនឹងមានទស្សនៈវិស័យច្បាស់លាស់ និងមានឆន្ទៈមោះមុតក្នុងន័យការពាររដ្ឋអំណាចស្របច្បាប់ ការពារសន្តិភាពរបស់ប្រទេសជាតិ ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ថា ក្នុងនាមរាជរដ្ឋាភិបាល ខ្ញុំសូមសម្តែងនូវការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់កងកម្លាំងប្រដាប់អាវុធគ្រប់ប្រភេទ កងទ័ពទាំង៣ប្រភេទ ទាំងជើងគោក ទាំងជើងទឹក ជើងអាកាស ក៏ដូចជាកម្លាំកងរាជអាវុធហត្ថ នគរបាលដែលបានខិតខំប្រឹងប្រែងរក្សានូវអធិបតេយ្យភាពជាតិ និងសន្តិសុខជាតិរបស់យើង ក្នុងរយៈពេលកន្លងទៅ ។
សម្តេចតេជោ ហ៊ុន សែន បានមានប្រសាសន៍បែបនេះនាព្រឹកថ្ងៃទី២៣ ខែកក្កដា ឆ្នាំ២០១៥ នៅអគ្គបញ្ជាការដ្ឋានអង្គរក្សក្រុងតាខ្មៅក្នុងឱកាសអញ្ជើញជាអធិបតីក្នុងពិធីសំណេះសំណាលជាមួយកងកម្លាំងប្រដាប់អាវុធទាំង៣ប្រភេទគឺកងរាជអាវុធហត្ថ នគរបាលជាតិ និងផ្នែកស៊ីវិលមួយចំនួនដែលមានប្រមាណជាង៥ពាន់នាក់ចូលរួម ។
សម្តេចតេជោ នាយករដ្ឋមន្ត្រីបានមានប្រសាសន៍បន្តថា ថ្ងៃនេះ ខ្ញុំរីករាយដែលបានជួបជាមួយលោក លោកស្រី ពិសេសគឺកងកម្លាំងប្រដាប់អាវុធដែលជាការកម្រធ្វើពិធីជួបជុំបែបនេះ។ មុនៗយើងជួបគ្នា តាមរបៀបនៃការប្រជុំ ដែលមានស្ថានភាពចម្រុះ ហើយក៏និយាយអំពីបញ្ហាទូទៅ ទាក់ទឹនជាមួយនឹងដំណើរការជាតិរបស់យើង ។ លើកនេះការជួបជុំកម្លាំងប្រដាប់អាវុធជាស្នួល ប៉ុន្តែក៏មានផ្នែកស៊ីវិលមួយចំនួនផងដែរជាភ្ញៀវចូលរួមទៅវិញ ។
ពលកម្មទាំងនេះបានបង្ហាញឲ្យឃើញអំពីទឹកចិត្តស្នេហាជាតិ ស្នេហាទឹកដី និងស្រឡាញ់សន្តិភាពតាមរយៈនៃការខិតខំប្រឹងប្រែងការពារទឹកដីរបស់ខ្លួន ទាំងទិសខាងលិច ទាំងទិសខាងកើត និងទិសខាងជើង ។ ពិសេសនៅទិសខាងលិច គឺមានសភាពការណ៍កើតឡើងក្នុងដំណាក់កាលនាយករដ្ឋមន្ត្រី អាប់ភីស៊ីត វេចាជីវ៉ា ប៉ុន្តែឥឡូវនេះមានការធូរស្រាលមួយចំនួន ។ ប៉ែកខាងជើង និងប៉ែកខាងកើតមិនមែនអ្វីកើតឡើងធ្ងន់នោះទេ បញ្ហាខ្លះៗដែលកើតមានមិនមែនជាជម្លោះមួយនោះទេ ។ ក៏ប៉ុន្តែសូម្បីតែព្រំដីផ្ទះក្បែរខាងគ្នា ក៏មានបញ្ហា ដូច្នេះយើងខិតខំរកវិធីសម្រួល ខាងលិចកំពុងតែធ្វើសុខស្រួល ឥឡូវយើងត្រូវរកការសម្រួលថែមទៀត ៕ សុខ ខេមរ៉ា
