ភ្នំពេញ៖ លោកយាយ ស៊ិន សាម៉ាដឹកឆូ ដែលជាគ្រូសិល្បៈបុរាណប្រចាំនៅសាលាវិចិត្រសិល្បៈ និងធ្លាប់មានស្នាដៃជាច្រើននោះ បាននឹងកំពុងតែញាំញីដោយជំងឺដែលរួមរិតធ្វើឲ្យរូបរាងកាយស្គមស្គាំងមានតែស្បែកដណ្តប់ឆ្អឹង។
ថ្នាក់ដឹកនាំសមាជិកសមាគមសិល្បករខ្មែរ បានធ្វើដំណើរសាកសួរសុខទុក្ខអ្នកគ្រូ ស៊ិន សាម៉ាដឹកឆូ ស្ថិតនៅគេហដ្ឋានជាន់ទី១តូចចង្អៀតនាសង្កាត់ផ្សារកណ្តាល ខណ្ឌដូនពេញ រាជធានីភ្នំពេញ ។ នៅផ្ទះដែលមិនមានរបស់អ្វីមានតម្លៃ ក្រៅតែពីលិខិតសរសើរមួយចំនួនដែលព្យូរនៅលើជញ្ជាំង ។ អ្វីដែលធ្វើឲ្យគេនឹកសង្វេក គឺលោកយាយ ស៊ិន សាម៉ាដឹកឆូ ដែលជាសាស្ត្រាចារ្យផ្នែកសិល្បៈបុរាណបានសម្រាកសម្រាន្តជាប់នៅនឹងកន្ទេលក្រោកពុំរួច។
លោកយាយបញ្ជាក់ដោយសំឡេងមុតស្រួយថា លោកយាយបាន ចំណាយពេលស្ទើរពេញមួយជីវិតចុងក្រោយដើម្បីការងារសិល្បៈពិសេសលើការជួយបណ្តុះបណ្តាលក្មេងៗជំនាន់ក្រោយពោលគឺចាប់តាំងពីបញ្ចប់សម័យប៉ុលពតម្ល៉េះ។
ពេលនេះលោកយាយមានវ័យ៧៥ឆ្នាំហើយហើយកន្លងមក លោកយាយគឺជាសាស្ត្រាចារ្យដែលបានរៀនចប់ កម្រិតអនុបណ្ឌិតផ្នែករបាំបុរាណនិងចម្រៀងបុរាណ ហើយបានបម្រើការនៅក្នុងនាយកដ្ឋានសិល្បៈទស្សនីយភាពរបស់ក្រសួង វប្បធម៌ ដោយមាននាទីបង្ហាត់បង្រៀនសិស្សនៅក្នុងសាលាវិចិត្រសិល្បៈ ។
លោកយាយរៀបរាប់ថា លោកយាយជាគ្រូបង្ហាត់ផ្នែករបាំបុរាណ ដូចជារបាំស្វា តួនេនរោង ល្ខោនខោល បង្ហាត់ច្រៀងបុរាណ ចម្រៀងសម្រាប់របាំបុរាណ មហោរី ស្មូតកំណាព្យនិងចម្រៀងប្រពៃណីគ្រប់ជំនាន់។
ក្រៅពីនេះលោកយាយក៏ជាអ្នកនិពន្ធចម្រៀង និពន្ធកំណាព្យ អត្ថបទស្មូត្រ និងសាច់រឿងល្ខោនដែលមានស្នាដៃរាប់មិនអស់សម្រាប់សិស្សនៅ សាលាវិចិត្រសិល្បៈនិងក្រសួងវប្បធម៌ផងដែរ ។
លោកយាយប្រាប់ដែរថា បច្ចុប្បន្នមានតារាសម្ដែងនិងតារាចម្រៀងល្បីឈ្មោះជា ច្រើននៅក្នុងពិភពសិល្បៈធ្លាប់ទទួលបានការបណ្ដុះបណ្ដាល ដោយផ្ទាល់ពីលោកយាយដែរ។
បញ្ជាក់ពីមូលហេតុដែលនាំ មានរូបរាងកាយស្គមស្គាំងសល់ស្បែកដណ្ដប់ឆ្អឹងនេះ គឺដោយសារលោកយាយហើមសរសៃធ្ងន់ធ្ងរអស់ប្រមាណជា៤ឆ្នាំមកហើយនិងស្របពេលដែលមិនមានលទ្ធភាពទៅទទួលការព្យាបាលពីក្រុមគ្រូពេទ្យ ជំនាញផង លោកយាយក៏ធ្លាក់ខ្លួនដើរលែងរួច ហើយស្វិតខ្លួនសល់តែស្បែកនិងឆ្អឹងប្រមាណជាងមួយឆ្នាំចុងក្រោយនេះ ។
