ខេត្តស្វាយរៀង៖ បុរស២នាក់រងរបួសបែកក្បាលបាក់ជើងហូរឈាមរណូករណែលពេញផ្លូវគួរឲ្យរន្ធត់ខណៈដែលបើកជែងរថយន្តកុងតឺន័រមួយគ្រឿងស្របទិសគ្នាក៏បះដៃចង្កូត កាលពីវេលាម៉ោង៩ និង១០នាទីយប់ថ្ងៃទី១១ ខែឧសភា ឆ្នាំ២០១៦ នៅលើផ្លូវជាតិលេខ១ ស្ថិតនៅក្នុងភូមិកំពោតប្រស់ សង្កាត់ច្រកម្ទេស ក្រុងបាវិត ខេត្តស្វាយរៀង។
យោងតាមសមត្ថកិច្ចនគរបាលក្រុងបាវិតបានឲ្យដឹងថា មានម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខស្វាយរៀង1H-6148 បើកបរដោយឈ្មោះមាស វត្ថា អាយុ២៥ឆ្នាំ មុខរបរកម្មករ មានទីលំនៅភូមិលាប ឃុំកណ្ដៀងរាយ ស្រុកស្វាយទាប ខេត្តស្វាយរៀង បើកបរពីលិចទៅកើត មានឌុបអ្នករួមដំណើរម្នាក់ឈ្មោះយស់ ចំរើន អាយុ២២ឆ្នាំ មុខរបរកម្មករ រស់នៅភូមិលៀប ឃុំកណ្ដៀងរាយ ស្រុកស្វាយទាប ខេត្តស្វាយរៀង លុះមកដល់ចំណុចកើតហេតុខាងលើ ក៏បុកប៉ះនិងរថយន្តកុងតឺន័រ មួយគ្រឿឹងម៉ាកNISSAN DIESEL ពណ៌បៃតង ពាក់ស្លាកលេខភ្នំពេញ3B-6855 បើកបរពីលិចទៅកើតបណ្ដាលឲ្យអ្នកបើកបរម៉ូតូទាំង២នាក់រងរបួសធ្ងន់។
ក្រោយពេលកើតហេតុអ្នកបើកបររថយន្តមិនត្រូវស្គាល់ឈ្មោះបានបើកទ្វាររថយន្តរត់គេចបាត់ស្រមោល។
បច្ចុប្បន្នជនរងគ្រោះទាំង២ត្រូវបានបញ្ជូនទៅព្យាបាលនៅមន្ទីរពេទ្យខេត្តស្វាយរៀង រីឯវត្ថុតាងទាំង២គ្រឿង រក្សាទុកនៅប៉ុស្ដិ៍នគរបាលរដ្ឋបាលសង្កាត់ច្រកម្ទេស ដើម្បីបំពេញសំណុំរឿងតាមច្បាប់៕
ដោយ៖ យឹម សុថាន
...
