ភ្នំពេញ៖ រថយន្តឡិចស៊ីសមួយគ្រឿងបើកបរក្នុងល្បឿនយ៉ាងលឿនហើយបានវ៉ាជាមួយនិងរថយន្តផ្សេងទៀតដែលនៅពីមុខ បានជ្រុលទៅបុករថយន្តម៉ាកគារដែលបើកបញ្ច្រាស់ទិសគ្នាចំពីមុខពេញទំហឹង បណ្ដាលឲ្យរថយន្តទាំង២គ្រឿងរងការខូចខាតទាំងសងខាង។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៨ និង២០នាទីយប់ថ្ងៃទី១៦ ខែឧសភា ឆ្នាំ២០១៦ នៅតាមបណ្ដោយផ្លូវជាតិលេខ៥ ស្ថិតក្នុងភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
តាមសាក្សីដែលឃើញហេតុការណ៍ បានប្រាប់ឲ្យដឹងថា ដំបូងគេឃើញរថយន្តម៉ាកគារ ពណ៌ស ពាក់ស្លាកលេខ កោះកុង 2A-0515 បានបើកបរតាមបណ្ដោយផ្លូវជាតិលេខ៥ ទិសដៅពីជើងមកត្បួង ក្នុងល្បឿនមធ្យម ខណៈមកដល់ចំណុចកើតហេតុ ក៏ស្រាប់តែមានរថយន្តបង្កម៉ាកឡិចស៊ីសRX330 ពណ៌ស្រក ពាក់ស្លាកលេខភ្នំពេញ2AG-2118 បានបើកបរតាមបណ្ដោយផ្លូវជាតិលេខ៥ ក្នុងទិសដៅពីត្បួងទៅជើង(ដោយបញ្ច្រាស់គ្នាជាមួយនិងរថយន្តរងគ្រោះ) ខណៈនោះរថយន្តបង្កក៏បានបើកវ៉ាជាមួយនិងរថយន្តផ្សេងទៀតដែលនៅពីមុខ ក្រោយពីវ៉ាផុត ក៏ជ្រុលទៅបុករថយន្តរងគ្រោះចំពីមុខពេញទំហឹង បណ្ដាលឲ្យរថយន្តទាំង២គ្រឿងដាច់កាង និងដាច់កាឡេកង់មុខផ្នែកខាងឆ្វេងដូចគ្នាទៅមុខលែងរួច ចំណែកឯម្ចាស់រថយន្តទាំង២គ្រឿងមិនមានអ្នករងរបួសធ្ងន់ធ្ងរនោះទេ។
ក្រោយពេលកើតហេតុសមត្ថកិច្ចមូលដ្ឋានបានចុះដល់
កន្លែងកើតហេតុ និងបានសម្រួលចរាចរណ៍កុំឲ្យកកស្ទះផងដែរ ហើយភាគីទាំងសងខាងបានសុំធ្វើការសម្របសម្រួលគ្នា ដោយភាគីខាងរថយន្តបង្កឡិចស៊ីសព្រមសងថ្លៃខូចខាតទៅលើរថយន្តរងគ្រោះដោយយល់ព្រមយករថយន្តទៅធ្វើការជួសជុលសង ដើម្បីបញ្ចប់រឿងព្រោះមិនចង់មានបញ្ហាវែងឆ្ងាយ និងមិនចង់ឲ្យមានការរំខានទៅដល់សមត្ថកិច្ចផងដែរ៕
ដោយ៖ ព្រែកជ័យ
