ខេត្តរតនគិរី : បើយោងតាមអង្គភាព មន្ទីរព័ត៌មាន ខេត្តរតនគិរី សូមគោរពរាយការណ៍ជូនរដ្ឋមន្រ្តីក្រសួង ព័ត៌មាន បានអោយដឹងថា, ៖ នៅក្នុងឱកាសនៃពិធីបុណ្យភ្ជុំបិណ្ឌឆ្នាំនេះ យើងសង្កេត ឃើញបងប្អូនប្រជាពលរដ្ឋទាំងក្មេងចាស់ ប្រុសស្រី ដែលគោរពជឿជាក់លើព្រះពុទ្ធសាសនាបានធ្វើដំណើរតាមរយៈរថយន្ត ម៉ូតូ និងខ្លះដោយថ្មើជើងសំរាប់ផ្ទះជិតវត្ត ដៃយួរ ចង្ហាន់មានបាយម្ហូប ផ្លែឈើទឹកក្រូច ទឹកសុទ្ធ គ្រឿងបច្ច័យទាំងបួន ទៅវេរប្រគេនទៅដល់ព្រះសង្ឃដែលគង់នៅក្នុងទីអារាមនានាក្នុងខេត្តរតនគិរីដើម្បីឧទ្ទិសកុលទៅដល់បុព្វការីជន មានជីដូនជីតា បងប្អូន និងញ្ញាត្តិការទាំង៧សណ្តាន ដែលបានចែកឋានទៅលោកខាងមុខហើយនោះរៀងៗខ្លួន។

ខណៈដែលវត្តអារាមនានាមមារញឹកខ្លាំង  ជាមួយពិធីបុណ្យ ភ្ជុំបិណ្ឌ  ដែលមានរយៈពេល១៥ថ្ងៃនេះមានប្រជាពលរដ្ឋខ្មែរ ប្រុសស្រី ចូលរួមប្រតិបត្តិនៅក្នុងពិធីមួយនេះយ៉ាងច្រើន កុះករដែរ ។ ជាក់ស្ដែង ដូចជាឥសាន្តរតនារាមហៅវត្តភ្នំស្វាយដែលជាវត្តមួយនៅក្នុងក្រុងបានលុងក៏មានសភាពមមារញឹកខ្លាំងកំឡុង ពេលបុណ្យភ្ជុំបិណ្ឌនេះដែរ ។ ប្រជាពលរដ្ឋ ដែលចូលរួមនៅក្នុងថ្ងៃដ៏ពិសេសនេះបាន អនុវត្តយ៉ាងខ្ជាប់ខ្ជួននូវ សីលធម៌  និង ទំនៀមទម្លាប់ ដែលខ្មែរមានតាំងពីបុរមបុរាណមក។ នៅក្នុងពិធីបុណ្យភ្ជុំបិណ្ឌនាឆ្នាំនេះ បើទោះជាខេត្តរតនគិរីមានភ្លៀងធ្លាក់ជារៀងរាល់ថ្ងៃក្តី តែក៏នៅមានបងប្អូនប្រជាពលរដ្ឋយ៉ាងច្រើនបានធ្វើដំណើរទៅវត្តអារាម យកចង្ហាន់ទៅប្រគេនព្រះសង្ឃ ស្តាប់ព្រះសង្ឃសូត្រធម៌បង្សុកូល និងចម្រើនព្រះបរិត្ត ខ្លះសមាទាន នូវសីល៥ និងធ្វើពិធីរាប់បាត្រទៅតាមប្រពៃណីព្រះពុទ្ធសាសនា។

ពិធីបុណ្យភ្ជុំបិណ្ឌឆ្នាំនេះ ក៏មិនខុសពីឆ្នាំមុនៗដែរ គឺមានបងប្អូនប្រជាពលរដ្ឋខ្លះបានចេញដំណើរទៅដាក់បិណ្ឌជិតឫនៅទីឆ្ងាយៗ និងនៅតាមស្រុកកំណើតរបស់ពួកគាត់ ខ្លះទៀតក៏ឆ្លៀតពេលទៅដើរលេងនៅតាមរម្មណីយដ្ឋាននានា តាមតែខ្លួនចង់ទៅ។ជាពិសេសក្នុងថ្ងៃភ្ជុំធំនេះតែម្តង ប្រជាពលរដ្ឋបាននាំគ្នាយកចង្ហាន់ទៅវត្តគ្រប់ៗគ្នា ទៅលទ្ធភាពធនធាន និងសទ្ធាជ្រះថ្លារបស់ខ្លួន។  ដោយឡែកសន្តិសុខសណ្តាប់ធ្នាប់ក៏ល្អប្រសើរ ទាំងនៅតាមគេហដ្ឋានប្រជាពលរដ្ឋតាមវត្តអារាម និងនៅតាមទីសាធារណៈនានាក្នុងខេត្តរតនគិរី។

គួររំលឹកថា  បុណ្យភ្ជុំបិណ្ឌជាពិធីដ៏សំខាន់សម្រាប់ប្រជាពលរដ្ឋខ្មែរ  និងក្នុងវប្បធម៌ខ្មែរ។  ក្នុងរយៈពេល១៥ថ្ងៃ  គឺ ចាប់ពីថ្ងៃកាន់បិណ្ឌ ទី១ រហូតដល់ថ្ងៃទី១៥  ឬហៅថាថ្ងៃភ្ជុំធំ  ប្រជាពលរដ្ឋខ្មែរ នៅតាមភូមិនីមួយៗបានចែកវេនគ្នាធ្វើបាយម្ហូបជាចង្ហាន់យកទៅប្រគេនព្រះសង្ឃដើម្បីឧទ្ទិសកុសលដល់ញាតិការទាំង ប្រាំពីរសន្ដានដែលបានចែកឋានទៅ ។  គេមានជំនឿថាពេលមនុស្សស្លាប់ទៅព្រលឹងអ្នក ស្លាប់នោះអាចទៅកើតនៅស្ថានទេវលោក  ឬក៏ស្ថាននរក ប្រេតជាដើម ។  ចំពោះករណីអ្នកទៅកើតនៅស្ថាននរកប្រេត គឺមានតែការ ប្រគេនចង្ហាន់ដល់ព្រះសង្ឃឲ្យលោក ឧទ្ទិស កុសលជូនទៅប៉ុណ្ណោះទើបអាចទៅដល់ ។  អាស្រ័យដោយពិធីបុណ្យនេះក្នុងមួយឆ្នាំមាន រយៈពេល១៥ ថ្ងៃ ហេតុ ដូច្នេះហើយទើប ពលរដ្ឋខ្មែរនាំគ្នាធ្វើបុណ្យនេះតាមជំនឿពី ដូនតាមកដើម្បីឲ្យចិត្តជ្រះថ្លា៕

ដោយ : សហការី