បេក្ខភាពប្រធានាធិបតីអាមេរិកលោក​ដូណាលត្រាំបានប្រកាសឲ្យដឹងថាប្រសិនបើលោក​ជាប់​ឆ្នោតជាប្រធានាធិបតីអាមេរិកនោះលោកនឹងពិភាក្សាជាមួយមេដឹកនាំគីមជុងអ៊ុនដើម្បីបញ្ចប់​វិបត្តិបរមាណូ។

នៅថ្ងៃទី​១៨ខែឧសភា លោកដូណាលត្រាំបានប្រកាសថា បើលោកជាប់ឆ្នោតកិច្ចពិភាក្សានោះនឹងត្រូវធ្វើឡើង​ហើយវិបត្តិនឹងត្រូវបញ្ចប់។ ទន្ទឹមនឹងនោះលោកក៏បានបញ្ជាក់ថា លោកនឹង ដាក់សម្ពាធទៅលើរដ្ឋាភិបាលចិន ដើម្បីឲ្យទប់ស្កាត់បញ្ហានៅកូរ៉េខាងជើង។

នេះជាលើកទីមួយដែលលោកត្រាំបង្ហាញទស្សនៈចង់ពិភាក្សាជាមួយមេដឹកនាំគីមជុងអ៊ុន ចាប់តាំងពីពេលបោះឆ្នោតជ្រើសរើសបេក្ខភាពរហូតមកទល់ពេលនេះ។ កន្លងមកលោកក៏ធ្លាប់បានថ្កោលទោសនិងលើកសសេរផងដែរថា​មេដឹកនាំគីមជុងអ៊ុនជាបុគ្គល មានសមត្ថភាព​ ហាមប្រឈមនិងអាមេរិកដោយបើកជំហរ។

សំណើរនៃការធ្វើកិច្ចប្រជុំបែបនេះ ត្រូវបានគេមើលឃើញថា គឺជាសញ្ញានៃការផ្លាស់ប្តូរ ដ៏សំខាន់មួយនៃគោលនយោបាយ របស់អាមេរិក ឲ្យមានដំណើរការ ឆ្ពោះទៅមុខ ជាមួយនឹងប្រទេសដែលមាន របបគ្រប់គ្រងនយោបាយ ដាច់ដោយឡែកពីគេមួយនេះ។ ទោះបីជាយ៉ាងណាក្តី លោកស្រី Hillary Clinto ដែលជាដៃគូរប្រកួតប្រជែង មកពីគណបក្សប្រជាធិបតេយ្យ បានឆ្លើយតបទៅនឹងការប្រកាសរបស់លោកត្រាំតាមបែបបង្អាប់ទៅវិញ។ នៅក្នុងសេចក្តីថ្លែងការណ៍មួយរបស់ជំនួយការរបស់លោកស្រី Clinton ដែលបានបន្ថែមថា គោលនយោបាយការបរទេសរបស់លោក ត្រាំ ហាក់ដូចជាគ្មានន័យ និងគ្មានភាពឆ្លាតវ័យនោះទេ។

លោក ដូណាល់ ត្រាំ នឹងរំពឹងថា នឹងធ្វើដំណើរទស្សនកិច្ច ជាផ្លូវការមួយ ទៅកាន់ប្រទេសអង់គ្លេស នៅក្រោយពេលដែលសេចក្តីប្រកាសជាផ្លូវការ បេក្ខភាពតំណាងប្រជែងយក តំណែងប្រធានាធិបតីអាមេរិក មកពីគណបក្សសាធារណរដ្ឋ ដែលនឹងត្រូវធ្វើឡើង នៅខែកក្កដាខាងមុខនេះ៕​

ប្រែសម្រួល៖ ម៉ែវ សាធី

ដោយ​ មែវ​ សាធី