កំពង់ឆ្នាំង ៖ សម្ដេចចៅហ្វាវាំងវរវៀងជ័យ អធិបតីស្រឹង្គារ៍ គង់ សំអុល ឧបនាយករដ្ឋមន្រ្ដី រដ្ឋមន្រ្ដីក្រសួងព្រះបរមរាជវាំង និងជាព្រះរាជ តំណាងដ៏ខ្ពង់ខ្ពស់របស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហា ក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិ ខ្មែរ ព្រមទាំង មន្រ្ដីក្រោមឱវាទ បានអញ្ជើញជួបសំណេះសំណាល សួរសុខទុក្ខ និងនាំយកនូវទឹក ស្អាត ចែកជូនដល់បងប្អូនប្រជាពលរដ្ឋ ដែលកំពុងរងគ្រោះ ដោយគ្រោះរាំងស្ងួត ហើយបាននិងកំពុងតែ ខ្វះខាតទឹក សម្រាប់យកទៅប្រើប្រាស់ប្រចាំថ្ងៃចំនួន១៨១៩គ្រួសារ ស្ថិតនៅស្រុកជលគិរី ខេត្ដកំពង់ឆ្នាំង កាលពីរសៀល ថ្ងៃទី១៣ ឧសភា ឆ្នាំ២០១៦ ។
ក្នុងឱកាសនោះ សម្ដេចចៅហ្វាវាំង គង់ សំអុល បានមានប្រសាសន៍ថា ការនាំយកទឹកស្អាត និង ទឹកសុទ្ធ មកចែកជូនបងប្អូនប្រជាពលរដ្ឋនាពេលនេះ គឺជាព្រះរាជអំណោយរបស់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី ព្រះវររាជមាតាជាតិខែ្មរ ដែលមានទឹកស្អាតចំនួន ៣០០០០លីត្រ និងទឹកបរិសុទ្ធចំនួន ២០០ កេស ដើម្បីយកមកចែកជូនបងប្អូនប្រជាពលរដ្ឋ ជាកូនចៅ ចៅទូត របស់ព្រះអង្គ ដែលកំពុងជួបប្រទះការខ្វះខាតទឹកស្អាតប្រើប្រាស់។
សម្ដេចចៅហ្វាវាំងព្រះរាជតំណាងព្រះមហាក្សត្រក៏បានពាំនាំយកព្រះរាជបណ្ដាំសាកសួរសុខទុក្ខ និងព្រះរាជហរទ័យអាណិតស្រលាញ់ និងសេចក្ដីនឹករលឹកគ្រប់ពេលវេលាយ៉ាងជ្រាលជ្រៅបំផុតរបស់ សម្ដេចព្រះមហាក្រត្រី ព្រះបវររាជមាតាជាតិខ្មែរ និងពីសំណាក់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហា ក្សត្រនៃព្រះរាជា ណាចក្រកម្ពុជាជាទីសក្ការៈដ៏ខ្ពង់ខ្ពស់បំផុត ជូនចំពោះបង ប្អូនប្រជាពលរដ្ឋនៅទូទាំងប្រទេស ពិសេសបងប្អូនរស់នៅក្នុងស្រុកជលគិរី ខេត្ដកំពង់ឆ្នាំង។
សម្ដេចចៅហ្វាវាំងក៏បានណែនាំដល់ថ្នាក់ដឹកនាំខេត្ដ រួមទាំងអាជ្ញាធរដែនដីគ្រប់លំដាប់ថ្នាក់ ត្រូវយកចិត្តទុកដាក់ និងខិតខំរិះរកមធ្យោបាយឱ្យអស់លទ្ធភាពដែលខ្លួនមាន ដើម្បីជួយដល់បងប្អូនប្រជាពលរដ្ឋ នៅក្នុងទឹកដីមូលដ្ឋានរបស់ខ្លួន ដែលកំពុងជួបប្រទះការខ្វះខាតទឹកប្រាស់គ្រប់គ្រាន់។
