ភ្នំពេញ៖ ឃ្លាំងស្តុកស្រាបៀរហ្គេនស៍បឺគបានឆ្លងចរន្តអគ្គិសនីឆាបឆេះបង្កឲ្យមានការភ្ញាក់ផ្អើលប្រជាពលរដ្ឋនៅក្បែរនោះទាំងថ្ងៃ ។ ហេតុការណ៍នេះបណ្តាលឲ្យរថយន្តខូចខាត២គ្រឿង និងស្រាបៀរជាច្រើនកេះ។ ហេតុការណ៍បានកើតឡើងកាលពីវេលាម៉ោង២និង១៥នាទីរសៀល ថ្ងៃទី២៥ ខែកក្កដា នៅចំណុចឃ្លាំងស្តុកស្រាបៀរហ្គេនស៍បឺគ ស្ថិតនៅតាមផ្លូវលេខ៣២៤ សង្កាត់បឹងស្រឡាង ខណ្ឌទួលគោក រាជធានីភ្នំពេញ ។
ក្រោយពីហេតុការណ៍ភ្ញាក់ផ្អើល ដឹងព័ត៌មានដល់សមត្ថកិច្ច នគរបាលមូលដ្ឋានបានបញ្ជូនរថយន្តពន្លត់អគ្គិភ័យដែលប្រចាំការនៅអធិការដ្ឋាននគរបាលខណ្ឌទួលគោកចេញមកអន្តរាគមន៍បាញ់ទឹកពន្លត់អស់មួយគ្រឿង ព្រមទាំងមានការជួយអន្តរាគមន៍ពីប្រជាពលរដ្ឋដោយបាញ់បំពង់ពន្លត់អគ្គិភ័យផងដែរ ទើបភ្លើងដែលឆាបឆេះនោះរលត់ទាំងស្រុង ។
ហេតុការណ៍នេះបណ្តាលឲ្យរថយន្តពីរគ្រឿង និងស្រាបៀរជាច្រើនកេះរងការខូចខាត។ រថយន្តមួយគ្រឿងឆាបឆេះនៅផ្នែកខាងក្រោយ មួយគ្រឿងទៀតឆាបឆេះនៅកាប៊ីនខាងមុខ ៕ ស ដារ៉ា
