ភ្នំពេញ៖ សង្គមសម្ភារនិយម និងអំណាចទឹកប្រាក់បានជះឥទ្ធិពលយ៉ាងឆាប់រហ័ស មកលើគ្រួសារក្រីក្រ ដែលធ្វើឲ្យគ្រួសារមួយបានធ្លាក់ចូលក្នុងរណ្តៅអវិចី ដោយសារការលោភលន់របស់ឪពុកម្តាយ ដើម្បីបំពេញនូវសេចក្តីត្រូវការមិនចេះចប់ បានលះបង់កូនស្រីរបស់ខ្លួនឲ្យទៅពួកអ្នកមានប្រាក់ពោលគឺអាណិកជន ឬជនបរទេសដោយពុំបានដឹងពីប្រវត្តិគេជាមុនឲ្យបានច្បាស់លាស់ផង។ ទីបំផុតពួកគាត់បានត្រឹមតែទឹកភ្នែកជូតក្បាលជង្គង់ប៉ុណ្ណោះ សល់ត្រឹមតែភាពសោកស្ដាយ និងវិប្បដិសារីនៅជាប់ខ្លួនអស់មួយជីវិត។
នារីម្នាក់ឈ្មោះ សុគន្ធា អាយុ១៩ឆ្នាំ រស់នៅខេត្តបន្ទាយមានជ័យ ហើយត្រូវបានជនបរទេស ដែលប្រើទឹកប្រាក់បោកប្រាស់បាននាំនាងឲ្យអណ្ដែត្រសែតឃ្លាតចាកស្រុកកំណើត មកដល់ភ្នំពេញទម្លាយរឿងអាថ៌កំបាំងជីវិតពិតរបស់នាងប្រាប់ឲ្យអ្នកសារព័ត៌មានដឹងថា នាងជាកូនទី១ក្នុងចំណោមបងប្អូន៣នាក់។ នាងថា កាលពីនាងអាយុ១៨ឆ្នាំរស់នៅក្នុងបន្ទុកឪពុកម្តាយដែលប្រកបមុខរបរធ្វើស្រែចម្ការ និងម្តងម្កាល បានដើរគួកជេដី។ ចាប់តាំងពីពួកគាត់ដើរគួកជេដីមកឪពុកម្តាយនាង ក៏បានស្គាល់ថៅកែទិញដីជាអាណិកជនខ្មែរដែលរស់នៅសហរដ្ឋអាមេរិកម្នាក់ ហើយក៏មានទំនាក់ទំនងគ្នាយ៉ាងញឹកញាប់។ លុះពេលប្រកបមុខរបរនេះយូរៗទៅធ្វើឲ្យគ្រួសារទាំងពីរមានទំនាក់ទំនងគ្នាល្អ “ដូចទឹក និងត្រី” ឬ “បបូរមាត់ និងធ្មេញ ”។ ពេលនោះចាស់ៗក៏បានផ្គូរផ្គង នាងជាគូទៅនឹងកូនប្រុសថៅកែ អណិកជននោះ ។
នាងបានរៀបរាប់បន្តថា នៅពេលដែលគ្រួសារនាង និងគ្រួសារអាណិកជននោះចងសម្ព័ន្ធមេត្រីភាពឲ្យស្រឡាញ់កូនប្រុសគេជាគូអនាគត ពេលនោះនាងទើបតែអាយុ១៨ឆ្នាំតែប៉ុណ្ណោះ ពុំដែលស្គាល់អ្វីទៅហៅថា ស្នេហានោះទេ ពោលគឺពុំទាន់ចេះស្រឡាញ់ប្រុសណាម្នាក់ឡើយ។ តែដោយគិតថា “នំមិនធំជាងនាឡិ៍” ទើបនាងបានសម្រេចចិត្តគោរពប្រតិបត្តិតាមសម្ដីរបស់ឪពុកម្ដាយ ដែលជាអ្នកមានគុណ។ ក្រោយមកមិនយូរប៉ុន្មានថៅកែទិញដី និងភរិយា ព្រមទាំងកូនកំលោះ ក៏បានមកដល់ភ្នំពេញ ហើយក៏បានចូលស្តីដណ្តឹងនាងតាមប្រពៃណីខ្មែរឲ្យទៅកូនប្រុសរបស់គេ។ និយាយមកដល់ត្រង់ចំណុចនេះ នាងគន្ធាក៏ចាប់ផ្ដើមអួលណែនដើម.ក ដំណក់ទឹកភ្នែកក៏រមៀលស្រក់មក។