លោកយាយបញ្ជាក់ថា ពីមុនលោកយាយគ្រាន់តែស្គមទេ ប៉ុន្តែអាចដើរបាន ដោយលោកយាយនៅតែទៅបង្ហាត់សិស្ស និងហៅសិស្សមករៀនច្រៀង មករៀនរបាំដល់ផ្ទះបាននៅឡើយទេ គឺទើបតែជិតមួយឆ្នាំចុងក្រោយនេះទេ ដែលជំងឺប្រែទៅជាធ្ងន់ក្បាលរហូតងើបមិនរួច។ ក្រៅពីនោះ លោកយាយក៏មានសភាពរលាកខ្នងនិងមានអាការៈចុងឆ្អឹងខ្នង ត្រង់កន្លែងដែលឆ្អឹងកោងខ្លាំងដែលទំនងមកពីលោកយាយ ប្រឹងរាំរបាំស្វាពេកនិងខំចំកោងខ្នងក្នុងពេលបង្ហាត់របាំ ដល់សិស្សច្រើនឆ្នាំ ។
បញ្ជាក់ក្នុងឱកាសដឹកនាំសមាជិកសមាគមសិល្បករខ្មែរចុះសួរសុខទុក្ខ គ្រូសិល្បៈបុរាណរូបនេះដែរប្រធានសមាគមសិល្បករខ្មែរ លោក សុះ ម៉ាច បានប្រកាសថានឹងបើកយុទ្ធនាការគៀរគររក ជំនួយជួយដល់លោកយាយបន្ថែមពីលើថវិកាចំនួន២០០ដុល្លារដែលខាង សមាគមចុះយកទៅឲ្យ ដើម្បីសម្រួលការលំបាកដល់លោកយាយ ស៊ិន សាម៉ាដឹកឆូ។
លោកបញ្ជាក់ថា ទោះបីជាសមាគមមិនមានលទ្ធភាពជួយឱ្យបានច្រើនជាដុំកំភួនក៏អាចកៀរគររកសប្បុរសជន ដើម្បីជួយបន្តបន្ទាប់ផងដែរ ។ សូមឱ្យនាំគ្នាថែរក្សាសម្បត្តិមរតកមនុស្សរស់ ។ សមាគមសិល្បករខ្មែរមិនដែលព្រងើយកន្តើយដោយមិនឈឺឆ្អាលចំពោះព្រឹទ្ធាចារ្យនោះទេយើងកំពុងតែនាំគ្នាគិតគូនិងជ្រើសរើសបន្តទៀតក្នុងការចុះសួរសុខទុក្ខសិល្បករផ្សេងតាមគម្រោយដោយមិនដកថយ ។
សមាជិកក្នុងក្រុមប្រឹក្សាភិបាលសមាគមសិល្បៈករខ្មែរ លោក កុយ ស៊ីឌឿន បញ្ជាក់ដែរថាលោកក៏ជាអតីតសិស្សនៅសាលាវិចិត្រសិល្បៈផ្នែកល្ខោន បាសាក់និងល្ខោននិយាយ បានលើកឡើងថាលោកយាយគឺសាស្ត្រាចារ្យសិល្បៈបុរាណដ៏ល្បីដែលគ្មានអ្នកណា មិនស្គាល់នោះទេ សម្រាប់អ្នករៀននៅសាកលវិទ្យាល័យវិចិត្រសិល្បៈ។ លោកនិយាយថាគាត់មិនគួរមកឈឺពិបាកម្នាក់ឯងដូចនេះទេ ព្រោះគាត់ធ្លាប់សាងស្នាដៃច្រើនណាស់ខាងផ្នែកសិល្បៈបុរាណ ។
អ្នកនាងចាន់ តារាទី អតីតសិស្សសាលាវិចិត្រសិល្បៈផ្នែកយីកេ បានអះអាងថាលោកយាយជាគ្រូរបស់ខ្លួនដែលមានទេពកោសល្យសិល្បៈបុរាណ ពេញខ្លួនគួរឲ្យស្ងើចសរសើរ ដោយក្រៅពីចេះគ្រប់ទម្រង់សិល្បៈបុរាណ ក៏អាចច្រៀងចម្រៀងរបាំបុរាណបានពីរោះនិងជាអ្នកជំនាញផ្នែកតុបតែងសំលៀកបំពាក់និងគ្រឿងលម្អបែបបុរាណដល់អ្នកសិល្បៈផងដែរ ៕ វឌ្ឍនា