ជាមួយគ្នានេះ សម្ដេចចៅហ្វាវាំង ព្រះរាជតំណាងដ៏ខ្ពង់ខ្ពស់របស់ព្រះមហាក្សត្រក៏បាន សំណូមពរ ដល់បងប្អូនប្រជាពលរដ្ឋ ពេលមានភ្លៀងធ្លាក់ ត្រូវបន្ដយកចិត្តទុកដាក់ ថែរក្សាការពារទឹកទុក សម្រាប់ប្រើ ប្រាស់ប្រចាំថ្ងៃ ពិសេសរដូវវស្សាបានឈានចូលមកដល់ហើយ ត្រូវមានការប្រុងប្រយ័ត្នខ្ពស់ចំពោះផ្គរ រន្ទះ និងខ្យល់កន្ដ្រាក់ អាចមានបាតុភូតកើតឡើងគ្រប់ពេលវេលា ពេលមានភ្លៀងធ្លាក់។
តំណាងគ្រួសារប្រជាពលរដ្ឋ ដែលទទួលបានព្រះរាជអំណោយ បានថ្លែងអំណរព្រះគុណយ៉ាង ជ្រាលជ្រៅជាទីបំផុតចំពោះព្រះរាជទានដ៏ថ្លៃថ្លានេះ និងសូមបួងសួងវត្ថុស័ក្ដិសិទ្ធិក្នុងលោក ថ្វាយព្រះសព្វ សាធុការពរជ័យ ថ្វាយព្រះករុណា ព្រះមហាក្សត្រនៃព្រះរាជា ណាចក្រកម្ពុជា និងសម្ដេចព្រះមហាក្សត្រី ព្រះវររាជមាតាជាតិ សម្ដេចម៉ែ សម្ដេចយាយ សម្ដេចយាយទូត ជាទីសក្ការៈដ៏ខ្ពង់ខ្ពស់បំផុត សូមព្រះអង្គ ប្រកបតែនឹងព្រះបរមសុខគ្រប់ ប្រការ មានព្រះរាជសុខភាពល្អបរិបូរណ៍ ព្រះកាយពលមាំមួន និងសូមមាន ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់នៅជាម្លប់ដ៏ត្រជាក់ដល់កូនចៅ ចៅទូតរបស់ព្រះអង្គ ជាដរាបរៀងតទៅ។
បន្ទាប់មក សម្ដេចចៅហ្វាវាំង វរវៀងជ័យ អធិបតីស្រឹង្គារ៍ គង់ សំអុល ឧបនាយករដ្ឋមន្រ្ដី រដ្ឋមន្រ្ដី ក្រសួងព្រះបរមរាជវាំង និងជាព្រះរាជតំណាងដ៏ខ្ពង់ខ្ពស់របស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចុះពិនិត្យការដ្ឋានជីកស្រះនៅស្រុកជលគិរី ខេត្ដកំពង់ឆ្នាំង ដែលមានទទឹង១០០ម៉ែត្រ បណ្ដោយ១២០ម៉ែត្រ និងមានជម្រៅ២,៥ម៉ែត្រ ដែលជាព្រះរាជ អំណោយរបស់ព្រះករុណា ព្រះមហាក្សត្រនៃព្រះរាជាណាចក្រកម្ពុជា។
សូមបញ្ជាក់ថា ៖ ការចុះសួរសុខទុក្ខ និងនាំយកនូវទឹកស្អាត ចែកជូនដល់បងប្អូនប្រជា ពលរដ្ឋ ដែល កំពុងរងគ្រោះ ដោយគ្រោះរាំងស្ងួត ហើយបាននិងកំពុងតែ ខ្វះខាតទឹក សម្រាប់យកទៅប្រើប្រាស់ប្រចាំ ថ្ងៃចំនួន ១៨១៩គ្រួសារ ស្ថិតនៅស្រុកជលគិរី ខេត្ដកំពង់ឆ្នាំង របស់សម្ដេចចៅហ្វាវាំង វរវៀងជ័យ អធិបតី ស្រឹង្គារ៍ គង់ សំអុល នាពេលនេះ គឺស្របពេលដែលព្រះរាជពិធីបុណ្យចម្រើនព្រះជន្ម ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់ខួប៦៣ យាងចូល ៦៤ព្រះវស្សា៕ ដោយ ៖
សុខ ខេមរា