នាងបន្ដថា លុះចប់ពិធីស្តីដណ្តឹងក្រុមគ្រួសាររបស់ថៅកែអណិកជននោះក៏បានធ្វើដំណើរ មកផ្ទះនាង ហើយស្នាក់នៅទីនោះមួយយប់។ លុះព្រឹកឡើងថ្ងៃបន្ទាប់ថៅកែ បានលួងលោមបបួលនាងទៅដើរកម្សាន្ត ដោយលើកហេតុផលថា នាងនិងកូនគាត់ជាគូដណ្ដឹងនឹងគ្នា និងដោយគោរពតាមសម្ដីរបស់ឪពុកម្ដាយ នាងក៏មិនហ៊ានបដិសេធអ្វីឡើយ ហើយក៏ទៅជាមួយគូដណ្តឹង ព្រមទាំងឪពុកម្តាយគេ។ តែពេលនោះគេមិនបាននាំនាងទៅនៅទីរួមខេត្តដូចពាក្យដែលបានសន្យា គឺគេបង្ហួសរថយន្តទៅលេងខេត្តឆ្ងាយៗដូចជាកំពត កំពង់សោម ព្រៃវែង ស្វាយរៀង បាវិត និងកំពង់ចាម អស់រយៈពេលមួយខែ។ ពេលនោះហើយដែលនាងត្រូវធ្លាក់ចូលក្នុងអន្ទាក់តណ្ហាដោយមិនដឹងខ្លួន សូម្បីតែទំនាក់ទំនងទៅឪពុកម្តាយ ឬទូរស័ព្ទក៏ត្រូវហាមឃាត់ដែរ។ ពេលនោះគេបង្ខំឲ្យខ្ញុំធ្វើជាទាសីតណ្ហាដោយមិនគិតពីតម្លៃកេរ្តិ៍ឈ្មោះ និងកិត្តិយស ភាពថ្លៃថ្នូរអ្វីឡើយ។
ក្រោយពីនោះមកគេក៏បាននាំនាងទៅកាន់ព្រលានយន្តហោះ ដោយគេប្រាប់ថានឹងនាំនាងទៅជាមួយដែរ។ គេនិយាយថា គេរត់ការសំណុំបែបបទរួចហើយ។ ប៉ុន្តែពាក្យនាងថា សម្ដីទាំងនេះគ្រាន់តែជាពាក្យភូតភរប៉ុណ្ណោះ ព្រោះនាងមិនដែលទៅសម្ភាសន៍នៅស្ថានទូតអាមេរិកផង ធ្វើម្តេចទៅនៅស្រុកគេកើត។ ឆ្លៀតឱកាសល្អពេលមកដល់ព្រលានយន្តហោះនាងក៏លួចរត់តែម្តង។
នាងបានបញ្ជាក់ថា ដោយសារ តែឥទ្ធិពលដុល្លារធ្វើឲ្យនាងស្គាល់សង្គមខាងក្រៅ ស្គាល់ការលួងលោមសុំស្រឡាញ់បោកប្រាស់គ្រប់បែបយ៉ាង ហើយធ្វើឲ្យគ្រួសារនាង និងរូបនាងបានជួបវិប្បដិសារីអស់មួយជីវិត។
នាងសួរខ្លួនឯងថា បើដល់ដំណាក់កាលនេះទៅហើយ តើត្រូវធ្វើយ៉ាងណាបើគ្រប់យ៉ាងដែលកើតឡើង គឺសុទ្ធតែដោយការបង្ខិតបង្ខំរបស់ឪពុកម្តាយទាំងអស់នោះនោះ? នាងបានដំឡើងសំឡេង ហាក់ចង់បញ្ចេញភាពឈឺចាប់ឲ្យអស់ពីខ្លួនថា ពេលនេះខ្ញុំចង់តែសម្លាប់ខ្លួន លែងចង់រស់នៅលើលោកនេះទៀតឡើយ ហើយក៏លែងចង់ឃើញពិភពលោកដែលពេញទៅដោយក្តីឈឺចាប់ខ្លោចផ្សាសម្រាប់ជីវិតខ្ញុំនេះតទៅទៀតដែរ។ តើច្បាប់អាចចាប់មនុស្សប្រើល្បិចបោកប្រាស់ព្រហ្មចារីយ៍ក្មេងស្រីនៅស្រុកស្រែ ដូចជារូបខ្ញុំនេះដែរទេ?
នាងបានផ្ដាំផ្ញើដល់ក្មេងស្រីៗជាច្រើននៅស្រុកស្រែ ថាត្រូវប្រយ័ត្នជួបនឹងអកុសលដូចជារូបនាង។ ដោយសារតែឥទ្ធិពលនៃដុល្លារធ្វើឲ្យអ្នកស្រុកស្រែចម្ការត្រូវបាត់បង់ទំនៀមទម្លាប់ប្រពៃណីខ្មែរបុរាណ ដែលធ្លាប់មានយូរយារណាស់មកហើយនោះ លើសពីនេះទៀត ថែមទាំងធ្វើឲ្យបាត់បង់កិត្តិយសកេរិ៍្ដឈ្មោះ ក្រុមគ្រួសារ ត្រូវរស់នៅក្រោមក្ដីអាម៉ាស់អស់មួយជីវិត ៕ វិបុល
