ភ្នំពេញ៖ កាលពីព្រឹកថ្ងៃទី៧ ខែឧសភា ឆ្នាំ២០១៦ ស្ថានទូតសហពអឺរ៉ុបបានប្រារព្ធទិវាថ្ងៃទី៩ ខែឧសភា ឆ្នាំ១៩៥០-ថ្ងៃទី៩ ខែ ឧសភា ឆ្នាំ២០១៦ ដើម្បីរំលឹកនូវសេចក្តីថ្លែងការណ៍ប្រវត្តិសាស្ត្ររបស់លោក Robert Schuman រដ្ឋមន្ត្រីការបរទេសបារាំងដែលជាថ្ងៃបើកទំព័រនៃការកសាងសហភាពអឺរ៉ុបក្រោយពីសង្គ្រាមលោកលើកទី២ក្រោម ប្រធានបទ “រួមគ្នាដើម្បីផែនដី” ដោយមាន ការអញ្ជើញជាអធិបតីពី លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡាលោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជាលោកស្រី ម៉ក់ វណ្ណស៊ីថា អភិបាលរងរាជធានីភ្នំពេញ ដែលគណៈអធិបតីទាំងអស់បានចូលរួមជិះកង់ចម្ងាយផ្លូវជាង១០គីឡូម៉ែត្រក្នុង ចំណោមអ្នកជិះកង់ជាង៤.០០០នាក់បាន ជិះឆ្លងកាត់តាមស្ថានទូតនានាដែលជា សមាជិកសហភាពអឺរ៉ុប កំពុងមានវត្តមានលើទឹកដីព្រះរាជាណាចក្រកម្ពុជា ។
លោក George Edgar មានប្រសាសន៍ ថា ឆ្នាំនេះយើងបានជ្រើសរើសប្រធានបទ “រួមគ្មានដើម្បីផែនដី” តាមរយៈការជិះកង់ ពីព្រោះកង់គឺជាមធ្យោបាយធ្វើដំណើរដ៏ល្អគ្នាផ្សែង ។ ម្យ៉ាងវិញទៀត ការប្រែប្រួល អាកាសធាតុគឺជាកត្តាធំមួយនិងជាបញ្ហាប្រឈមរបស់ប្រជាពលរដ្ឋកម្ពុជានាពេលបច្ចុប្បន្ន ហើយវាកាន់តែអាក្រក់បើយើងមិនធ្វើអ្វីមួយដើម្បីទប់ទល់ជាមុននោះទេ ។
លោក George Edgar បានបញ្ជាក់ថា រាជរដ្ឋាភិបាលកម្ពុជាបានចូលរួមជាមួយសម្ព័ន្ធប្រែប្រួលអាកាសធាតុសកលរបស់សហភាពអឺរ៉ុប (European Union’s Global Climate Change Alliance)ដោយសារតែ រដ្ឋាភិបាលបានដឹងយ៉ាងច្បាស់ពីបញ្ហា ប្រឈមដ៏ធំធេងព្រមទាំងបានធ្វើការយ៉ាងសកម្មភាពទាំងក្នុងស្រុកនិងនៅលើឆាក អន្តរជាតិ ពីព្រោះប្រទេសកម្ពុជាគឺជាប្រទេសសម្បូរជីវចម្រុះ ហើយសហភាពអឺរ៉ុបបានប្តេជ្ញាចិត្តក្នុងការគាំទ្រដល់ប្រទេសកម្ពុជា ក្នុងការគ្រប់គ្រងធនធានធម្មជាតិរបស់ខ្លួន ដើម្បីសម្របខ្លួនទៅនឹងការប្រែប្រួលអាកាសធាតុ។
លោកបានបញ្ជាក់ជាថ្មីម្តងទៀតថា កម្ម វិធីជិះកង់កម្សាន្តក្នុងរាជធានីភ្នំពេញក្រោមប្រធានបទរួមគ្នាដើម្បីផែនដីនេះមានអ្នក ចូលរួមប្រមាណ៤,០០០នាក់ដោយចេញដំណើរពីមុខវិមានពហុកីឡដ្ឋានជាតិអូឡាំពិកឆ្លងកាត់ស្ថានទូតដែលជាសមាជិកសហភាពអឺរ៉ុបដែលវត្តមាននៅក្នុងព្រះរាជាណាចក្រកម្ពុជាហើយបានបញ្ចប់នៅវេលាម៉ោង ១០ព្រឹកថ្ងៃទី៩ខែឧសភាឆ្នាំ២០១៦នៅ ពហុកីឡដ្ឋានជាតិអូឡាំពិក ។
ដោយឡែកលោក ហង់ ជួនណារ៉ុន មានប្រសាសន៍ថាចំពោះកម្មវិធីជិះកង់ក្រោម ប្រធានបទរូមគ្នាដើម្បីផែនដីនេះពិតជាមានសារប្រយោជន៍សំខាន់ខ្លាំងណាស់ ។ លោក សូមគាំទ្រចំពោះព្រឹត្តិការណ៍ជិះកង់ដ៏មានអត្ថន័យដែលរៀបចំដោយស្ថានទូតសហភាពអឺរ៉ុប និងគណៈកម្មការស្ត្រី និងកីឡា សហការជាមួយសាលារាជធានីភ្នំពេញនេះ ៕
ដោយ៖ សារីម
