ភ្នំពេញ​៖​ បុរសម្នាក់ដែលត្រូវបានគេស្គាល់ថា​ ជាពិធីករអានព័ត៌មានទូរទស្សន៍​ CTN ម្នាក់ទំនងជាស្រវឹងស្រា​ជ្រោកបានបើកបុករះរថយន្តនិងម៉ូតូជាច្រើនគ្រឿង​ ​ហេតុការណ៍នេះបង្កឲ្យមានការណ៍ភ្ញាក់ផ្អើលកាលពីល្ងាច​ថ្ងៃទី២៩​ ខែមេសា​ ឆ្នាំ​២០១៦​ ស្ថិតនៅចំណុចលើស្ពានជ្រោយចង្វាថ្មី​។

ប្រពភព័ត៌មាននៅកន្លែងកើតហេតុបានឲ្យដឹងថា​ មុនពេលកើតហេតុគេឃើញបុរសម្នាក់ដែលស្គាល់ថាជាពិធីករនៅទូរទស្សន៍ CTN មានឈ្មោះ​ នៅ​ សម្ផស្ស បានបើករថយន្តម៉ាកតូយ៉ូតា ហាយឡេនឌើ ពណ៌ ស្ករ ពាក់ស្លាកលេខ ភ្នំពេញ 2X-2296 បានបើកតាមផ្លូវជាតិលេខ៦ ក្នុងទិសដៅពីកើតទៅលិច​ គោលដៅចូលរាជធានីភ្នំពេញ លុះមកដល់ចំណុចកើតហេតុខាងលើ​ ក៏បានបុករះរថយន្ត​ចំនួន​ ៣គ្រឿង​ និងម៉ូតូ​ ១គ្រឿង​ បណ្តាលឲ្យមានអ្នករងរបួសស្រាល​ ។ ក្រោយពេលកើតហេតុរថយន្តបង្កបានបើកថយក្រោយ​ តែបែបជាបុកជាមួយរថយន្តមួយគ្រឿងទៀត​ ដែលបានបើកឡើងលើស្ពាន​ ហើយរថយន្តបង្កបានបើកទៅមុខក៏បានបុកជាមួយនឹងរថយន្តមួយគ្រឿងទៀត​ ទើបមិនអាចទៅមុខបាន​ ។

ក្រោយពីកើតហេតុ​សមត្ថកិច្ចបានចុះមកវាស់វែងយករថយន្ត​ និងម៉ូតូទៅរក្សាទុកនៅការិយាល័យនគរបាលចរាចរផ្លូវគោករាជធានីភ្នំពេញ រង់ចាំដោះស្រាយសំណងជាក្រោយ៕

ដោយ៖ ជ្រោយពេជ្រ