ខេត្តសៀមរាប៖ នៅព្រឹកថ្ងៃទី៥ ខែឧសភា ឆ្នាំ២០១៦នេះ កាកបាទក្រហមខេត្តសៀមរាប ប្រារព្ធខួបលើកទី១៥៣ ទិវាពិភពលោកកាកបាទក្រហម អឌ្ឍច័ន្ទក្រហម៨ ឧសភា ឆ្នាំ២០១៦ ដោយមានការចូលរួមពីលោកនាយឧត្តមសេនីយ៍ ទៀ បាញ់ ឧបនាយករដ្ឋមន្រ្តី រដ្ឋមន្រ្តីការពារជាតិ និងលោកស្រី និងថ្នាក់ដឹកនាំកាកបាទក្រហមខេត្ត ព្រមទាំងសប្បុរសជនជាច្រើនរូបផងដែរ ។
ការប្រារព្ធទិវាពិភពលោកកាកបាទក្រហម អឌ្ឍច័ន្ទក្រហម នៅខេត្តសៀមរាប ទទួលបានថវិកាជាង៥៥មឺុនដុល្លារ ។
ប្រធានកិត្តិយសកាកបាទក្រហមខេត្តសៀមរាប លោក ឃឹម ប៊ុនសុង បានថ្លែងថា វិសាលភាពប្រតិត្តិការ របស់កាកបាទក្រហមកម្ពុជា មានទំហំធំឡើងៗ ជារៀងរាល់ឆ្នាំ ដើម្បីប្រសិទ្ធភាពនៃការបន្តផ្តល់សេវាមនុស្សធម៌ ជួយដល់ជនងាយរងគ្រោះ និងជនរងគ្រោះ ដោយគ្រោះមហន្តរាយ និង ឧបទ្ទវហេតុផ្សេងៗ ជាពិសេសបង្កដោយការប្រែប្រួលអាកាសធាតុ ។
លោកនាយឧត្តមសេនីយ៍ ទៀ បាញ់ បានអំពាវនាវដល់សប្បុរសជនជាតិ អន្តរជាតិជួយឧបត្ថមគាំទ្រ និងបរិច្ចាគសម្ភារៈថវិកាដល់កាកបាទក្រហមកម្ពុជា ដើម្បីយកទៅប្រើប្រាស់ចែករំលែកដល់ជនរងគ្រោះ ងាយរងគ្រោះ និងពលរដ្ឋជួបគ្រោះថ្នាក់ដោយយថាហេតុផ្សេងៗ ៕
ដោយ៖ សុខ ខេមរា
